Mua kulongesha bana malu a Nzambi: Mmishindu kayi mitambe buimpe iudi mua kubalongesha nayi?

‘Mêyi au angakukuambila lelu eu ikale mu mutshima webe; wewe newayishe bana bebe, wewe neusombelele nabu bua mêyi au, pawashikama mu nzubu webe, ne pawenda mu njila, ne pawalala, ne pawabika.’​—DUTELONOME 6:6, 7.

BALEDI badi mua kudiumvua imue misangu ne: bujitu bua dilongesha bana bukadi bubapite makanda. Padibu bakeba mibelu, badi mua kuyipeta mipitepite bungi bapanga ne tshia kuenza. Balela ne balunda badi mua kubaleja diakamue ngenyi ya tshidibu mua kuenza. Mu mikanda, bikandakanda ne ku Internete, mutu mibelu ya bungi ya mudi baledi mua kukolesha bana itu imue misangu ibengangana.

Kadi Bible yeye kena anu upesha baledi mibelu mimpe ya malu adibu mua kulongesha bana babu to; udi kabidi uleja mushindu muimpe wa kubalongesha. Anu mudi mvese idi kuulu eyi ileja, bidi bikengela bua baledi bakebe mushindu wa kuyikila ne bana babu malu a Nzambi dituku dionso. Mona imue ya ku mibelu miangatshila mu Bible ikadi miambuluishe baledi ba bungi bua kulongesha bana babu malu a Nzambi.

1. Longesha bana bebe malu a Nzambi ku diambuluisha dia bufuki. Mupostolo Paulo wakafunda ne: ‘Malu a Nzambi akadi kaayi mua kumueneka katshia buloba buafukibua, bukole buende bua tshiendelele mene ne bunzambi buende, adi amueneka bimpe, bualu bua adi ajinguluka ku bintu biakafukibua.’ (Lomo 1:20) Baledi badi mua kuenza ne muabu muonso bua kuambuluisha bana babu bua kumanyabu ne: badi mua kulua balunda balelela ba Nzambi padibu babalongesha bua kumvua bintu bidi Nzambi mufuke, kubiangata ne mushinga ne kubambuluisha bua kumonabu mudi ngikadilu yende imuenekela mu bifukibua abi.

Mushindu eu ke uvua Yezu muenze nawu mudimu pavuaye ulongesha bayidi bende. Tshilejilu, wakamba ne: ‘Monayi nyunyi ya mu diulu, kayitu yakuna maminu, kayitu yapuola, kayitu yasangisha bintu mu mayeba, kadi Tatu wenu udi mu diulu utu wayidisha. Nuenu kanuena bayitambe anyi?’ (Matayo 6:26) Muaba eu Yezu uvua muimanyine pa ngikadilu udi nende Yehowa wa dinanga ne wa luse. Kadi wakenza malu makuabu. Wakambuluisha bayidi bende bua kuela meji bua mushindu udi Yehowa uleja bana bende ngikadilu eyi.

Mukalenge wa meji Solomo wakafila tshilejilu tshia tshingenyingenyi tshidi Nzambi mupesha tunkenene; wakakula bua tuishi tukese etu bua kuimanyina pa dilongesha dia mushinga. Wakamba ne: ‘Wewe, muntu mufuba, ya kudi kankenene; welangane meji mudiku kaya mu njila yaku, wikale ne meji. Koko kakayi ne mukalenge, mutangidi, anyi mukokeshi, katu kadilongoluela  bidia biaku mu tshikondo tshia munya mukole; katu kaditekela bia kudia biaku mu tshikondo tshia kunowa.’ (Nsumuinu 6:6-8) Eu uvua mushindu mutambe buimpe wa kulongesha mushinga udi nawu didifundila bipatshila bimpe ne kuenza mudimu ne bukole budi Nzambi mutupeshe bua kubikumbaja.

Baledi badi mua kuidikija mushindu muimpe uvua Yezu ne Solomo balongesha padibu benza malu aa: (1) Kuebeja bana babu bua bambe bikunyibua ne nyama itu ibasankisha. (2) Kulonga mu dîku malu adi atangila bikunyibua ne nyama ayi. (3) Kupatuila malongesha ku bintu bidi Nzambi mufuke ebi.

2. Idikija ngikadilu uvua nende Yezu kudi bavuaye ulongesha. Katshia bafuka bantu, kakutu kuanji kuikala muntu uvua muambe malu a mushinga mukole bu Yezu to. Uvua upitshisha dîba dia bungi mu diela bantu nkonko. Uvua uditatshisha ne muoyo mujima bua kumanya malu avua munda mua bantu ne meji avuabu bela. (Matayo 17:24, 25; Mâko 8:27-29) Baledi badi pabu ne malongesha a mushinga a kulongesha bana babu. Bua kubalongesha bimpe, badi ne bua kuidikija Yezu ne kukankamija bana babu bua kuleja malu adibu nawu kabayi batshina.

Kadi bana bobu bikala anu ne bikadilu bibi anyi kabayi batumikila ne lukasa malongesha a mushinga? Mona tshivua Yezu muenze ne bapostolo bende. Kuvua misangu ivuabu bakokangana bikole ne bavua ne lujoko lua kumanya masanka adi afumina ku ngikadilu wa budipuekeshi. Nansha nanku, Yezu uvua anu ne lutulu ne uvua anu ubambuluila bua tshinyi bivua bimpe kudipuekesha. (Mâko 9:33, 34; Luka 9:46-48; 22:24, 25) Baledi badi bidikija Yezu nebabele bana babu ne lutulu. Pikalabi bikengela, nebambuluile bana bualu bumue bumue abu too ne padibu bumvua buimpe buabu. *

3. Ikala tshilejilu. Baledi badi ne bua kutumikila mubelu uvua mupostolo Paulo mupeshe bena Kristo ba ku Lomo. Wakabambila ne: ‘Nunku wewe udi uyisha mukuabu, kuena udiyisha anyi? Wewe udi wamba ne: kanuibi, udi wiba anyi?’​—Lomo 2:21.

Mubelu eu utshidi ne mushinga bualu bana batu batentula bikole malu adi baledi babu benza kupita adibu bamba. Nunku, baledi badi benza bobu bine malu adibu bambila bana bua kuenza, bana abu batu misangu mivule batumikila malu adi baledi aba babalongesha.

4. Tuadija kumulongesha patshidiye muana. Bavua bakosela Timote uvua wenza ngendu ne mupostolo Paulo bua kuyisha katshi kudi bantu ba muaba uvuaye musombele. (Bienzedi 16:1, 2) Bumue bua ku malu avua enza bua kumukoselabu katshi bua ne: bavua bamulongeshe “mukanda wa Nzambi” katshia ‘ku buana buende.’ Mamuende wa Timote ne kakuende kabavua anu bamubadila mukanda wa Nzambi patupu to, kadi bavua kabidi bamuambuluisha bua kuela meji pa malu avuamu.​—2 Timote 1:5; 3:14, 15.

Muaba uudi mua kupetela diambuluisha

Bantemu ba Yehowa batu bapatula mikanda mivule anu bua kuambuluisha baledi bua kulongeshabu bana babu bulelela budi butangila Nzambi. Imue ya kudiyi mienza anu bua kuambuluisha nayi bana batekete. Mikuabu idi mua kuambuluisha baledi bua kuikalabu bayukila ne bana babu bakadi bansonga malu patoke. *

Bushuwa, kumpala kua baledi kulongesha bana babu malu a Nzambi, badi ne bua kuanji kumanya mandamuna a imue nkonko mikole idi bana mua kubela. Tshilejilu, mmunyi muudi mua kuandamuna nkonko bu mudi idi ilonda eyi: Bua tshinyi Nzambi mmulekele makenga? Nzambi mmulongolole tshinyi bua buloba? Bafue batu penyi? Bantemu ba Yehowa nebikale ne disanka bua kukuambuluisha bua upete mandamuna a nkonko eyi ne mikuabu bua wewe ne bena mu dîku diebe nusemene pabuipi ne Nzambi.​—Yakobo 4:8.

[Mêyi adi kuinshi]