Bubanji budi bufuma kudi Nzambi

WEWE muikale ne lulamatu kudi Nzambi, neakupeshe bubanji anyi? Bidi mua kuikala nanku, kadi pamuapa bubanji buudi kuyi mutekemene to. Tuangate tshilejilu tshia Mariya mamuende wa Yezu. Muanjelu Gabaliele wakamumuenekela ne kumuambila ne: “bakukufuila luse lua bungi” kudi Nzambi ne uvua ne bua kulela Muana wa Nzambi. (Luka 1:28, 30-32) Kadi Mariya uvua mupele. Pavua Mariya muye kufila mulambu wa diledibua dia Yezu wakalambula “Nyunyu ya nkutshi ibidi, anyi bana babidi ba nyunyu ya nkudimba,” ivuabu balomba bapele bua kulambula Yehowa.​—Luka 2:24; Lewitiki 12:8.

Dikala dia Mariya mupele didiku dileja ne: Nzambi kavua mumubeneshe anyi? Kabiena nanku to, bualu pakayaye kutangila muanabu Elizabeta, yeye ‘kuujibua tente ne nyuma muimpe; kuela dîyi bikole, wakamba ne: Wewe [Mariya] udi mukaji mutambe kusankishibua, muana udi munda muebe udi muvudijila disanka.’ (Luka 1:41, 42) Mariya uvua ne diakalenga dia kulua mamuende wa muana munanga wa Nzambi pa buloba.

Nansha Yezu muine uvua mupele. Yezu uvua muledibue muaba mupele ne kudi baledi bapele ne yeye muine uvua kabidi mupele pavuaye pa buloba. Umue musangu wakambila muntu mukuabu uvua ukeba bua kulua muyidi wende ne: ‘Mibuabua idi ne mena ayi, nyunyu ya mulu idi ne masua ayi; kadi Muana wa muntu kena ne pa kuladika mutu wende.’ (Luka 9:57, 58) Kadi nansha nanku, tshivua Yezu Kristo muenze pavuaye mulue pa buloba tshiakapesha bayidi bende mushindu wa kulua bapianyi ba bubanji bunene. Mupostolo Paulo wakafunda ne: ‘wakalua mupele bua bualu buenu, bua nuenu nulue babanji ku bupele buende.’ (2 Kolinto 8:9) Mbubanji bua mushindu kayi buvua Yezu mupeshe bayidi bende? Mbubaji kayi butudi tupeta lelu?

Mbubanji bua mushindu kayi?

Makuta a bungi atu misangu mivule apangisha muntu bua kuikala ne ditabuja, bualu babanji batu beyemena makuta abu pamutu pa kueyemena Nzambi. Yezu wakamba ne: ‘kubuela kua bantu badi ne bintu bia bungi  mu bukalenge bua Nzambi mbualu bukole.’ (Mâko 10:23) Nunku bidi biumvuika ne: Yezu kavua mupeshe bayidi bende bubanji bua ku mubidi to.

Kabidi, bena Kristo ba kumpala ba bungi bavua bapele. Pavua mulema kampanda wa ku tshileledi ulomba Petelo makuta, wakamuandamuna ne: ‘Tshiena ne argent anyi ngolo, kadi tshindi natshi, nenkupetshi. Mu dîna dia Yezu Kristo wa ku Nazaleta, enda biebe.’​—Bienzedi 3:6.

Mêyi a muyidi Yakobo adi kabidi aleja ne: tshisumbu tshia bena Kristo tshivua tshienza ne bapele. Wakafunda ne: ‘Umvuayi, bana betu bananga; Nzambi kakasungula bapele ba mu bintu bia pa buloba bua kuikalabu babanji mu ditabuja ne bapianyi ba bukalenge buakalayeye badi bamunanga anyi?’ (Yakobo 2:5) Mupostolo Paulo wakamba kabidi ne: ki bantu ba bungi ‘badi bena meji mu buntu buabu’ anyi “badi bakole” peshi “badi baledibue bena butumbi” bakalua bena Kristo mu tshisumbu nansha.​—1 Kolinto 1:26.

Bu muvua bubanji buvua Yezu mupeshe bayidi bende kabuyi bua makuta, mbubanji kayi buakabapeshaye? Mu mukanda uvua Yezu mutumine tshisumbu tshia Semuna wakamba ne: ‘Ndi mumanye dikenga diebe ne bupele buebe, kadi udi mubanji.’ (Buakabuluibua 2:8, 9) Bena Kristo ba mu Semuna bavua bapele, kadi bavua ne bubanji buvua bupite argent ne or ku mushinga. Bavua babanji bua ditabuja ne lulamatu luabu kudi Nzambi. Ditabuja didi ne mushinga bualu ‘bonso kabena nadi.’ (2 Tesalonike 3:2) Bantu badi kabayi ne ditabuja mbapele ku mêsu kua Nzambi bushuwa.​—Buakabuluibua 3:17, 18.

Bubanji budi bufumina ku ditabuja

Mmu mishindu kayi mudi ditabuja ne mushinga? Bantu badi ne ditabuja kudi Nzambi badi bapeta ‘bubanji bua buimpe bua  Nzambi ne lutulu luende ne luse lua musangu mule.’ (Lomo 2:4) Badi kabidi bapeta “kubuikidibua kua malu mabi” abu mu mulambu wa Yezu udi utupikula. (Efeso 1:7) Badi kabidi ne meji a ‘dîyi dia Kristo’ didi anu kudi bantu badi ne ditabuja. (Kolosai 3:16) Bu mudibu basambila Nzambi ne ditabuja, “ditalala dia Nzambi didi ditamba dijingulula dionso dia bantu” didi dilama mioyo yabu ne meji abu, dibafikisha ku disanka ne bidibu nabi ne kuikala ne diakalengele.​—Filipoi 4:7.

Bantu badi ne ditabuja kudi Nzambi ku butuangaji bua muanende Yezu Krito badi kabidi ne ditekemena dia muoyo wa kashidi. Tudi bamanye bimpe mêyi a Yezu Kristo a ne: ‘Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Ditekemena dilenga edi didi dikola padi muntu upeta dimanya dilelela dia Tatu ne dia Muana, bualu Yezu wakamba ne: ‘Eu udi muoyo wa tshiendelele, bua bobu bakumanye wewe, Nzambi umuepele mulelela, ne yeye uwakatuma, Yezu Kristo.’​—Yone 17:3.

Nansha mudi bubanji budi Nzambi utupesha buikale nangananga bua mu nyuma, kadi budi kabidi bua mu lungenyi ne bua ku mubidi. Tuangate tshilejilu tshia tatu Dalídio wa mu ditunga dia Brézil. Kumpala kua kupetaye dimanya dijalame dia tshidi Nzambi musue, uvua munu wa maluvu. Dinua dia maluvu edi divua dinyanga malanda pakantshi pende ne bena mu dîku diende bikole. Pa kumbusha lutatu elu uvua ne lutatu lua kulama mfranga. Pashishe bakatuadija kumulongesha Bible kudi Bantemu ba Yehowa ne wakashintuluka bikole.

Malu avua Dalídio mulonge akamusaka bua kulekela bibidilu bibi. Bua dikola diende mu ditabuja wakamba ne: “Mvua ne tshibidilu tshia kumbuka mu eu nganda kuya mu mukuabu; kadi mpindieu ndi nya ku nzubu ne ku nzubu.” Wakalua mumanyishi wa ku dîba ne ku dîba wa Dîyi dia Nzambi. Dishintuluka edi divua dimupeteshe makanda a mubidi ne diakamuabuluisha kabidi bua kulama makuta. Dalídio wakamba ne: “Makuta amvua ntula ku maluvu, ndi ngatula mpindieu bua kuambuluisha bakuabu anyi bua kusumba bintu bikuabu bindi nabi dijinga.” Wakapeta kabidi balunda ba bungi munkatshi mua bantu badi pabu ne mmuenenu wa malu bu wa Nzambi. Dalídio udi mpindieu ne ditalala dia mu lungenyi ne kena usanka ne tshintu kayi tshionso tshivuaye welela meji kumpala kua kumanyaye Nzambi to.

Tuangate tshilejilu tshikuabu tshia tatu Renato tshidi tshileja mudi ditabuja mu Yehowa Nzambi diambuluisha muntu bua kulengeja nsombelu wende. Wewe mumone disanka ne mimuemue bidiye nabi lelu, mbikole bua kumanya ne: uvua ne malu a bungi avua amusaka ku didimona bu muntu uvuabu benzela bibi pakaledibuaye. Pakamulelabu, mamuende wakamuimansha. Bakamushiya muinshi mua tshibasa musuika mu tshintu tshia manyanu tshivungakaja ne utshivua ne dila dia mufu. Bamamu bakuabu babidi bavua bapitshila muaba au, kumonabu tshintu tshivuabu bamukutshile atshi tshinyunga muinshi mua tshibasa. Ke kuanjibu kuela meji ne: muntu mmushiye kampusu kende muaba au. Pakaluabu kumona ne: tshivua muana, bobu kumuambula lukasa ne kuya nende ku lupitadi bua kumondopabu.

Umue wa ku bamamu abu uvua Ntemu wa Yehowa, ne wakalondela Rita Ntemu mukuabu bualu bua muana au. Rita uvua usama bikole bua ditamba kutula dia mafu, ne uvua anu ne muana wa bakaji umue. Uvua ukeba ne muoyo mujima bua kulela muana wa balume, ke kuangataye dipangadika dia kukolesha Renato.

 Rita wakambila Renato patshivuaye muana ne: yeye kavua mamuende mumuledi to. Kadi wakamulama ne dinanga dionso ne uvua umulongesha malu a mu Bible. Pakakolaye, wakatuadija kudifila ku malu a mu Bible. Wakaleja dianyisha bua muvuaye mupande ne mukole mu mushindu kawuyi muelela meji. Utu misangu yonso upuekesha binsonji padiye ubala mêyi a Davidi aa: “Nansha biandekela tatu wanyi ne mamu wanyi, Yehowa neangambule.”​—Musambu 27:10.

Bua kuleja Yehowa dianyisha bua bionso bidiye mumuenzele, Renato wakatambula mu tshidimu tshia 2002 ne wakalua mumanyishi wa Bukalenge bua Nzambi wa ku dîba ne ku dîba tshidimu tshiakalonda. Ki muanji kumanya baledi bende balelela to, ne pamuapa kakubamanya nansha. Kadi, Renato mmumanye ne: dimue dia ku mapa a mushinga didiye mupete nkupeta dimanya ne kuikala ne ditabuja kudi Yehowa, udi Tatu wa dinanga ne mukubi.

Pamuapa udi musue kuikala mu malanda a dinanga ne Nzambi adi mua kuvuija nsombelu webe mubanji. Diakalenga dia kuikala mu malanda a mushindu eu ne Yehowa Nzambi ne Muanende Yezu Kristo didi bua bantu bonso nansha babanji nansha bapele. Bualu ebu kabuakutupesha bubanji bua ku mubidi kadi budi butupetesha ditalala dia mu lungenyi ne disanka didi mfranga nansha bungi kayi kayiyi mua kusumba. Mêyi adi mu Nsumuinu 10:22 aa mmalelela: ‘Disankisha didi difuma kudi Yehowa didi divuija bubanji, ne kena utenteka kanyinganyinga pa mutu padi.’

Yehowa udi utamba kutabalela bantu badi balue kudiye: ‘Aka! Bu wewe mumvue mikenji yanyi, ditalala diebe diakadi kuikala bu musulu, ne buakane buebe buakadi kuikala bu mavuala a mâyi manene!’ (Yeshaya 48:18) Mmulaye ne: muntu yonso udi ulua kudiye ne lungenyi ne meji mimpe, neamufute: ‘Difutu dia kudipuekesha ne dia ditshina dietu dia Yehowa didi bubanji, butumbi ne muoyo.’​—Nsumuinu 22:4.

[Lungenyi lunene lua mu dibeji 14]

Kuitabuja Nzambi kudi kupetesha ditalala, disanka ne musangelu

[Tshimfuanyi mu dibeji 13]

Nansha muvua dîku dia ba Yezu dia pa buloba dikala dipele, Yehowa uvua mudibeneshe bikole