UTUKU imue misangu idiumvua pebe bu George ne Emily anyi? Anu bu baledi aba, bantu ba bungi kabatu basue kumona bana babu ne malu kampanda adi ababungamija to. Baledi badi bumvua nanku bualu mbasue kukuba bana babu. Kadi nsombelu ivua mifikile baledi batudi batele kuulu eku ivua mua kubapesha mushindu wa kulongesha bana babu malu a mushinga bua kumanya mua kudiambuila bujitu. Kadi malu adibu mua kulongesha muana wa bidimu 4 ne wa bidimu 13 mmashilangane.

Umanye ne: kuakuikala ku luseke lua muanebe misangu yonso bua kumukuba ku malu adi mua kumufikila to, bualu ndekelu wa bionso muana neashiye tatuende ne mamuende bua ‘kudiambuilaye bujitu buende.’ (Galatia 6:5; Genese 2:24) Bua baledi kuambuluishabu bana bua kudiambuila majitu, badi ne bua kuikala babalongesha bua kubenga kudisankisha, bua  bikale bambuluisha bakuabu ne bua kumanya tshia kuenza pakolabu. Kabitu bitekete bua kuenza nunku to.

Kadi baledi badi mua kuidikija mushindu uvua Yezu wenzela bayidi bende malu ne ubalongesha. Yezu kavua ne bana to. Kadi pavuaye usungula bayidi bende ne ubalongesha, uvua musue kubambuluisha bua kuenza mudimu ne kutungunuka ne kuwenza nansha pavuaye upinga mu diulu. (Matayo 28:19, 20) Malu avua Yezu muenze mmafuanangane ne mudimu udi baledi benza bua kuambuluisha bana babu bua kudiambuilabu majitu. Tukonkononayi malu asatu a mu tshilejilu tshia Yezu tshidiye mushile baledi.

Matuku makese kumpala kua Yezu kufua, wakambila bayidi bende ne: “Ndi munuleje tshilejilu etshi bua nuenze penu mundi munuenzele emu.” (Yone 13:15, MMM) Baledi badi pabu ne bua kuleja bana babu tshilejilu ne kubumvuija menemene tshidibu mua kuenza bua kudiambuila majitu.

Diebeja ne: ‘Ndiku ne tshibidilu tshia kuakula mu mushindu muimpe bua mushindu undi nkumbaja midimu yanyi anyi? Ntuku ngakula bua disanka dintu mpeta pandi ngenzela bakuabu mudimu mukole anyi? Peshi ntu anu ndiabakena ne ndifuanyikija ne bantu bakuabu badi bamueneka bikale ne nsombelu muimpe?’

Tudi bamanye ne: tuetu bonso tutu tuenza bilema. Tutu imue misangu tumona ne: midimu yetu mmitupite makanda. Kadi tshilejilu tshienu ke tshiambuluisha bana benu bua kumona ne: kudiambuila majitu kudi ne mushinga.

Yezu uvua mumanye ne: matuku avua ne bua kuanji kupita kumpala kua bayidi bende kukumbana bua kuenza midimu ivuaye mutekemene kudibu. Wakabambila umue musangu ne: ‘Ntshidi ne malu makuabu a bungi a kunuambila, kadi nuenu kanuena bamanye mua kuatuala katataka.’ (Yone 16:12) Yezu kavua muambile bayidi bende bua kutuadijabu kudienzela malu diakamue to. Kadi wakangata dîba dia bungi bua kubalongesha malu mavule. Wakabatuma bua kudienzela mudimu anu pakamonaye ne: bakavua bakumbane.

Bia muomumue, ki mbimpe bua baledi kuambila bana babu bua kudiambuila majitu kumpala kua kabayi banji kukumbana to. Nansha nanku, padi bana benda bakola, baledi badi ne bua kumanya midimu idi mikumbane idibu mua kubapesha. Tshilejilu, badi ne bua kulongesha bana bua kuikala ne mankenda, kukomba anyi kukolopa muaba udibu balala, kuenza malu pa dîba ne kumanya mua kutula makuta. Padi muana ubuela mu kalasa, baledi mbasue ne: angate midimu ya mu kalasa ne mushinga wa bungi.

Baledi kabena anu ne bua kupesha muanabu midimu ya kuenza to. Kadi badi kabidi ne bua kumuambuluisha bua ayenze bimpe. George utudi batele kuulu wakamona ne: pavuaye wambila muanende Michael bua kuangula bintu bivuaye unaya nabi, uvua ufika munda bualu mudimu au uvua umueneka mumupite makanda. George udi wamba ne: “Ngakalongesha muananyi bua kuikalaye ulongolola bintu bivuaye unaya nabi pamutu pa kumukanyina.”

Tshivua George muenze ntshinyi? Udi wamba ne: “Ngakanji kuteka dîba disunguluke bua kuangula bintu bia kunaya nabi dilolo dionso. Pashishe, tuakatuadija kubiangula nende ku ndambu ku ndambu. Ngakavuija mudimu au bu dinaya, tuelangana bua kumona uvua ubiangula lukasa mupite mukuabu. Tuakalua ne tshibidilu tshia kunaya dinaya edi kumpala kua kulala. Ngakamuambila ne: yeye mubiangule lukasa, mvua ne bua kumubadila muanu mukuabu kumpala kua kulalaye. Kadi yeye kayi mujikije lukasa, ntshivua mubadila muanu mujima to.”

Anu bu mulongeshi muimpe yonso, Yezu uvua mumanye ne: bua muntu kumanyaye bualu kampanda bimpe udi ne bua kuikala ubuenza. Tshilejilu, pakamona Yezu ne: bayidi bende bavua bakumbane, wakabatuma ‘kumpala kuende ku babidi ku babidi mu misoko yonso ne mu miaba yonso, yakadiye wamba kuya.’ (Luka 10:1) Kadi kakabatuma patupu to. Kumpala kua kubatumaye, wakabambila tshia kuenza. (Luka 10:2-12) Pakapingana bayidi ne kumulondelabu malu mimpe avuabu bapete, wakabela kalumbandi ne wakabakankamija. (Luka 10:17-24) Wakabaleja muvuaye ubeyemena ne ubanyisha.

Padi bana bebe batuilangana ne midimu mikole, utu wenza tshinyi? Utu ukeba bua kubepula ku midimu idi ibenza buôwa, idibu kabayi mua kukokesha ne idi mua kubatekesha mu mikolo anyi? Muoyo udi mua kukusaka bua kuepula muanebe ku midimu eyi anyi bua wewe kuyenza nkayebe.

Kadi anji elabi meji: Misangu yonso iudi usumpakana bua kuepula bana bebe mu mushindu kampanda anyi kansanga, ntshinyi tshiudi ubalongesha? Udiku uleja ne: udi ubeyemena ne udi mutuishibue ne: mbakumbane bua kuenza malu kampanda anyi? Peshi malu audi wenza adi abaleja ne: utshidi ubamona bu bana bakese badi kabayi mua kuenza bualu bua nsongo wewe kuyipu?

Tshilejilu, ntshinyi tshivua Emily utuvua batele kuulu muenze pavua muanende mupete lutatu? Pamutu pa kudibuejaye mu tshilumbu atshi, wakambila muanende bua aye kuyukila ne mulongeshi wabu. Yeye ne muanende bakafunda nkonko ivuaye ne bua kuela mulongeshi pa dibeji. Pashishe, bakayukila bua dîba divuaye ne bua kumonangana ne mulongeshi wabu. Bakambulula too ne mushindu uvua muana mua kuyukila ne mulongeshi wabu. Emily udi wamba ne: “Jenny wanyi wakapeta dikima dia kuyukila ne mulongeshi wabu ne mulongeshi kumuelaye kalumbandi bua tshivuaye muenze atshi. Jenny wakadiumvua bimpe bua bualu abu ne meme panyi ngakasanka bua muananyi.”

Wewe muikale anu wepula bana bebe ku ntatu idi imueneka, udi mua kubapangisha bua kumanya mua kutantamena ntatu yabafikila. Kadi balongesha bua bamanye tshia kuenza. Wewe muenze nunku udi ubapesha tshintu tshia mushinga mukole menemene.