Nsombelu wa bena Kristo ba kumpala

Bavua benza ‘midimu ya mu nzubu yabu’

‘Pakadibu baya mu njila, Yezu wakafika ku musoko mukuabu; mukaji wakadimu, dîna diende Mâta, wakamubueja mu nzubu muende. Wakadi ne muakunyende mukaji dîna diende Mariya, yeye wakadi mushikame ku makasa a Mukalenge, uteleja dîyi diende. Kadi Mâta wakadi utata ne mudimu wa bungi wa mu nzubu; yeye wakalua kudi Yezu, wakamukonka ne: Mukalenge, kuena ubenga bua muakunyanyi anshile mudimu nkayanyi anyi? Umuambile alue kunkuatshisha. Mukalenge wakamuandamuna ne: Mâta, Mâta, wewe udi utamba kuela meji a malu a bungi adi akutatshisha; tudi anu ne tshintu tshimue bualu; Mariya wakusungula luseke ludi luimpe, kabena bamanye mua kumunyengalu.’​—LUKA 10:38-42.

BIDI bimueneka ne: Mâta uvua muenji wa mudimu. Kakuyi mpata, bantu bakuabu bavua bamuanyisha bikole. Bilondeshile bilele bia bena Yuda ba mu tshikondo tshia Yezu, bavua bamuenena mukaji wa tshitembu ku mushindu uvuaye wenza midimu ya nzubu ne ukumbajila ba mu nzubu muende majinga abu.

Bavua bakankamija bakaji bena Kristo ba mu tshikondo atshi bua kuikala benji ba ‘midimu ya mu nzubu.’ (Tito 2:5) Kadi bavua kabidi ne diakalenga ne mudimu wa kulongesha bantu bakuabu  malu a Nzambi. (Matayo 28:19, 20; Bienzedi 2:18) Ngimue ya ku ‘midimu kayi ya bungi’ ivua mukaji muena Yuda ne bua kuenza? Ndilongesha kayi ditudi tupetela mu mêyi avua Yezu muakule bua Mariya?

‘Kutata ne mudimu wa bungi wa mu nzubu’ Mukaji wa nzubu muena Yuda uvua utuadija kuenza mudimu pa bitala pavua dîba kadiyi dianji kupatuka. (Nsumuinu 31:15) Pavuaye ujikija kuenzela bena dîku diende musabu, uvua mua kuya kushiya bana bende ba balume mu kalasa ku sunagoga. Bana bende ba bakaji bavua bashala kumbelu bua kulonga malu avua akengela bua kuluabu bakaji ba tshitembu.

Mamu ne bana bende ba bakaji bavua batuadija ne midimu ya nzubu bu mudi: kuela mafuta mu miendu (1), kukomba mu nzubu (2), ne kukama mabele a mbuji wabu (3). Pashishe, bavua benza mampa a kudia dituku adi. Bana bavua banji bapepula ntete bua kumbusha bisota (4), pashishe bavua bayizaza pa dibue dia mpelu bua kuenza bukula (5). Mamu uvua usambakaja bukula ne mâyi ne buanga bua mampa, ubisopa bionso pamue (6) ne pashishe ubilekela bienda bibanda eku wenda wenza midimu mikuabu ya mu nzubu. Dîba adi, bana bavua benda bavundakaja bikole mabele a mbuji bua kuenza fromaje (7).

Pavua dîba dibanda, mamu ne bana bende ba bakaji bavua baya mu tshisalu. Mu tshisalu muvua mipuya ya bintu bia kulengeja nabi biseki, miadi ya nyama, mitoyi ya bantu bavua bakokangana mishinga ya bintu. Uvua usumba bintu bivua bikengela bua dituku adi (8). Bavua mua kusumba bisekiseki, midioko ne mishipa miume. Yeye muikale muena Kristo, uvua kabidi mua kuakula ne bantu bakuabu malu a Nzambi mu tshisalu amu.​—Bienzedi 17:17.

Mamu muimpe uvua wenda ulongesha bana bende mikenji ya Nzambi mu njila pavuabu baya anyi bafuma mu tshisalu. (Dutelonome 6:6, 7) Uvua kabidi mua kuyukila ne bana bende malu avua mua kubambuluisha bua kutula makuta bimpe.​—Nsumuinu 31:14, 18.

Mudimu mukuabu uvua ba mamu benza dituku dionso uvua wa kuya ku tshîna tshia mâyi (9). Bavua basuna mâyi buuja mu bintu bionso bivuabu baalamina, pamuapa bayikila ne bakaji bakuabu bavua balue pabu kusuna mâyi. Pavua mamu ne bana bende bapingana kumbelu, bavua batuadija kuosha mampa. Bangabanga, bavua bakosa pate, bamulandakaja, bamuteka pa malata pashishe bamuela mu mfulu mumana kuela mudilu (10). Mfulu eu uvua nangananga muibakila pambelu. Bavua benda bayukila eku bumvua mupuya muimpe wa mampa ne baatangila bua kumanya ni mmabobe.

Pashishe bavua baya kusukula bilamba ku musulu wa pabuipi (11). Bavua banji basukula bilamba ne nsabanga mienza ne butue bua mitshi kampanda. Bavua babisampulula, babikama ne babianyika ku bisuku ne pa mabue pabuipi ne musulu.

 Pavua mamu ne bana bende bapingana ne bilamba kumbelu, bavua baya kusomba pa mutu pa nzubu bua kutela (12) bilamba bionso bivua bipandike kumpala kua kubipingaja mu kabadi. Pashishe mamu uvua mua kulongesha bansongakaji mua kuela desen pa bilamba (13). Dîba divua dikumbana bua ba mamu kutuadija kulamba biakudia bia dilolo (14). Bena Yuda bavua ne tshilele tshia kuakidila benyi. Ke bualu kayi bavua badia pamue ne muntu yonso uvua ulua kuabu biakudia bu mudi: diampa ne bisekiseki ne fromaje ne mishipa miume ne banua mâyi matalala.

Patuvua tufika dilolo, bana bavua badilongolola bua kuya kulala, mamu uvua ulaba bavua batapike mputa mu binu mafuta. Pashishe baledi bavua mua kulondela bana babu miyiki ya mu Bible basombele ku bukenke bua muendu ne ku ndekelu, bavua benza disambila. Pavua bana baya kulala, tatu uvua mua kutumbisha mukajende bua malu onso adiye muenze wamba ne: ‘Udi mua kupeta mukaji wa tshikadilu tshimpe nganyi? Bulengele buende budi butamba mabue a bilenga mushinga mukole.’​—Nsumuinu 31:10.

Kusungula “luseke ludi luimpe” Kakuyi mpata, bakaji ba tshitembu ba mu tshikondo tshia Yezu bavua ne ‘midimu ya bungi’ ivuabu benza. (Luka 10:40) Bia muomumue, lelu bantu bakaji nangananga ba mamu batu ne midimu ya bungi ya kuenza. Bintu bidibu bapatule lelu mbibapepejile imue midimu. Kadi ba mamu ba bungi batu badisangana mu nsombelu udi ubalomba bua kutangila bena mu dîku diabu ne kuenza kabidi mudimu muaba mukuabu.

Nansha mudi bakaji bena Kristo bapeta ntatu lelu, ba bungi badi bidikija tshilejilu tshia Mariya tshitudi batuadije natshi tshiena-bualu etshi. Badi bangata malu a Nzambi ne mushinga wa bungi. (Matayo 5:3) Badi batangila bena mu mêku abu bimpe amu mudi Mukanda wa Nzambi ubalomba bua kuenza. (Nsumuinu 31:11-31) Kadi badi batumikila kabidi mêyi avua Yezu muambile Mâta. Muvuaye mukaji uvua munange Nzambi, kakuyi mpata wakatumikila mubelu muimpe au. Bakaji bena Kristo kabatu balekela midimu ya nzubu ibapangisha bua kulonga malu a Nzambi (15) anyi kualongesha bantu bakuabu to. (Matayo 24:14; Ebelu 10:24, 25) Padibu benza nunku badi baleja mudibu basungule “luseke ludi luimpe.” (Luka 10:42) Ke bualu kayi badi basankisha Nzambi ne Kristo ne bena mu mêku abu.​—Nsumuinu 18:22.