Yezu uvua udiamba ne: uvua nganyi?

“Yezu kavua welakana bua tshivuaye, kuvuaye mufumine, tshivuaye muluile pa buloba ne malu avua mamuindile to.”​—HERBERT LOCKYER.

KUMPALA kua kuitaba anyi kuitabuja malu avua Yezu mulongeshe, tudi ne bua kuanji kumumanya. Yezu uvua nganyi menemene? Uvua mufumine kuepi? Mmalu kayi avuaye musue kuenza? Mandamuna a Yezu nkayende adi mu mukanda wa Matayo, wa Mâko, wa Luka ne wa Yone.

Uvua ne muoyo kumpala kua kuledibuaye pa buloba Yezu wakamba ne: ‘Diambedi kabayi banji kulela Abalahama, meme ndiku.’ (Yone 8:58) Abalahama uvua ne muoyo bidimu bitue ku 2 000 kumpala kua kulelabu Yezu. Kadi Yezu yeye ukavuaku kumpala mene kua Abalahama kuledibua. Kadi uvua penyi? Yeye nkayende wakamba ne: ‘Ngakafuma mu diulu.’​—Yone 6:38.

Muana wa Nzambi Yehowa udi ne banjelo anyi bana ba bungi. Kadi, Yezu yeye mmuana wa pa buende. Udi udiamba nkayende mudiye ‘Muana umuepele mulela wa Nzambi.’ (Yone 3:18) Mbuena kuamba ne: Yezu ke tshifukibua tshidi Yehowa mudifukile nkayende, kabiyi ku diambuluisha dia muntu mukuabu to. Muana umuepele mulela eu mmuambuluishe Nzambi bua kufuka bintu bikuabu bionso.​—Kolosai 1:16.

“Muana wa muntu” Yezu uvua utamba kudibikila ne: “Muana wa muntu” kupita bantu bakuabu bavua bamubikila pabu nanku. (Matayo 8:20) Nunku wakaleja ne: kavua muanjelo muvuale mubidi wa muntu to, uvua muntu wetu mulelela eu. Nzambi wakumusha muoyo wa muanende mu diulu kuuteka mu difu dia Mariya (nsongakaji utshivua kamama) ku diambuluisha dia nyuma muimpe. Ke bualu kayi Yezu wakaledibua muntu kayi kalema, kayi ne bubi.​—Matayo 1:18; Luka 1:35; Yone 8:46.

Masiya uvuabu balaye Muntu mukaji kampanda wa mu Samalea wakambila Yezu ne: ‘Ndi mumanye ne: Masiya ulualua.’ Yezu kumuandamuna ne: ‘Meme udi wakula nebe nyeye.’ (Yone 4:25, 26) Mêna aa: ‘Masiya’ ne ‘Kristo’ adi umvuija “Muela manyi.” Nzambi wakasungula Yezu anyi kumuela manyi bua kuenzaye mudimu kampanda bua kukumbaja malu avua Nzambi mulongolole bua kuenza.

Bualu bua kumpala buvua Yezu muluile pa buloba Yezu wakamba ne: ‘Bundi nabu mbua kuamba lumu luimpe lua bukalenge bua Nzambi; buakantuminabu mbualu ebu.’ (Luka 4:43) Nansha muvuaye kabidi wambuluisha bantu bavua bakenga, uvua utamba kudifila bikole bua kuyisha bantu Bukalenge bua Nzambi. Netulue kumona malu avuaye mulongeshe bua Bukalenge abu.

Bushuwa, Yezu kavua bu bantu bonso to. * Anu mutuabimona, malu avuaye mumone mu diulu avua mamuambuluishe bua kulongesha bimpe pa buloba. Bidiku bitukemesha bua muvuaye muyishe malu avua mua kushintulula nsombelu ya bantu ba bungi pa buloba anyi?

[Mêyi adi kuinshi]