Utu mumanye anyi?

Pa kumusha mu Bible, mmalu kayi makuabu adi ajadika ne: Yezu uvuaku?

▪ Bafundi bakese bavuaku mu bidimu bikese panyima pa lufu lua Yezu bakamutela mu malu avuabu bafunde. Tshilejilu, Tacite uvua mufunde malu a bena Lomo pavuabu babakokesha kudi ba amperere wakakula bua Yezu. Wakakula bua mudilu uvua mubutule tshimenga tshia Lomo mu 64 wamba ne: bantu bavua bamba ne: mukalenge Néron ke uvua muoshishe tshimenga. Tacite wakamba ne: Néron wakakeba bua kuela bantu bavuabu babikila ne: bena Kristo tshilumbu pambidi. Wakafunda ne: “Dîna diabu ndifumine kudi Kristo wakashipabu kudi Pontio Pilato munene wa bena Lomo mu bukokeshi bua Tibère.”​—Annales, XV, 44.

Flavius Josèphe mufundi wa malu a kale muena Yuda wakakula pende bua Yezu. Pakakulaye bua malu avua menzeke pankatshi pa lufu lua Festus ngovena muena Lomo uvua mu Yuda mu bidimu bia 62, ne tshikondo tshivuabu bamupingane mu nkuasa kudi Albinus, wakamba ne: Anan (Ananias) muakuidi munene “uvua mubueje tshisangilu tshia balumbuluishi ba ku kabadi kanene ka bena Yuda, bua kulumbuluisha Yakobo muanabu ne Yezu uvuabu babikila ne: Kristo ne bantu bakuabu.”​—Antiquités judaïques, XX, 200 (ix, 1).

Bua tshinyi bavua babikila Yezu ne: Kristo?

▪ Bible udi wamba ne: pavua muanjelu Gabriele muye kudi Mariya bua kumuambila ne: uvua ne bua kuimita difu, wakamuambila ne: uvua ne bua kuinyika muanende dîna dia Yezu. (Luka 1:31) Bena Yuda ba bungi ba kale bavua ne dîna edi. Josèphe (mufundi wa malu a kale, muena Yuda) wakafunda bua bantu bakuabu 12 bavua ne dîna edi, pa kumbusha badibu batele mu Mukanda wa Nzambi. Bavua babikila muana wa Mariya ne: “muena Nazaleta” bua kuleja ne: yeye uvua Yezu uvua mufumine mu Nazaleta. (Mâko 10:47) Wakalua kumanyika kabidi mu dîna dia ‘Kristo’ anyi Yezu Kristo. (Matayo 16:16) Dîna edi didi diumvuija tshinyi?

Muaku ‘Kristo’ mmufumine ku muaku wa mu tshiena Greke Khristos, udi upetangana ne wa mu tshiena Ebelu Mashiaḥ (Masiya). Miaku yonso ibidi eyi idi yumvuija ne: “Muela manyi.” Kuvua bantu bakuabu bavuaku kumpala kua Yezu bavuabu babikila mu dîna edi. Tshilejilu, bavua babikila Mose, Alona, ne mukalenge Davidi ne: bela manyi bua kuleja ne: Nzambi uvua mubasungule bua kuikala ne mudimu kampanda ne bukokeshi. (Lewitiki 4:3; 8:12; 2 Samuele 22:51; Ebelu 11:24-26) Yezu, Masiya uvuabu balaye ke uvua muleji mpala munene wa Yehowa. Ke bualu kayi bivua bikumbane bua kumubikilabu ne: ‘Kristo Muana wa Nzambi udi ne muoyo.’​—Matayo 16:16; Danyele 9:25.

[Tshimfuanyi mu dibeji 15]

Tshimfuanyi tshia Flavius Josèphe