Anyisha bua kulonga Dîyi dia Nzambi

Bua tshinyi kulongela malu kudi Nzambi?

Tshiena-bualu etshi tshidi tshiandamuna nkonko iukadi pamuapa mudiele ne tshileja muaba uudi mua kupetela mandamuna mu Bible webe. Bantemu ba Yehowa nebikale ne disanka dia kuyukila nebe pa mandamuna aa.

1. Bua tshinyi kulongela malu kudi Nzambi?

Nzambi udi ne lumu luimpe lua bualu butambe buimpe budiye mulongoluela bantu. Udi utuambila nalu mu Bible. Bible udi bu mukanda udi Tatuetu wa dinanga udi mu diulu mututumine.​—Bala Yelemiya 29:11.

2. Ndumu luimpe kayi alu?

Bantu badi dijinga ne mbulamatadi muimpe. Mukokeshi nansha umue katu muanji kujikijila bantu tshikisu, kansungansunga, masama anyi lufu to. Kadi kudi lumu luimpe. Nzambi neapeshe bantu mbulamatadi muimpe walua kutumbushila malu onso adi atukebela makenga.​—Bala Danyele 2:44.

3. Bua tshinyi mbimpe kulongela malu kudi Nzambi?

Nzambi ukadi pa kubutula bantu badi bakebesha makenga pa buloba. Bua mpindieu, udi ulongesha miliyo ya bantu bena bupuekela bua kupeta nsombelu mutambe buimpe muashila pa dinanga. Dîyi dia Nzambi didi diambuluisha bantu bua kumanya mua kupita ne ntatu, kupeta ditalala dia bushuwa ne kusankisha Nzambi.​—Bala Sefanya 2:3.

  4. Muena Bible nganyi?

Bible mmuenza ne mikanda mikese 66. Bakamufunda kudi bantu 40. Mose ke wakafunda mikanda itanu ya ntuadijilu kukadi mpindieu bidimu bitue ku 3 500. Mupostolo Yone ke wakafunda wa ndekelu kukadi bidimu bipite pa 1 900. Malu avua bantu abu bafunde kaavua abu to, avua a Nzambi. Nunku, Nzambi ke Muena Bible.​—Bala 2 Timote 3:16; 2 Petelo 1:21.

Tudi bajadike ne: Bible mMukanda wa Nzambi bualu udi udianjila kutuambila bimpe muikale matuku atshilualua, bualu budi muntu kayi mua kuenza nansha. (Yeshaya 46:9, 10) Bible udi kabidi utuleja ngikadilu ya Nzambi. Udi ne bukole bua kulengeja nsombelu ya bantu. Malu aa adi afikisha miliyo ya bantu ku ditaba ne: Bible udi Dîyi dia Nzambi.​—Bala Yoshua 23:14; 1 Tesalonike 2:13.

5. Udi mua kumvua Bible bishi?

Yezu wakamanyika bikole bualu uvua ulongesha Dîyi dia Nzambi. Nansha muvua bantu ba bungi bavuaye ulongesha bamanye Bible, bavua dijinga ne muntu uvua mua kubambuluisha bua kumumvua. Bua kubambuluisha, Yezu uvua ubabadila mvese, umbumvuija ne ‘ubajinguluila Mukanda wa Nzambi.’ Tshiena-bualu tshia “Anyisha bua kulonga Dîyi dia Nzambi” etshi, netshikuambuluishe mu mushindu wa muomumue.​—Bala Luka 24:27, 45.

Kumanya tshipatshila tshia muoyo wetu mbumue bua ku malu makese atu atusankisha bikole atudi ne bua kulongela kudi Nzambi. Kadi bamue bantu kabakusanka padibu bakumona ubala Bible to. Kabikutekeshi to. Bua wewe kupeta muoyo wa kashidi, anu wewe mulonge bua kumanya Nzambi.​—Bala Matayo 5:10-12; Yone 17:3.

Bua kumanya malu makuabu, bala nshapita 2 wa mukanda Bible utu ulongesha tshinyi menemene? mupatule kudi Bantemu ba Yehowa.