Muvuabu bambuluishe bantu panyima pa dishipangana mu kalasa

DIBEJI dia pa mutu pa tshikandakanda dijima divua difike. Pamutu padi pavua lukonko lufunda mu miaku minene ne: “Bua tshinyi?” Elu ndukonko lutu bantu badiela misangu yonso ne luakadielabu kabidi pavua nsonga wa bidimu 17 mushipe bantu 15 mu tshimenga tshia Winnenden tshidi ku sud kua ditunga dia Allemagne ne pashishe kudiasaye yeye muine. Bakapuekesha mabendela mu Allemagne mujima ne lumu elu luakatangalaka bikole pa buloba.

 Winnenden ntshimenga tshia bubanji ne tshidi bantu basombe mu ditalala, mudi mitshi ya mvinyo ne mitshi mikuabu ya bimuma. Mu dia 11 ngondo muisatu wa 2009, dituku diakatuadija anu bu matuku onso mu tshilongelu tshia bikadilu tshia Albertville. Mu katupa emu, tshimvundu tshikole kujuka, tukavua ku 9:30.

Nsongalume mukuabu udi ubuela mu tshilongelu tshiende tshia kale ne tshingoma tshivuaye muambule mu nzubu wa bulalu wa baledi bende. Mu minite mikese, udi wasa balongi tshitema ne balongeshi basatu mu tulasa 3 ne udi utapa bantu ba bungi miaba idiye upitshila. Katantshi aka, bampulushi kufikabu. Mushipianganyi au kunyemenaye mu lupitadi lua bena mitu luvua pabuipi apu, ne muina amu kushipaye muena mudimu umue uvua ulongolola biamu. Pashishe kukuataye mashinyi ne kutangija tshingoma kudi muendeshi. Bobu bamane kuya mutantshi wa kilometre 40, muendeshi kumunyemaye. Pakafika nsongalume au muaba utubu basumbishila mashinyi, wakashipa musumbishi mukuabu ne musumbi umue ne kutapa bampulushi 2 bavua bakeba kumukuata mputa ya milengu. Ndekelu wa bionso padi bampulushi bamufimpakaja, udi udiasa ku mutu.

Bantu bavua bamanye nsongalume eu bakamba muvuaye musue bua bamunange ne kuikala ne balunda. Kadi ntshinyi tshiakamufikishe bua kuenza bualu bua mushindu eu? Pamuapa uvua ne bualu buvua bumutonde, ne uvua unaya ne tubingoma tua mafi anyi manaya a tshikisu a ku ordinatere adi matangalake bikole. Bamue bantu badi bamba ne: ke tshitu bansonga bakuabu bavule benza. Kadi netuambe tshinyi bua bantu bavuaye mushipe? Uvuaku musungule bantu kampanda anyi uvua wasa mu mpukampuka? Bantu bavua badikonka bua tshinyi uvua mushipe bansongakaji 8 kadi kushipa anu nsongalume umue. Kakuena muntu udi mua kufila diumvuija dijalame to.

Tshiakenza bantu diakamue

Mamu kampanda diende Heike wakamba ne: “Pakambikila muananyi ne kungambila bua mudibu basangane mu kalasa, ngakelesha mpata. Kadi pangakumvua mashinyi a bampulushi ne a mpitadi apita lubilu, buôwa buakankuata.” Bidi bimueneka ne: difika dia bampulushi diakapangisha nsongalume au bua kushipa bantu ba bungi mu tshilongelu. Bobu bamane kupatula bantu bonso mu tulasa, baminganga, bafidi ba mibelu, bamfumu ba malu a Nzambi batu bambuluisha bantu mu mpitadi, mu tulasa ne mu maloko bakalua muaba au ne kuenza mudimu mukole bua kuambuluisha balongi.

Bakamona-kamba bakalua lukasa ku tshilongelu atshi, kutetabu bua kuela balongi nkonko, kadi batshivua ne buôwa bua bungi bua malu avua menzeke. Mulongi mukuabu wakamba ne: kuvua mashinyi 28 a tudiomba 26 avua mimane kumpala kua tulasa. Ditembangana dikole divua pankatshi pa bakamona-kamba diakabafikisha ku diamba malu uvua kaayi majalame to. Anu diodi dituku adi kamona-kamba mukuabu wakaya mu dîku dia nsongakaji uvuabu bashipe ne kubalomba filme wa malu avua menzeke; bakuabu pabu bakafuta balongi bua kubakuatabu foto. Bu muvua bualu ebu butonde bantu bikole, bamue bakamona-kamba bavua ne lutatu lua kufuilakana bua kukuata bindidimbi ne kuditeka pa muaba wa bavua bafuishe ne kubanemeka.

Patu malu a nunku enzeka, bantu batu misangu mivule banyemena ku bitendelelu bua kupeta disulakana ne bua kumanya tshidiwu enzekela. Dituku divuabu basangane adi, bitendelelu bia bungi biakatuilangana bua kuenza masangisha pamue. Bantu ba bungi bakasanka bua bualu abu. Kadi bantu bavua bakeba diambuluisha dia  mu Dîyi dia Nzambi anyi mandamuna a nkonko yabu bakanyingalala bikole. Baledi ba mulongi mukuabu bakaya ku dijika dia mulunda wa muanabu uvuabu bashipe. Mamu wakamba ne: “Mpasata wakakula bua makenga a Yobo. Mvua ngela meji ne: neatuleje malongesha atudi mua kupeta anyi kufila dikankamija kampanda. Kadi kakenza nanku to. Kakaleja kuvua makenga a Yobo mafumine anyi tshiakamufikila pashishe to.”

Tatu mukuabu wakanyingalala bua mayisha avua kaayi ne bualu bua nsongo. Bantemu ba Yehowa bakavua balongesha tatu au Bible ne kukadi bidimu 30, kadi kulekelaye. Mpindieu kutuadijilulaye kubuela kabidi mu bisangilu biabu.

Nsongakaji mukuabu wa bidimu 14 diende Valisa uvua Bantemu balongesha Bible uvua pende mu kalasa dituku divuabu bashipangane adi. Pakumvuaye muadi wa tshingoma, wakatuadija kusambila Yehowa. Pakaluabu kumuebeja tshivuaye muenze bua kupita ne lutatu alu wakamba ne: malu aa adi akumbaja tshivuaye mulonge mu Bible bua matuku a ku nshikidilu aa. (2 Timote 3:1-5) Bantemu bakuabu babidi bavua badifile mu dikankamija bena mutumba nabu. Mamu mukuabu mukulakaje wakaya kudibu ubambila ne: “Tshinudi nuenze etshi ke tshidi bantu ba bungi ne bua kuenza.” Bu muvua dishipangana dibi adi ditonde bantu bikole, biakasaka bamue bua kuteleja mukenji wa ditekemena ne kuitaba dikankamija dia mu Dîyi dia Nzambi.

Bantu bakashala batata

Bushuwa, nansha mêyi mimpe a mushindu kayi kaena mua kujikija kanyinganyinga kuonso ne dibungama dia bantu badi lutatu lukuate to. Kakuena mêyi adi mua kujikija kanyinganyinga ka baledi badi bafuishe muana anyi dibungama dia mpulushi uvua musangane mukajende mufue panshi munkatshi mua bantu bavuabu bashipe.

Balongi bavua bapanduke pamue ne bena mu mêku abu bakashala batata bikole mu lungenyi mu mushindu kampanda anyi kansanga. Tshilejilu, Vassilios wakatumpikila diakamue pa dididishi pakumvuaye muadi wa tshingoma. Udi wamba ne: “Pangakapatukila pa dididishi, ngakasambila Yehowa. Mvua ngela meji ne: ndi mfua. Mvua ngela meji ne: adi ke divua disambila dianyi dia ndekelu.” Mu mbingu yakalonda, wakatata bikole ne bilota bibi ne kavua musue kuakula ne muntu. Uvua nangananga unyingalala bikole pavuaye umona muvua bena ku tudiomba ne bafundi ba bikandakanda batembangana bua bivuabu bambe pa dishipangana adi ne bua dikola dia muoyo dia bantu bavua bakeba kumanya kalu ne kalu kuonso. Panyima pa matuku a bungi wakapua malu au muoyo.

Jonas uvua mu kalasa kamue ne Vassilios ne uvua mumone muvuabu bashipa balongi babu 5. Wakamba ne: “Patshivua bualu abu buenzekelaku, tshivua ne lutatu lua kumvuija muvuabi bienzeke to; bivua anu bu filme udi wenza bantu buôwa. Kadi mpindieu, mbikole bua meme kubulonda mundi mbulonda emu. Matuku makuabu ntu mbika bimpe, makuabu mbika bibi. Amue matuku tshitu musue kuakula malu au to; kadi makuabu ntu ngakula bikole.” Yeye pende uvua ulotakana ne ushala ne tshitabela.

Panyima pa matuku, bakapingajila balongi bintu biabu bivua bishala mu tulasa. Baminganga batu buondopa bantu batu ne buôwa bakamba ne: kumona bintu ebi kudi mua kubavuluija malu avua menzeke. Ku ntuadijilu, Jonas kavua musue kulenga tshizaku, tshibuta tshia mikanda, ne tshifulu tshivuaye ubanda natshi pa moto. Misangu yonso ivuaye umona muntu mufuanangane ne nsongalume uvua mushipangane au anyi muele tshibuta tshia buena tshiende atshi panyima, uvua umvua buôwa. Pavua baledi bende bamona filme ne umvua muadi wa tshingoma, bivua bimusamisha mutu. Baminganga bakateta  bua kuambuluisha bantu bavua bamone malu au bua kuapua muoyo.

Jürgen (tatuende wa Jonas) utu wenza mudimu mu lupitadi muvuabu bashipe muena mudimu umue amu. Wakamba ne: baledi ba bungi ne bena mudimu nende bavua batamba kudiebeja ne: bua tshinyi? Anyi ne: kadi bu biobi bikale ne: . . .? Tshilejilu, muena mudimu mukuabu wa mu lupitadi uvua kulu ku etaje mumone nsongalume au upita ne tshingoma uvua ne buôwa wela meji ne: uvua mua kumuasa ne bualu abu buakamufikisha ku dimondopabu disama dia mutu.

Muvuabu bambuluishe bamue bua kutantamena lutatu

Ntshinyi tshivua tshiambuluishe bamue bantu bua kutantamena bualu bubi bua mushindu eu? Jürgen udi wamba ne: “Nansha mutubi bikole imue misangu, ngakamona ne: kuikala munkatshi mua bantu kudi kuambuluisha. Bidi bikolesha ku muoyo paudi umanya ne: kuena nkayebe to, kadi bantu bakuabu badi baditatshisha bua bualu buebe.”

Jonas udi pende wanyisha diambuluisha dia bakuabu bualu udi wamba ne: “Bantu ba bungi bakantumina tubeji tuvua ne foto pa mutu ne kumfundila mêyi a kunkankamija nawu. Bakuabu bakamfundila mvese ingakalua kubala pashishe. Bivua bimpe be.” Mbualu kayi bukuabu buvua bumuambuluishe? “Pamvua ntabuluka butuku ne tshiyi manya tshia kuenze, mvua nsambila. Misangu mikuabu mvua nteleja mijiki anyi Réveillez-vous! mukuate mu bande.” * Udi wamba kabidi ne: “Bible udi utuambila ne: malu onso aa adi enzeka bualu Satana udi ukokesha buloba ne bualu tudi mu matuku a ku nshikidilu.” Tatuende wakamba pende ne: Dimanya edi ke divua dimuambuluishe bua kutantamena lutatu alu.

Makenga onso akadi pa kujika

Mu matuku makese patupu, buji, bilongo ne mikanda biakuula kumpala kua tshilongelu. Kerstin wakamona ne: bantu ba bungi bavua bafunde bebeja bua tshinyi bualu abu buvua buenzeke ne bua tshinyi Nzambi uvua mubulekele buenzeka. Pakamonaye ne bivua bikengela kuandamuna nkonko ayi, yeye ne Bantemu bakuabu babidi bakafunda mukanda ne kuuteka pamue ne mikuabu ayi.

Mu ndongamu mukuabu uvuabu benze bua kuvuluka malu au, bena ku televizion mukuabu bakaleja mukanda wende ne kutela mêyi a kumpala a ne: “Bua tshinyi? Mu matuku a ku nshikidilu, bantu badi bela lukonko elu bikole ne nangananga lua ne: Nzambi uvua penyi? Bua tshinyi wakalekela bualu ebu buenzeka?” Diakabi, mêyi a mu mukanda au akashikila anu apu.

Bua tshinyi bivua diakabi? Bualu mukanda au uvua utungunuka ne umvuija kudi makenga onso mafumine ne uleja ne: Nzambi “neenze bua ntatu yonso idi bantu bakebeshe ijike.” Pashishe uvua wamba ne: “Mu mukanda wa ndekelu wa mu Bible, Nzambi udi wamba ne: neakupule binsonji bionso ku mêsu kua bantu, ne lufu kaluakuikalaku kabidi, madilu kaakuikalaku kabidi, nansha muadi, nansha kanyinganyinga. Malu a kale onso akujimina.” Yehowa Nzambi neabishe too ne bafue. Mu Bukalenge buende bukadi pa kulua, kamuakuikala dishipangana ne makenga to. Nzambi udi utulaya ne: ‘Mona, ndi mvuija bintu bionso bipiabipia.’​—Buakabuluibua 21:4, 5.

[Mêyi adi kuinshi]

[Tshimfuanyi mu dibeji 29]

Jonas wakapeta mukanda uvuabu bamufundile ne: “Katuena bakupue muoyo”

[Mêyi a dianyisha bua tshimfuanyi mu dibeji 26]

Focus Agency/​WPN

[Mêyi a dianyisha bua tshimfuanyi mu dibeji 26]

© imagebroker/​Alamy

[Mêyi a dianyisha bua tshimfuanyi mu dibeji 27]

Foto: picture alliance

[Mêyi a dianyisha bua tshimfuanyi mu dibeji 28]

Foto: picture alliance