Malu atudi tumanyina kudi Yezu

Malu adi banjelu mua kutuenzela

Yezu uvua ne Tatuende mu diulu ‘diambedi buloba kabuyiku.’ (Yone 17:5) Nunku mmukumbane bua kuandamuna nkonko idi ilonda eyi:

Banjelu batuku baditatshisha bua bualu buetu anyi?

▪ Yezu udi utulongesha ne: banjelu batu baditatshisha bikole bua bantu. Wakamba ne: ‘Disanka didi ku mêsu kua banjelu ba Nzambi bualu bua muntu umue mubi wakukudimuna mutshima wende.’​—Luka 15:10.

Yezu wakaleja ne: banjelu batu ne mudimu wa kuambuluisha batendeledi ba Nzambi bua balama malanda abu nende. Nunku, pavua Yezu udimuija bayidi bende bua kubenga kulenduisha bakuabu, wakabambila ne: ‘Nudimuke, kanulenguludi muana umue wa mu bana aba bakese; ndi nuambila ne, mu diulu matuku onso banjelu babu batu batangila Tatu wanyi udi mu diulu ku mêsu.’ (Matayo 18:10) Pavua Yezu muambe mêyi aa, kavua anu usua kuleja ne: muyidi wende yonso uvua ne muanjelu uvua umulama to. Kadi uvua uleja ne: banjelu batu benza mudimu pabuipi ne Nzambi batu baditatshisha bikole bua bena Kristo balelela.

 Mmunyi mudi Diabolo mua kutuenzela bibi?

▪ Yezu wakadimuija bayidi bende ne: Satana uvua ukeba bua bantu badi balonga bulelela budi butangila Nzambi balekele. Wakamba ne: ‘Pumvua muntu dîyi dia bukalenge bua mu diulu kayi mudijingulule, pashishe, mubi udi ulua, udi unyenga bualu buakumiaminabu mu mutshima wende.’​—Matayo 13:19.

Yezu wakaleja mushindu umue utu Satana ushima nawu bantu pakapeshaye bantu tshilejilu tshia muntu uvua mukuna mponda mu budimi buende. Muntu eu uvua uleja Yezu ne mponda ivua ileja bena Kristo balelela bakokesha nende mu diulu. Nunku Yezu kuamba ne: muluishi wakalua ne ‘kuela ntete ya lupela muakamanabu kuela mponda.’ Lupela ludi luleja bena Kristo ba dishima. ‘Muena lukuna wakalukuna ke Diabolo.’ (Matayo 13:25, 39) Anu mutu lupela lufuanangane ne mponda padilu lutoloka, ke mutu bena Kristo ba dishima mua kumueneka bu bena Kristo balelela. Bitendelelu bidi bilongesha malongesha a dishima bidi bipangisha bantu bua kumikila Nzambi. Satana udi upangisha bantu bua kudia bulunda ne Nzambi ku diambuluisha dia bitendelelu bia dishima.

Mmushindu kayi utudi mua kupangisha Satana bua katuenzedi bibi?

▪ Yezu wakabikila Satana ne: “Mukokeshi wa buloba.” (Yone 14:30) Wakaleja kabidi mu disambila tshitudi mua kuenza bua Satana katuenzedi bibi. Wakasambila Tatuende wa mu diulu bua bayidi bende ne: ‘Ubasungile kudi mubi. Bobu kabena ba pa buloba, bu mundi meme tshiyi wa pa buloba. Ubajidile mu bulelela, dîyi diebe mbulelela.’ (Yone 17:15-17) Kumanya Dîyi dia Nzambi kudi kutulama bua bantu babi ba pa buloba ebu budi Satana ulombolola kabatunyangi.

Mmunyi mudi malu adi banjelu benza atutangila lelu?

▪ Yezu wakamba ne: ‘Ku nshikidilu kua tshikondo etshi, banjelu nebalue, nebumushe bantu babi bakadi munkatshi mua bantu bakane.’ (Matayo 13:49) Tudi mpindieu ‘ku nshikidilu kua tshikondo etshi’ ne bantu miliyo mivule badi bitaba lumu lua Bukalenge bua Nzambi.​—Matayo 24:3, 14.

Kadi ki bonso badi batuadija kulonga Dîyi dia Nzambi badi Nzambi wanyisha to. Banjelu badi balombola mudimu udi batendeledi ba Yehowa benza, ne bantu badi banange Nzambi ne muoyo umue kabena babuelakana ne badi babenga kutumikila malu adibu balonga to. Yezu wakamba bua bantu badi Nzambi wanyisha ne: ‘Mbakumvua dîyi mu mitshima mimpe ne ya kalolo, badi badilama bikole, badi bavudija maminu bua dinanukila diabu.’​—Luka 8:15.

Bua kumanya malu makuabu, bala nshapita wa 10 wa mukanda Bible utu ulongesha tshinyi menemene? mupatula kudi Bantemu ba Yehowa

[Tshimfuanyi mu dibeji 16]

Banjelu badi bambuluisha bua kusangisha bantu bimpe munkatshi mua bena Kristo balelela