Nkonko ya babadi

Bena Kristo bimpe bonso nebaye mu diulu anyi?

▪ Bantu ba bungi bakadiku babale mêyi a Yezu adi akolesha ku muoyo aa: ‘Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Yezu uvuaku musue kuamba ne: batendeledi bonso ba Tatuende Yehowa bavua ne bua kuya mu diulu bua kupetabu muoyo wa tshiendelele ne disanka dilelela anyi?

Tangila mêyi a Yezu adi elesha meji aa: ‘Kakuena muntu wakabanda mu diulu anu yeye wakafuma mu diulu, Muana wa muntu mene, udi biende mu diulu.’ (Yone 3:13) Ebi bidi bileja ne: batendeledi balelela Yehowa ba kale bu mudi: Noa, Abalahama, Mose ne Davidi kabavua baye mu diulu to. (Bienzedi 2:34) Kadi bonso abu bakaya penyi? Mu tshikoso, badi mu nkita bafue, kabayi bamanye bualu nansha bumue, bindile dibishibua.​—Muambi 9:5, 6; Bienzedi 24:15.

Yezu ke muntu wa kumpala uvua muleje ne: bamue bantu nebaye mu diulu panyima pa lufu luabu. Wakambila bapostolo bende ne: uvua ne bua kubalongoluela muaba mu diulu. (Yone 14:2, 3) Ebu buvua bualu buenyi kudi batendeledi ba Nzambi. Mupostolo Paulo wakalua kumvuija ne: pavua Yezu ufua, ubishibua ne uya mu diulu, uvua ‘unzuluila bayidi bende njila mupiamupia ne wa muoyo,’ njila uvua muntu nansha umue kayi muanji kuendelamu kumpala.​—Ebelu 10:19, 20, MMM.

Bualu ebu budiku bumvuija ne: kubangila anu tshikondo atshi batendeledi balelela bonso bavua ne bua kuya mu diulu anyi? Tòo, bualu dibishibua bua kuya mu diulu didi anu bua bantu bakese badi bapeshibue mudimu wa kuenzamu. Pavua Yezu musombe ne bapostolo bende musangu wa ndekelu bua ku dilolo, wakabambila ne: bavua ne bua ‘kushikama mu nkuasa ya butumbi balumbuluisha’ mu Bukalenge buende bua mu diulu. Nunku, mudimu wabu uvua wa kukokesha ne Yezu mu diulu.​—Luka 22:28-30.

Pakumbusha bapostolo bende, bantu bakuabu bavua pabu bapeshibue mudimu muimpe eu. Mu tshikena-kumona, mupostolo Yone wakamona Yezu mu diulu muikale ne tshisumbu tshia bantu bavua babishibue ku lufu badi Bible wamba mudibu ‘bukelenge ne bakuidi bua kukokesha pa buloba.’ (Buakabuluibua 3:21; 5:10) Bavua bungi kayi? Anu mutu mbulamatadi yonso muenza ne bantu bungi bukumbane, ke mudibi kabidi bua Mbulamatadi wa mu diulu. Yezu, Muana wa Mukoko wa Nzambi udi ukokesha ne bantu 144 000 “bakasumbibua munkatshi mua bantu.”​—Buakabuluibua 14:1, 4, 5.

Patudi tufuanyikija bantu bavua batendelela Nzambi ba kale ne ba lelu, tudi tumona ne: bantu 144 000 mbakese. Bualu ebu budi bumvuika bualu bantu 144 000 aba badi babishibua bua kuya mu diulu bua kuenza mudimu wa pa buawu wa tshijila. Wewe usua kuibaka nzubu, newangate bantu bonso badi bamanye kuibaka bikole ba muaba uudi musombele anyi? Tòo. Newikale dijinga anu ne bibaki bakese badi mudimu ulomba. Bia muomumue, ki mbantu bimpe bonso badi Nzambi musungule bua kubapeshe mudimu wa pa buawu wa kukokesha ne Yezu mu diulu to.

Mbulamatadi wa mu diulu neakumbaje disua divua nadi Nzambi ku ntuadijilu bua bantu bakane. Yezu ne bantu 144 000 bakokeshaye nabu nebalombole mudimu wa kuvuija buloba bujima mparadizu, muasombelabu ne disanka kudi batendeledi balelela bungi kabuyi kubala bua kashidi. (Yeshaya 45:18; Buakabuluibua 21:3, 4) Mu bantu abu nemuikale kabidi bantu badi mu meji a Nzambi bikala mua kubishibua.​—Yone 5:28, 29.

Batendeledi bonso ba Yehowa ba kale ne ba lelu nebapete dipa dimpe dia muoyo wa tshiendelele. (Lomo 6:23) Bantu bakese nebapete muoyo mu diulu bua kuenzamu mudimu wa pa buawu, kadi ba bungi nebapete muoyo pa buloba buikale mparadizu.