Anyisha bua kulonga Dîyi dia Nzambi

Mmunyi muudi mua kumanya tshitendelelu tshilelela?

Tshiena-bualu etshi tshidi tshijula nkonko iukadi pamuapa mudiele ne tshileja muaba uudi mua kupetela mandamuna mu Bible webe. Bantemu ba Yehowa nebikale ne disanka dia kuyukila nebe pa mandamuna aa.

1. Kudi anu tshitendelelu tshimue tshilelela anyi?

Yezu wakalongesha bayidi bende anu bua tshitendelelu tshimue tshidi tshilelela. Ntshienza anu bu njila udi ufikisha ku muoyo wa kashidi. Yezu wakamba bua njila au ne: “bantu banya-banya badi bamumona.” (Matayo 7:14) Nzambi udi witaba anu tshitendelelu tshidi tshiangatshila malongesha mu Dîyi diende dia bulelela. Batendeledi balelela bonso mbakunguija mu buobumue kudi ditabuja dimue.​—Bala Yone 4:23, 24; 14:6; Efeso 4:4, 5.

2. Bua tshinyi kudi bitendelelu bia bungi bidi bidiamba mudibi bia bena Kristo?

Baprofete ba dishima mbanyange buena Kristo ne mbenza nabu mudimu anu bua disanka diabu. Anu mukavua Yezu wambe, badi badileja bu “mikoko” kadi benza malu bu nkashama idi ikempakana ne nzala. (Matayo 7:13-15, 21, 23) Buena Kristo bua dishima buakatuadija nangananga panyima pa lufu lua bapostolo ba Yezu.​—Bala Bienzedi 20:29, 30.

3. Mbimue bimanyinu kayi bidi bileja ne: tshitendelelu etshi tshilelela?

Batendeledi balelela badi banemeka Bible udi Dîyi dia Nzambi. Badi baditatshisha bua kutumikila mibelu idimu. Nanku, tshitendelelu tshilelela ntshishilangane ne tshitendelelu tshidi tshilongesha ngenyi ya bantu. (Matayo 15:7-9) Batendeledi balelela kabena bayisha bantu malu makuabu kadi bobu benza a tshianana to.​—Bala Yone 17:17; 2 Timote 3:16, 17.

Tshitendelelu tshilelela tshidi tshinemeka Dîna dia Nzambi, Yehowa. Yezu wakamanyisha dîna dia Nzambi. Wakambuluisha bantu bua kumanya Nzambi ne kubalongeshaye bua kusambila bua dîna dia Nzambi ditumbishibue. (Matayo 6:9) Ntshitendelelu kayi tshidi tshimanyisha bantu dîna dia Nzambi muaba uudi musombela au?​—Bala Yone 17:26; Lomo 10:13, 14.

  4. Mmunyi muudi mua kumanya batendeledi balelela?

Batendeledi balelela badi bayisha bua Bukalenge bua Nzambi. Nzambi wakatuma Yezu bua kuyishaye malu a Bukalenge buende. Bukalenge bua Nzambi ke ditekemena dimuepele bua bantu. Yezu wakatungunuka ne kuakula bua Bukalenge ebu too ne dituku dia lufu luende. (Luka 4:43; 8:1; 23:42, 43) Wakambila bayidi bende bua bayishe malu a Bukalenge bua Nzambi. Muntu yeye mulue kukulongesha malu a Bukalenge bua Nzambi, udi mua kuikala wa mu tshitendelelu kayi?​—Bala Matayo 10:7; 24:14.

Bayidi ba Yezu kabatu babuelakana mu malu a mu bulongolodi bubi ebu to. Kabatu babuelakana mu malu a tshididi, mu bimvundu anyi mu mvita ya bisamba to. (Yone 17:16) Kabatu bidikija bibidilu ne bienzedi bibi bidi nabi bena panu to.​—Bala Yakobo 1:27; 4:4.

5. Tudi mua kumanyina batendeledi balelela nangananga ku tshinyi?

Bena Kristo balelela badi ne dinanga dikole munkatshi muabu. Dîyi dia Nzambi ndibambuluishe bua kunemeke bantu ba bisamba bionso. Nansha mutu bitendelelu bia dishima biambuluisha bikole matunga bua kuluangana mvita, batendeledi balelela bobu kabatu benza nanku to. (Mika 4:1-4) Kadi, bena mu tshitendelelu tshilelela bobu batu bangata dîba diabu ne bintu bidibu nabi bua kuambuluisha bakuabu.​—Bala Yone 13:34, 35; 1 Yone 4:20, 21.

Ntshitendelelu kayi tshidi tshiangatshila malongesha atshi onso anu mu Dîyi dia Nzambi, tshinemeka dîna diende ne tshimanyisha Bukalenge bua Nzambi bu ditekemena dimuepele bua bantu? Ntshitendelelu kayi tshidi ne dinanga ne katshiyi tshiambuluisha bantu bua kuluishangana? Malu adi enzeka adi aleja ne: ntshia Bantemu ba Yehowa.​—1 Yone 3:10-12.

Bua kumanya malu makuabu, bala nshapita wa 15 wa mukanda Bible utu ulongesha tshinyi menemene?, mupatula kudi Bantemu ba Yehowa.

[Tshimfuanyi mu dibeji 16]

‘Bobu badi bamba ne: tudi bamanye Nzambi; kadi badi bamudiula ne bienzedi biabu.’​—Tito 1:16