Semena pabuipi ne Nzambi

Kudi Mulumbuluishi utu wenza anu malu makane

Genese 18:22-32

BUAKANE, bululame, dibenga kansungansunga: ngikadilu mimpe bu nunku kayituku ikusankisha anyi? Tuetu bantu tutu basue bua bikale batuenzela anu malu makane. Diakabi, buakane kabuena butamba kumueneka pa buloba lelu to. Kadi kudi Mulumbuluishi udi mukumbane bua tuetu kumueyemena, ke Yehowa Nzambi. Utu wenza anu malu adi makane. Bualu ebu budi bumuenekela ku muyiki udi mu Genese 18:22-32 uvua Yehowa muine muyikile ne Abalahama. *

Pavua Yehowa muambile Abalahama muvuaye uya kutangila nsombelu wa bantu ba mu Sodoma ne Amola, Abalahama wakumvua buôwa bua tshivua mua kufikila bantu bakane bavua mua kuikala mu bimenga abi, ne Lota muana wa muanabu. Abalahama wakalomba Yehowa ne: ‘Neushipe bantu bakane ne bantu babi popamue anyi? Bikala bantu bakane makumi atanu mu musoko, wewe kuena usungila musoko bualu bua bantu bakane makumi atanu badimu anyi?’ (Mvese 23, 24) Nzambi wakamba ne: kavua mua kubutula bimenga abi bu bantu bakane 50 bikalamu to. Abalahama wakasengelela Yehowa misangu mitue ku itanu, wenda upuekesha bungi bua bantu too ne ku bantu 10. Musangu wonso uvuaye wakula, Nzambi wakamuambila ne: kavua mua kubutula bimenga abi bantu bakane bobu bikalamu ba bungi nansha.

Abalahama uvua ukokangana ne Nzambi anyi? Too! Bu yeye muenze nanku, tshivua kuikala diambu dipite bubi. Dîyi dia Abalahama diakaleja muvuaye utshina Nzambi ne udipuekesha bushuwa. Wakadiamba muvuaye muikale anu ‘lupuishi ne butu.’ (Mvese wa 27, 30-32) Kabidi, mêyi a Abalahama avua aleja muvuaye mueyemene buakane bua Yehowa. Anu muakamba Abalahama misangu ibidi mijima: bualu bua kushipa bantu bimpe pamue ne bantu babi ‘kabuikadi kudi’ Nzambi, mmumue ne: kabutu mu lungenyi luende nansha. Muena lulamatu Abalahama wakamba ne dishindika dionso ne: “Mulumbuluishi wa buloba buonso” utu ‘wenza bimpe’ anyi malu makane.​—Mvese wa 25.

Malu avua Abalahama muambe avua malelela anyi? Eè, avua tshitupa malelela, tshitupa kaayi malelela. Uvua mutupakane pavuaye usua kuleja bu ne: mu tshimenga tshia Sodome ne Amola muvua bantu bakane bamba kupita pa 10. Kadi uvua muambe bulelela pakambaye ne: Nzambi kavua mua ‘kushipa bantu bakane ne bantu babi popamue.’ Pakalua Nzambi kubutula bimenga abi bia bantu babi, banjelu bakambuluisha muntu muakane Lota ne bana bende babidi ba bakaji bua kupanda.​—2 Petelo 2:7-9.

Bualu ebu budi butulongesha tshinyi pa bidi bitangila Yehowa? Pavua Yehowa mumanyishe Abalahama dijinga diende dia kuya kumona muvua bimenga abi, uvua musue bua bayikile ne Abalahama. Pashishe, wakateleja mulunda wende Abalahama ne lutulu luonso muvuaye umumvuija malu avua ku muoyo wende. (Yeshaya 41:8) Ebu mbualu budi butulongesha bimpe ne: Yehowa nNzambi utu udipuekesha wambika basadidi bende ba pa buloba lumu, kayi ubapepeja. Bushuwa, tudi ne malu a bungi adi atusaka bua kueyemena Yehowa ne muoyo wetu mujima, bualu yeye ke Mulumbuluishi utu wenza anu malu makane.

[Mêyi adi kuinshi]

[Tshimfuanyi mu dibeji 20]

Abalahama wakalomba Yehowa bua Sodoma ne Amola