UKADIKU mutekete mu maboko ne umvua bua kulekela mudimu webe anyi?— * Bantu ba bungi batu bumvua nanku, nansha Yelemiya pende. Tshidibi, kakalekela bivua bantu bamba anyi benza bimufikisha ku dilekela mudimu wende to. Tuanji kuakula muvua Yelemiya muntu wa pa buende ku mêsu kua Nzambi nansha muvuaye mutekete mu maboko.

Kumpala kua kulelabu Yelemiya, Nzambi mulelela Yehowa ukavua mumusungule bua kuikalaye muprofete, bua kudimuija bantu bavua kabayi batshina Nzambi. Udiku mumanye tshivua Yelemiya mulue kuambila Yehowa bidimu panyima anyi?— “Tshiena mua kuakula bimpe, bualu bua ntshidi anu muana.”

Buebe wewe, Yehowa wakandamuna Yelemiya tshinyi?— Wakamuandamuna ne dîyi dimpe kadi kayi umuengeleka ne: ‘Kuambi ne: Ntshidi anu muana. Bualu bua neuye kudi muntu yonso kundi nkutuma, newambe mêyi onso angakuambila. Kuikadi ne buôwa.’ Bua tshinyi? Yehowa wakamuambila ne: ‘Bualu bua ndi nebe bua kukupandisha.’​—Yelemiya 1:4-8.

Tshidibi anu mutuvua bambe kulu eku, Yelemiya wakalua kuteketa mu mikolo bualu bavua bamuseka bua muvuaye wenzela Nzambi mudimu. Wakamba ne: ‘Ngakulua bu tshintu tshidibu baseka dituku dijima, muntu yonso udi unseka.’ Ke yeye kuangata dipangadika dia kulekela mudimu wende. Wakamba ne: ‘Tshiena ntela dîna dia Yehowa, ne tshiena ngambila bantu dîyi diende kabidi.’ Kadi wakalekelaku mudimu wende anyi?

Yelemiya wakamba ne: ‘Dîyi dia Yehowa didi mu mutshima wanyi bu kapia kadi kosha munda mua mifuba yanyi; kudikanda kudi kuntonda.’ (Yelemiya 20:7-9) Nansha muvua Yelemiya ne buôwa tshikondo kampanda, wakatungunuka ne mudimu wende bualu uvua munange Yehowa. Tumonayi muvua Yehowa mulame Yelemiya bua bualu abu.

Yehowa wakambila Yelemiya bua kuambila bantu ne: bobu kabayi bashintulule bienzedi biabu bibi, udi ne bua kubutula Yelushalema. Pakamanyisha Yelemiya bantu bualu abu, bakafika munda, bamba ne: ‘Muntu eu udi ne bua kufua.’ Kadi Yelemiya wakabasengelela bua ‘kutumikila dîyi dia Yehowa.’ Pashishe  kuambaye ne: ‘Numanye bualu ebu bimpe ne: Binuanshipe, nenuteke mashi a muntu udi kayi ne bualu pambidi penu, bualu bua Yehowa wakuntuma kunudi bulelela bua kunuambila mêyi aa.’ Udi mumanye tshiakenzeka anyi?—

Bible udi wamba ne: ‘Baminyampala ne bantu bonso bakambila bakuidi ne baprofete ne: Muntu eu kena ne bualu bua kufua, bualu bua yeye wakutuambila dîyi mu dîna dia Yehowa Nzambi wetu.’ Nunku, Yehowa wakalama Yelemiya bualu kavua mulekele buôwa bumupangisha bua kumuenzela mudimu to. Kadi mpindieu tuakula bua muprofete mukuabu wa Yehowa diende Uliya, tumone tshivua tshimuenzekele pavuaye mulekele kuenzela Yehowa mudimu.

Bible udi wamba ne: ‘Uliya wakamba mêyi bua kupisha nawu musoko eu ne buloba ebu bu muakadi mêyi onso akamba Yelemiya.’ Kadi Mukalenge Yehoyakima wakafikila Uliya munda. Udi mumanye tshiakenza Uliya anyi?— Wakumvua buôwa, kulekelaye kuenza disua dia Nzambi ne kunyemena mu Ejipitu. Nunku Mukalenge kutumaye bantu bua kumukuata kupingana nende. Udi mumanye tshivua Mukalenge muenzele Uliya pakaluabu nende anyi?— Wakamushipa ne muele!​—Yelemiya 26:8-24.

Bua tshinyi udi wamba ne: Yehowa wakalama Yelemiya ne kulekela Uliya?— Yelemiya uvua mua kuikala mumvue buôwa anu bu Uliya, kadi yeye kakalekela kuenzela Yehowa mudimu ne kunyema to. Kakalekela kuenza mudimu wende. Buebe wewe, ndilongesha kayi ditudi tupeta kudi Yelemiya?— Tudi tulonga ne: imue misangu bidi mua kutukolela bua kuenza tshidi Nzambi utuambila, kadi tudi ne bua kumueyemena ne kumutumikila misangu yonso.