Nkonko ya babadi

Yezu ke Mikaele muanjelu mutambe bakuabu bunene anyi?

▪ Mu tshikoso, tudi tuandamuna ne: eyowa. Miaba ya bungi batu ne tshilele tshia kubikila muntu mu mêna a bungi. Bidi kabidi nanku bua mêna a mu Bible. Tshilejilu, bavua babikila Yakoba kabidi ne: Isalele. (Genese 35:10) Mu Bible ya tshiena Greke ya kale bavua babikila mupostolo Petelo mu mêna atanu mashilangane: Simeona, Simona, Petelo, Kefa ne Simona Petelo. (Matayo 10:2; 16:16; Yone 1:42; Bienzedi 15:7, 14) Mmunyi mutudi mua kujadika ne: Mikaele ndîna dikuabu dia Yezu? Tukonkonone malu adi mu Mukanda wa Nzambi adi alonda aa.

Kudi miaba itanu mu Bible idibu bakula bua muanjelu wa bukole udibu babikila ne: Mikaele. Dîna edi didi disanganyibua miaba isatu mu mukanda wa Danyele. Mu Danyele 10:13, 21 badi bamba ne: Mikaele udibu babikila ne: ‘umue wa bamfumu ba banjelu’ ne ‘muanjelu-mulami wenu’ uvua musungile muanjelu mukuabu uvuabu batume. Pashishe, badi bamba mu Danyele 12:1 ne: mu matuku a ku nshikidilu ‘Mikaele mukalenge wa banjelu, mulami wa bana benu, neajuke.’

Mbafunde kabidi dîna dia Mikaele mu Buakabuluibua 12:7, mvese udi uleja mudi ‘Mikaele ne banjelu bende’ baluangana mvita mikole ne Satana Diabolo ne banjelu bende babi ne babipata mu diulu.

Mu mvese yonso itudi batele eyi badi baleja mudi Mikaele muikale muanjelu wa mvita udi uluila bantu ba Nzambi ne ubalama, ne uluangana too ne Satana muluishi munene wa Yehowa.

Badi babikila Mikaele mu Yuda mvese wa 9 ne: ‘muanjelu mutambe bakuabu bunene.’ Mu Bible kabatu bakula bua banjelu batambe bakuabu to, kadi badi bakula anu bua ‘muanjelu mutambe bakuabu bunene.’ Mvese mukuabu udi wakula bua muanjelu mutambe bakuabu bunene ngua 1 Tesalonika 4:16, mudi Paulo wakula bua Yezu mumane kubika ku lufu wamba ne: ‘Mukalenge muine neapueke mu diulu wela dîyi dikole ne dîyi dia muanjelu mutambe bakuabu bunene, ne dîyi dia mpungi wa Nzambi.’ Nunku, mu mvese eu badi baleja mudi Yezu Kristo muikale muanjelu mutambe bakuabu bunene.

Tudi mua kuamba tshinyi bilondeshile malu onso atudi bumone aa? Yezu Kristo ke Mikaele muanjelu mutambe bakuabu bunene. Mêna abidi aa, dia Mikaele (didi diumvuija ne: “Nnganyi udi bu Nzambi”) ne dia Yezu (didi diumvuija ne: “Yehowa udi lupandu luetu”) adi aleja mudimu udiye nawu wa kulombola bantu badi bimanyine bumfumu bua Nzambi. Filipoi 2:9 udi wamba ne: ‘Nzambi wakamubandisha (Yezu mu butumbi buende) kulu kule, wakamupa dîna didi pa mutu pa dîna dionso.’

Mbimpe kumanya ne: Yezu uvua ne muoyo mu diulu kumpala kua kuledibuaye pa buloba. Kumpala kua Mariya kulela Yezu, muanjelu wakalua kumuambila ne: uvua ne bua kuimita difu ku bukole bua nyuma muimpe ne kuinyika muana dîna dia Yezu. (Luka 1:31) Pavua Yezu uyisha, uvua utamba kuakula bua muoyo uvuaye nawu mu diulu kumpala kua kuluaye pa buloba.​—Yone 3:13; 8:23, 58.

Nunku Yezu ke uvuabu babikila ne: Mikaele muanjelu mutambe bakuabu bunene kumpala kua kuluaye pa buloba. Pakabikaye ku lufu ne kupingana mu diulu, wakabangulula mudimu wende bu Mikaele mfumu wa banjelu, bua ‘butumbi bua Nzambi Tatu.’​—Filipoi 2:11.