Malu akamba Yezu Kristo adi akutangila

‘Meme ngakuluila bua bantu bapete muoyo, baupete muvule.’​—YONE 10:10.

BUALU bua kumpala buvua Yezu muluile pa buloba buvua bua kufila, kadi kabuvua bua kuangata to. Wakapesha bantu tshintu tshia mushinga mukole mu diyisha diende: uvua mubalongeshe malu malelela adi atangila Nzambi ne disua diende. Bantu badi bitabuja diyisha diende badi mua kupeta nsombelu muimpe mpindieu wa buena udi nende bena Kristo balelela ba bungi. * Kadi mu malu avua Yezu uyisha mudi bualu budi bupite makuabu onso. Bualu abu ke muoyo wende kauyi bubi uvuaye mufile buetu tuetu. Anu tuetu batumikile tshidi dilongesha diende didi ditangila bualu ebu ke tuetu kupeta masanka a tshiendelele.

Tshivua Nzambi ne Kristo bafile Yezu uvua mumanye ne: uvua ne bua kufua lufu lua dikenga mu bianza bia baluishi bende. (Matayo 20:17-19) Kadi wakamba mêyi ende adi mamanyike bikole adi mu Yone 3:16 a ne: ‘Bualu bua Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ Yezu wakamba kabidi ne: uvua mulue ‘bua kufila muoyo wende bua kupikula nawu bantu ba bungi.’ (Matayo 20:28) Bua tshinyi wakamba ne: uvua ne bua kufila muoyo wende pamutu pa kuwangata?

Dinanga dia pa buadi diakasaka Nzambi bua kulongolola mushindu wa kukuula bantu ku bubi buvuabu bapiane ne ku malu adibu bukebeshe bu mudi: dipanga bupuangane ne lufu. Nzambi wakenza bualu ebu pakatumaye Muanende mulela umue pa buloba bua kufuaye bu mulambu. Yezu wakitaba ne muoyo mujima, kufilaye muoyo wende uvua kauyi bubi bua bualu buetu. Mulambu eu ke tshintu tshitambe bunene tshidi Nzambi mupeshe bantu. * Mulambu eu udi mua kutupetesha muoyo wa tshiendelele.

Tshiudi ne bua kuenza Utu witaba ne: Yezu utu mufile mulambu eu buebe wewe anyi? Andamuna lukonko elu. Tufile tshilejilu: muntu udi ukupesha tshintu kampanda. Tshintu atshi tshidi tshilua tshiebe anu paudi wolola bianza, utshiangata, ki mmuomu anyi? Bia muomumue, Yehowa udi ukupesha mulambu eu. Bua wowu kulua webe anu wewe muolole bianza bua kuwangata. Kadi mmunyi muudi mua kuolola bianza bua kuwangata?

Yezu wakamba ne: bantu badi baleja ditabuja ke bapete muoyo wa tshiendelele. Ditabuja didi dimuenekela ku malu audi wenza. (Yakobo 2:26) Kuitabuja Yezu kudi kumvuija kuenza malu a buena avua Yezu muambe anyi muenze. Bua kuenza malu aa, udi ne bua kumanya bimpe Yezu ne Tatuende. Yezu wakamba ne: ‘Eu udi muoyo wa tshiendelele, bua bobu bakumanye wewe, Nzambi umuepele mulelela, ne yeye uwakatuma, Yezu Kristo mene.’​—Yone 17:3.

Kukadi bidimu bitue ku 2 000, Yezu Kristo wakalongesha malu avua mashintulule nsombelu wa bantu ba bungi pa buloba bujima. Udiku musue kumanya malu makuabu avuaye mulongeshe anyi? Mmunyi muudi wewe ne balunda anyi balela bebe mua kupetela masanka ku malongesha ende kutuadija mpindieu too ne tshiendelele? Bantemu ba Yehowa mbasue kukuambuluisha bua wewe kuamanya.

Biena-bualu bidi bilonda nebikumvuije malu makuabu adi atangila Yezu Kristo, muntu uvua mulongeshe malu adi mua kushintulula nsombelu webe bua kashidi.

[Mêyi adi kuinshi]