Mmunyi mutu Nzambi umona maluvu makole?

MUFUKI wetu mmusue bua tuikale ne diakalenga, kena utukandika bua kunua maluvu pa nnuinu to. * Kadi mmupeshe bantu “maluvu a mvinyo bua kubasankisha, ne mafuta bua kukenkesha mpala yabu, ne diampa bua kubapesha bukole.” (Musambu 104:15, MMV) Dimue dituku Yezu Kristo wakasankisha bantu pavuaye mukudimune mâyi malue ‘mvinyo muimpe’ mu fete wa dibaka.​—Yone 2:3-10.

Mbikumbane bua kuamba ne: Mufuki wetu mmumanye bimpe menemene mudi maluvu mua kunyanga mubidi wetu ne buongo buetu. ‘Udi utuyisha bua tuikale ne diakalengele’ ku diambuluisha dia Bible ne udi utubela bikole bua kulekela bunuavi. (Yeshaya 48:17) Mona malu adiye utuambila aa:

‘Kanukuatshiki maluvu, mudi dinyanguka dia muoyo munda muawu.’ (Efeso 5:18) ‘Bakuatshiki ba maluvu kabena bapiana bukalenge bua Nzambi.’ (1 Kolinto 6:9-11) Dîyi dia Nzambi didi dikandika ‘bunuavi ne budiavi ne malu makuabu mafuanangane ne aa.’​—Galatia 5:19-21, Muanda Mulenga Lelu.

Tumonayi mpindieu imue njiwu idi ifumina ku dinua maluvu a bungi.

Njiwu ya dinua maluvu dipitshisha

Nansha mudi maluvu mua kutuenzela amue malu mimpe, munda muawu mudi bintu bidi mua kunyanga lungenyi luetu ne mubidi wetu. Kunua maluvu a bungi kudi mua kutukebela imue ya ku ntatu idi ilonda eyi:

Kunua maluvu kupitshisha kudi kunyanga lungenyi lua muntu, kufikisha ‘lungenyi luende ne miaku yende ku ditshiompakana.’ (Nsumuinu 23:33, MMV) Allen, kanuayi utuvua batele mu tshiena-bualu tshishale udi wamba ne: “Bunuavi kabuena busamisha anu mubidi to, kadi budi bunyanga meji a muntu. Kuena nansha mua kuela meji mudi bualu ebu bukengesha bakuabu to.”

 Kunua maluvu kupitshisha kudi kabidi mua kufikisha muntu ku dienza malu ne dikamakama. Bible udi wamba ne: ‘Maluvu ne mvinyo mipiamipia bidi biumbusha meji a mu mutshima.’ (Hoshea 4:11) Mushindu kayi? Padi muntu munue, udi utuadija kumona malu atu bantu bamona ne: mmabi bu mimpe anyi amusankisha. Udi mua kutekesha dipangadika diende dia kuenza malu makane. Maluvu adi mua kutekesha dipangadika dietu dia kubenga malu mabi ne bualu ebu budi mua kunyanga malanda etu ne Nzambi.

Tuangate tshilejilu tshia John. Uvua mutandangane ne mukajende, ke kuyayi mu bar bua tshiji. Ukavua mulabule tuluvu bua kutuyisha tshiji pakalua muntu mukaji mukuabu kudiye. Yeye mumane kusakidila tukuabu, wakashala nende ne kuendaye nende. Pashishe John wakanyingalala bikole muvuaye muenze bualu buvuaye kayi mua kuenza bu maluvu kaayi manyange lungenyi luende.

Kunua maluvu a bungi kudi mua kufikisha muntu ku diakula buakulavi ne kuenza malu a bundu. Bible udi ukonka ne: ‘Mbantu kayi badi batuta dikasa dibi, basomba ne tunyinganyinga? Mbantu badi banua mvinyo dîba dionso, bakeba kabidi ne maluvu masambakaja.’ (Nsumuinu 23:29, 30, MMM) Dikuatshika maluvu didi mua kufikisha muntu ku ‘didimona bu muntu mulale pankatshi pa mâyi manene, bu muntu ku lusongo lua mutshi wa tshilamba tshia kuendesha natshi buatu.’ (Nsumuinu 23:34, MMM) Muntu udi mukuatshike maluvu udi mua kubika ‘bamukume, kadi kayi umanya bualu.’​—Nsumuinu 23:35.

Kukuatshika maluvu kudi mua kunyanga mubidi wa muntu. ‘Ku nshikidilu neudiumvue bu muntu musuma kudi nyoka, muela lulengu mu mubidi kudi nyoka wa ntoka.’ (Nsumuinu 23:32, MMV) Baminganga badi bajadika mudi mêyi a mu Bible aa malelela. Padi maluvu a bungi mu mubidi, adi alua lulengu ludi mua kufikisha muntu ku dipeta masama mavule bu mudi a kansere ka mishindu mishilashilangane, a mutshima (siroze ne epatite), a kanyonga, a diabete, a mioyo ne bana badi baledibua ne masama. Kunua kupitshisha kudi kabidi mua kufikisha muntu ku dipunga ne lufu anyi kufuilamu. Kadi njiwu mitambe bunene idi mu bunuavi ki ngidi mubidi wetu upeta to.

Njiwu mitambe bunene. Nansha muntu kayi unua ukuatshika, yeye unua bikole, malanda ende ne Nzambi adi mua kunyanguka. Bible udi wamba ne: ‘Mulawu wikale kudi bantu badi bajuka patshiatshia bua kuya kukeba  maluvu makole, kudi bantu badi batabale too ne munda mua butuku, too ne palua maluvu kutemesha mitshima yabu!’ Bua tshinyi? Yeshaya udi uleja bubi bua kunua maluvu bikole wamba ne: ‘Kabena belangana meji a bienzedi bia Yehowa, kabena bamona mudimu udiye wenza ne bianza biende.’​—Yeshaya 5:11, 12.

Dîyi dia Nzambi didi ditukandika bua kusomba ‘munkatshi mua banu ba maluvu.’ (Nsumuinu 23:20) Bible udi ubela bantu bakaji bakulumpe bua kabikadi ‘bapika ba maluvu.’ (Tito 2:3) Bua tshinyi? Bualu muntu utu unua maluvu misangu ya bungi utu ku kakese ku kakese wenda ubandisha bungi butuye unua kayi mumanye to. Mu kupita kua matuku munu wa maluvu udi mua “kulala tshitabela wamba ne: ‘Pandi njuka, nendabule kabidi makuabu!’” (Nsumuinu 23:35, MMV) Banu ba maluvu batu batata bualu batu bajinga bikole kunua maluvu mu dinda bua kutendula avuabu bakuatshike butuku.

Bible udi utudimuija ne: bantu badi baditue mu ‘dikuatshika dia maluvu, mu manaya a bundu, mu tshingu tshia banu ba maluvu, bobu nebabadile malu abu kudiye udi udilongolola bua kulumbuluisha badi ne muoyo ne badi bafue.’ (1 Petelo 4:3, 5) Yezu wakamba bua tshikondo tshietu etshi ne: “Dimukayi! Kanubuelakanyi amu mu bibilu, mu bunuavi, ne mu ntatu ya panu. Bualu dituku didibu bakosa nsambu ya bantu didi mua kunujikidila diakamue, bu mudi buteyi bukuata nyama.”​—Luka 21:34, 35, MMV.

Kadi tshidi bakanuayi mua kuenza ntshinyi bua kulekela “bunuavi”?

[Mêyi adi kuinshi]

[Bimfuanyi mu mabeji 4, 5]

Kunua maluvu kupitshisha kudi mua kukebela muntu ntatu mivule