Yezu uvua wamba ne: Nzambi nnganyi?

“Kakuena muntu udi mumanye Tatu, anu Muana nkayende, kabidi ne bantu badi Muana musue kumanyisha Tatuende.”​—LUKA 10:22, MMV.

MUAN’A BUTE wa Nzambi wakenza bidimu bipite bungi mu diulu pamue ne Tatuende. (Kolosai 1:15) Nenku Muana wakafika ku dimanya meji a Tatuende, lungenyi ne ngenzelu wende wa malu. Pakalua mpindieu Muana eu uvuabu babikila ne: Yezu pa buloba, uvua umanyisha bantu bikole malu malelela avua atangila Tatuende. Tudi mua kumanya Nzambi bikole tuetu tuteleja malu adi Muanende utuambila.

Dîna dia Nzambi Dîna dia Nzambi n’Yehowa; dîna edi divua ne mushinga wa bungi kudi Yezu. Muana munanga wa Nzambi eu uvua musue bua bantu bakuabu bamanye dîna dia Tatuende, ne benze nadi mudimu. Dîna dia Yezu didi diumvuija ne: “Yehowa udi lupandu.” Butuku bua muladilu wa lufu luende, Yezu uvua muambile Yehowa mu disambila ne: ‘Ngakubamanyisha dîna diebe.’ (Yone 17:26) Kabiena bitukemesha muvua Yezu muenze mudimu ne dîna dia Nzambi ne mudimanyishe bantu bakuabu. Anji elabi meji, mmunyi muvua bantu mua kumvua malu malelela a Yehowa kadi kabayi bamanye dîna Diende ne tshididi diumvuija? *

Nzambi udi ne dinanga dia bungi Yezu wakasambila kabidi ne: ‘Tatu, bualu bua wewe wakansua meme diambedi kabayi banji kufuka buloba.’ (Yone 17:24) Bu mukavua Yezu mumone tshivua dinanga dia Nzambi pavuaye mu diulu, wakakeba bua kudileja bantu mu mishindu mimpe ya bungi.

Yezu wakaleja ne: dinanga dia Yehowa kaditu ne mikalu to. Wakamba ne: ‘Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Muaku wa tshiena Greke udibu bakudimune ne: ‘ba pa buloba’ muaba eu udi wakula bua bantu bonso, bukua bantu bonso. Nunku bu mudi Nzambi munange bantu bikole, mmufile Muanende wa mushinga mukole bua bantu badi bamulamate basungidibue ku bupika bua bubi ne lufu ne bikale ne ditekemena dia muoyo wa tshiendelele. Mbikole bua tuetu kumvua bimpe menemene bunene ne bukole bua dinanga dia mushindu eu.​—Lomo 8:38, 39.

Yezu wakamba kabidi bualu budi butusankisha bikole ebu: Yehowa mmunange bikole batendeledi bende muntu ne muntu. Yezu wakalongesha ne: Yehowa udi anu bu mulami wa mikoko; buende yeye mukoko wonso mmushilangane ne mukuabu ne udi ne mushinga wa bungi. (Matayo 18:12-14) Yezu wakamba ne: nyunyi wa mushamusha umue kena mua kukuluka panshi Yehowa kayi mumanye to. Wakalua kusakidila mêyi aa: “Nsuki ya ku mitu yenu menemene idi mibala yonso.” (Matayo 10:29-31) Bikala Yehowa ne bukole bua kumanya ne: mushamusha wa mu disua kampanda kawenamu, kenaku utangila malu a mutendeledi wende yonso ne umuelela meji anyi? Bikala Yehowa utangila ne ubala nsuki ya ku mitu yetu, kudiku bualu kampanda mu nsombelu wetu bu mudi: majinga etu, ntatu yetu ne tunyinganyinga tuetu budiye kayi mua kumanya anyi?

Tatu wa mu diulu Anu mutuvua bamone mu tshiena-bualu tshishale, Yezu udi Muana umuepele mulela wa Nzambi. Ke bua tshinyi Muanende munanga eu uvua usambila Yehowa ne umubikila ne: “Tatu.” Ke bualu kayi mu mêyi a kumpala a Yezu akafundabu avuaye muakule mu ntempelo pavuaye ne bidimu 12, uvua mubikile  Yehowa ne: “Tatu wanyi.” (Luka 2:49) Muaku eu “Tatu” udi mu mukanda wa Matayo, wa Mâko, wa Luka ne wa Yone misangu mitue ku 190. Yezu uvua ubikila Yehowa ne: “Tatu wenu,” “Tatu wetu” ne “Tatu wanyi.” (Matayo 5:16; 6:9; 7:21) Padi Yezu utamba kubikila Yehowa nunku, udi uleja ne: bantu bena mibi badi mua kudia bulunda bua menemene ne Yehowa ne kumueyemena kabidi.

Muena luse, ubuikidila bantu bilema Yezu uvua mumanye ne: bantu bena mibi badi dijinga ne luse lua Yehowa lua bungi. Yezu wakafuanyikija Yehowa mu lusumuinu lua muana mujimine ne tatu wa luse, ubuikidilangana bilema udi muindile ne muoyo mujima bua kuakidila muana yonso udi ulekela kuenza malu ende mabi. (Luka 15:11-32) Nunku Yezu udi utujadikila ne: Yehowa udi ukeba bua muntu mubi akudimune mutshima wende bua amufuile luse. Yehowa udi pabuipi bua kubuikidila muntu yonso udi ulekela malu ende mabi. Yezu wakamba ne: ‘Ndi nnuambila ne: Nunku kabidi disanka dia mu diulu bua muntu umue mubi wakukudimuna mutshima wende neditambe disanka bua bantu bakane makumi tshitema ne tshitema badi kabayi ne bua kukudimuna mitshima yabu.’ (Luka 15:7) Nnganyi udi Nzambi wa luse wa nunku kayi mua kusankisha?

Udi uteleja masambila Pavua Yezu mu diulu kumpala kua kulua pa buloba, uvua mudianjile kumona ne: Yehowa utu ‘Umvua milombu’ ne masambila a bantu badi bamulamate atu amusankisha. (Musambu 65:2) Nunku pavua Yezu uyisha, wakalongesha bayidi bende mushindu wa kusambila ne malu a kulomba mu disambila. Wakababela ne: “Kanuakudi biakulakula.” Wakababela kabidi bua kusambila bua disua dia Nzambi dienzeke ‘pa buloba mudiye musue bu mudidi dienzeka mu diulu.’ Wakamba kabidi ne: tudi kabidi mua kusambila bua kupeta tshiakudia tshia dituku dionso, bua kutubuikidila mibi yetu ne bua kukandamena mateta. (Matayo 6:5-13) Yezu wakamba ne: Yehowa utu wandamuna masambila a batendeledi bende anu bu tatu wetu eu, utu wenza malu adi bantu bamulomba ne muoyo mujima ne ditabuja.​—Matayo 7:7-11.

Bua kuamba bualu pa bualu, Yezu uvua udienzeja bua kulongesha malu malelela adi atangila Yehowa ne tshidi Yehowa muine muikale. Kadi kudi bualu bukuabu budi butangila Yehowa buvua Yezu musue kulongesha bantu: Tshintu tshialua Yehowa kushintulula natshi malu pa buloba bua kuenza tshivuaye mulongolole bua buloba ne bantu. Bualu ebu ke buvua buenza tshiena-bualu tshia diyisha diende.

[Mêyi adi kuinshi]