Anyisha bua kulonga Dîyi dia Nzambi

Nzambi mmulongolole tshinyi bua buloba?

Tshiena-bualu etshi tshidi tshijula nkonko iukadi pamuapa mudiele ne tshileja muaba uudi mua kupetela mandamuna mu Bible webe. Bantemu baYehowa nebikale ne disanka dia kuyukila nebe pa mandamuna aa.

1. Nzambi mmulongolole tshinyi bua buloba?

Nzambi mmufuke buloba bua bantu basombelapu. Yeye mumane kufuka banjelu bua bikale mu diulu, wakalua kufuka kabidi bantu bua basombele bobu pa buloba. (Yobo 38:4, 7) Nanku Yehowa wakateka mulume wa kumpala mu mparadizu mulenga udibu babikila ne: Edene, ne kumupesha yeye ne bana bavuaye mua kulela pashishe diakalenga dia kuikala ne muoyo kashidi pa buloba apa.​—Genese 2:15-17; bala Musambu wa 115:16.

Budimi bua Edene buvua anu kamuaba kakese pa buloba. Adama ne Eva, bena dibaka ba kumpala aba bavua ne bua kulela bana. Pavua bantu benda bavulangana pa buloba, bavua ne bua kuikala babudima bua kubuvuija mparadizu. (Genese 1:28) Kabakubutula buloba buetu ebu to.​—Bala Musambu wa 104:5.

2. Bua tshinyi lelu buloba kabuena mparadizu?

Adama ne Eva bakatombokela Nzambi, ke Nzambi kubipataye mu Edene. Nunku, mparadizu wakajimina ne kakuena muntu udi mukokeshe bua kumupingaja kabidi to. Mukanda wa Nzambi udi wamba ne: ‘Buloba mbufidibue mu bianza bia bantu babi.’​—Yobo 9:24; bala Genese 3:23, 24.

Yehowa ki mmupue bualu buvuaye mulongoluele bantu katshia ku tshibangidilu muoyo to. Malu atuye wamba atu anu akumbana. (Yeshaya 45:18) Neapingaje bantu mu nsombelu uvuaye musue bua bikale nende.​—Bala Musambu wa 37:11.

3. Mmunyi muikale Nzambi mua kufila ditalala pa buloba?

Bua bantu kuikalabu ne ditalala, Nzambi neanji kubutula bantu babi. Ku mvita ya Armagedone banjelu ba Nzambi nebabutule bantu badi babenga bua kumutumikila. Nebakuate Satana bua bidimu 1 000, kadi bantu badi banange Nzambi nebapanduke bua kuikala ne muoyo mu bulongolodi bupiabupia.​—Bala Buakabuluibua 16:14, 16; 20:1-3; 21:3, 4.

  4. Makenga neajike dîba kayi?

Munkatshi mua bidimu tshinunu, Yezu neakokeshe buloba musombele mu diulu ne neabuvuije mparadizu. Neajimijile kabidi bantu bonso badi banange Nzambi mibi yabu. Yezu neajikije masama, bukulakaja ne lufu.​—Bala Yeshaya 11:9; 25:8; 33:24; 35:1.

Kadi ndîba kayi diajikija Nzambi malu mabi pa buloba? Yezu wakafila “tshimanyinu” tshidi tshileja ne: nshikidilu ukadi pabuipi. Malu adi enzeka pa buloba lelu adi akebela bantu ntatu, adi kabidi aleja ne: tukadi ‘ku nshikidilu kua tshikondo etshi.’​—Bala Matayo 24:3, 7-14, 21, 22; 2 Timote 3:1-5.

5. Wabuela mu mparadizu nnganyi?

Yezu wakambila bayidi bende bua kuvuija bantu bakuabu bayidi ne kubalongesha malu adi aleja ne: Nzambi mmunange bantu. (Matayo 28:19, 20) Lelu pa buloba bujima, Yehowa udi wenda ulongolola bantu miliyo ne miliyo bua kupetabu muoyo mu bulongolodi bupiabupia. (Sefanya 2:3) Ku Nzubu wa Bukalenge wa Bantemu ba Yehowa, bantu batu balonga mushindu wa kuikala balume ne batatu ba tshitembu anyi bakaji ne bamamu ba tshitembu. Baledi ne bana badi balongamu malu adi akengela kuenza bua kutekemena muoyo wa kashidi udi mutuindile kumpala eku.​—Bala Mika 4:1-4.

Ku Nzubu wa Bukalenge, neupetangane ne bantu badi banange Nzambi ne basue kuenza malu adi amusankisha.​—Bala Ebelu 10:24, 25.

Bua kumanya malu makuabu, bala nshapita 3 wa mukanda, Bible utu ulongesha tshinyi menemene?, mupatula kudi Bantemu ba Yehowa.