PATSHIVUA muanebe utuadijilaku dienda, kuvuaku umukuba ku bintu bivua mua kumukebela njiwu kumbelu kuebe anyi? Imue misangu, uvua ujika miaba itubu bashila nshinga ya nzembu, umumbushila bintu bivua mua kumutapa ne ujika njila wa ku bibandilu bia mu nzubu. Uvua wenza bionso ebi anu bua kukuba muanebe.

Ke mudibi kabidi mua kuikala bipepele mua kulama muanebe ukadi tshitende anyi? Mpindieu, udi mua kuikala udikonka ne: ‘Muananyi wa balume eu utuku utangila bindidimbi bia bantu butaka anyi?’ ‘Muananyi wa bakaji eu utuku utuminangana foto ya malu a busenji mikale ya bitupa bia mubidi wende mu telefone anyi?’ Kadi udi mua kutamba kudikonka ne: ‘Muananyi utuku mutambe kunanga bilela bia busenji anyi?’

Bamue baledi batu baditatshisha butuku ne munya bua kulondolola malu onso adi bana babu benza. Baledi ba bungi bakalua kumona ne: kulondakaja bana nunku kudi kubasaka bua kulua bapiluke mu disokoka bikadilu bibi bivuabu babakandike.

Mu bulelela, kulondolola bana ki nkudi ne bualu to. Nansha Yehowa Nzambi muine katu wenzeja bantu mushindu eu bua kushishabu kumutumikila to; ke tshidi baledi pabu ne bua kuenza. (Dutelonome 30:19) Kadi mmushindu kayi uudi mua kuambuluisha bana bebe bua kusungulabu ne meji bikadilu bilenga?​—Nsumuinu 27:11.

Mushindu muimpe ngua kuikala kuyikila nabu pa tshibidilu ne kutuadija nabu anu ku buana buabu. * (Nsumuinu 22:6) Nanku, padibu balua bitende, utungunuke anu ne kuyukila nabu. Bu muudi muledi, wewe ke udi ne bua kuambila muaneba utshidi tshitenda malu onso patoke anu mutuwu. Alicia, nsongakaji wa mu Grande-Bretagne udi wamba ne: “Bantu ba bungi batu bamba ne: tudi mua kuyukila malu a balume ne bakaji ne balunda betu;  kadi ki mmuomu to. Tudi tuanyisha malu aa padi baledi betu batuambilawu. Netuitabe malu atuambilabu.”

Padi bana benda bakola, badi bajinga kumanya malu a bungi pa bitupa bia lulelu kupita dimanya patupu mutu muntu wimita ne ulela. Bana badi kabidi ne bua kuikala ne ‘meji abu mibidija a kujingulula nawu tshidi tshimpe ne tshidi tshibi.’ (Ebelu 5:14) Mu tshikoso, badi bajinga kumanya bimpe menemene mushindu muimpe wa kuenza mudimu ne bitupa bia lulelu ne mbasue kuutumikila mu nsombelu wabu. Mmunyi muudi mua kulongesha bana bebe bikadilu bilenga?

Wewe muine wanji kuikala tshilejilu tshimpe. Tshilejilu, udi mua kuikala witaba ne muoyo mujima ne: dipentangana pankatshi pa bantu badi kabayi baselangane ndibi. (1 Tesalonike 4:3) Imue misangu bana bebe mbamanye muenenu webe pa tshilumbu etshi, badi nansha mua kutela mvese ya mu Bible idi ijadika bualu ebu. Bobu babele nkonko, badi mua kuandamuna ne lukasa luonso ne: kumanyangana kumpala kua kubuela mu dibaka nkubi.

Kadi ki nkujike to. Mukanda mukuabu udi uleja mudi bamue bansonga bamba mudibu bitaba malu adi baledi babu babambila bua bitupa bia lulelu. Udi wamba ne: “Badi badimona kabayi bakumbane mua kufila wabu muenenu pa tshilumbu etshi. Padi bualu kampanda budi butangila tshidi tshimpe ne tshidi tshibi bubafikila, badi batuadija kuelakana ne bapanga tshia kuenza.” (Sex Smart) Etshi ke tshikondo tshidi bikadilu bimpe ne mushinga menemene. Mmunyi muudi mua kulongesha muanebe bikadilu bilenga?

Leja bana bikadilu bilenga patoke.

Udiku mutuishibue ne: anu mulume ne mukajende ke badi ne bua kumanyangana anyi? Nanku ikala wambila bana bebe bualu ebu patoke misangu yonso. Bilondeshile mukanda kampanda, makebulula adi aleja ne: “mu mêku mudi baledi bambila bana babu patoke mudibu kabayi basue bua bobu kuenda masandi, bana ba nunku batu pamuapa mua kulua kubuelakana mu tshiendenda tshia masandi pashishe.”​—Beyond the Big Talk.

Bushuwa, anu mutukadi baleje, kuambila patupu bana bebe bikadilu bimpe patoke kakuena anu kuleja ne: nebabitumikile mu nsombelu wabu to. Kadi, kubalongesha bimpe ne mueba muonso bikadilu bilenga biudi musue bua bikale nabi nekuikale tshishimikidi tshiabambuluisha mu nsombelu wabu. Makebulula mmaleje ne: ndekelu wa bionso, bana ba bungi batu balua kulonda bikadilu bia baledi babu nansha mudibi bimueneka ne: kabavua babilonda patshivuabu bitende to.

Balongeshe patoke malu onso adi atangila bitupa bia lulelu.

Bidi bikengela kubadimuija. (1 Kolinto 6:18; Yakobo 1:14, 15) Mu bulelela, Bible utu wamba ne: dimanyangana dia mulume ne mukajende ndipa dia Nzambi kadi ki mbuteyi bua Satana to. (Nsumuinu 5:18, 19; Musambu wa Solomo 1:2) Kuambila bana bebe anu bua bubi bua dimanyangana patupu kudi mua kubapangisha bua kumvua bimpe tshidi Bible wamba pa tshilumbu etshi. Mamu Corrina wa mu France udi wamba ne: “Baledi banyi bavua batamba kuakula anu bua bubi bua tshiendenda tshia masandi, bualu ebu buakamfikisha ku dimona dipetangana dia mulume ne mukajende bu bualu bubi.”

Ikala mutuishibue ne: bana bebe mbumvue bimpe malu adi atangila balume ne bakaji. Mamu Nadia wa mu Mexique udi wamba ne: “Tshimvua musue bua muananyi amanye ntshia ne: dimanyangana dia mulume ne mukajende mbualu buimpe budi Yehowa Nzambi mupeshe bantu pavuaye mubafuke bua kubasankisha. Kadi didi ne bua kuenzeka anu mu dibaka. Dimanyangana dia mulume ne mukajende ke didi dipetesha disanka, kadi dia bantu badi kabayi baselangane ditu dikebesha ntatu.”

 Ambuluisha bana bebe bua bamanye bubi bua tshiendenda.

Bua bana bebe kuangantabu mapangadika mimpe mu nsombelu wabu, badi ne bua kusungula tshia kuenza ne kumanya kabidi bubi ne buimpe bua tshionso tshidibu basungule atshi. Kuedi meji ne: dimanya diabu dia tshidi tshimpe ne tshidi tshibi patupu ke kudi ne bualu to. Emma, muanetu wa bakaji wa mu Australie udi wamba ne: “Pantu ngela meji bua malu mabi amvua muenze ku bunsonga, ndi mua kuamba ne: kumanya patupu mikenji ya Nzambi kakuena kumvuija ne: udi muyitabe to. Kumanya masanka adi afumina mu mikenji ya Nzambi ne ntatu idi ifumina ku dibenga kuyitumikila ke kudi ne mushinga.”

Bible udi mua kutuambuluisha bualu mikenji ya bungi idimu idi ne mêyi adi aleja patoke ntatu idi muntu upeta padiye kayi uyitumikila. Tshilejilu, mukanda wa Nsumuinu 5:8, 9 udi ulomba bansongalume bua kunyema masandi ‘bua kabafidi buneme buabu kudi bantu ba bende.’ Anu mudi mvese eyi ileja, bantu badi bamanyangana kumpala kua kubuela mu dibaka badi badinyangila lumu, bapangila bua kuenzela Nzambi mudimu bimpe ne badipuekeshisha milongo. Kuenda masandi kudi mua kunyemesha muntu wa ngikadilu mimpe uvua mua kulua kutusela peshi kuitaba bua tuetu kumusela. Padi muanebe wela meji mudi dibenga kutumikila mikenji ya Nzambi mua kunyanga mubidi, lungenyi ne malanda ende ne Nzambi, bidi mua kukolesha dipangadika diende dia kuyitumikila. *

Takao, nsongalume wa bidimu 18 wa mu Japon udi wamba ne: “Ndi mumanye ne: ndi ne bua kuenza anu malu adi mimpe, kadi ntu nduangana bikole ne majinga a mubidi.” Bansonga badi bumvua pabu mushindu eu badi mua kukoleshibua bualu kabena nkayabu to. Nansha mupostolo Paulo muena Kristo wa lulamatu wakamba ne: ‘Pandi musue kuenza bimpe, bubi budi nanyi.’​—Lomo 7:21.

Mbimpe bansonga bamanye ne: kabiena anu bibi bua kuluangana nunku to. Bidi mua kubambuluisha bua kumanya tshidibu basue kuikala mu nsombelu wabu. Bidi mua kubambuluisha bua kudiebeja ne: ‘Ndiku musue kudiangatshila malu anyi mu bianza ne kumanyika bu muntu udi ne lumu luimpe ne udi wenzela Nzambi mudimu bimpe anyi? peshi bu muntu utu musue kuenza anu tshidi muoyo wende ujinga?’ Kuikala ne bikadilu bilenga nekuambuluishe muanebe bua kuandamuna nkonko eyi ne meji.