BUOBU bakuambile ne: paudi mu kalasa mbimpe kushala mutabale, kuakubenga to. Balongi ba bungi batu babungila padibu mu kalasa; kadi pabi bua kulonga mbimpe kuikala anu mutabale. Imue misangu utu uya mu bisangilu mutubu balongesha Bible.

Buebe wewe, tshiudi mua kuenza tshinyi bua kubenga kubungila?— * Bumue bua ku malu audi mua kuenza nkulala kumpala kua dîba. Imue misangu, mbimpe kulalaku ndambu mundamunya. Tumonayi mpindieu tshitudi mua kulongela ku tshivua tshienzekele nsongalume mukuabu uvua ubungila pavua mupostolo Paulo wenza muyuki dituku dikuabu butuku. Bala mu Bible mu mukanda wa Bienzedi nshapita wa 20, mvese wa 7 too ne wa 12 bua umone tshivua tshienzeke.

Paulo uvua ukumbula tshisumbu tshivua muaba uvua tshitudilu tshia mazuwa mu tshimenga tshia Toa. Bible udi wamba ne: Paulo uvua ‘musue kumuka pavuabu butshia.’ Uvua ne bua kuenza luendu ne mazuwa. Nanku ‘wakalepesha mêyi ende too ne mundankulu.’ Bible udi wamba ne: ‘Nsongalume, dîna diende Eutuko, wakadi mushikamine pa madidishi, wakadi ubunga ne tulu; bualu bua Paulo wakadi wakula musangu mule.’ Tshiakenzeka pashishe ntshinyi?—

Eutuko wakakuluka ku dididishi ne ‘wakapona panshi mu nzubu muisatu mulungakaja.’ Paulo ne bavuaye nabu bakapueka panshi lubilu lua dikema. Eutuko uvua muditute panshi, mufue ne kufua. Udiku mua kuela meji muvuabi mua kuikala bibatonde anyi?— Bible udi wamba ne: Paulo wakambula Eutuko mu maboko ne kumupukila.  Pashishe kuelaye dîyi dikole ne disanka wamba ne: “Kanuteki diyoyo, udi ne muoyo munda.” Nzambi ukavua mubishe Eutuko ku lufu.

Tshivua tshienzekele Eutuko tshidi tshitulongesha tshinyi bua Yehowa?— Bumue bualu mbua ne: Yehowa Tatu wetu wa mu diulu neabishe bantu ku lufu, nansha bana. Yehowa udi ukumvuila ne mmukunange bikole kupite ne baledi bebe. Pavua Yezu pa buloba, wakaleja bantu mutu Yehowa pavuaye wambula bana mu maboko ende ne ubabenesha. Wakabisha bansonga, kubisha ne nsongakaji wa bidimu 12.

Paudi umanya ne: Tatu webe wa mu diulu mmukunange, udi udiumvua munyi?— Bulelela, bidi bitusaka bua kunanga Yehowa ne kutumikila bidiye utuambila. Udi mumanye tshitudi mua kuenza bua kuleja ne: tudi bamunange anyi?— Umue mushindu nkuamba ne: tudi bamunange. Yezu wakamba ne: “Ndi musue Tatu.” Kadi wakenza malu makuabu kupite apu. Wakaleja ne: uvua munange tatuende ku malu avuaye wenza.

Yezu uvua utumikila Nzambi. Wakamba ne: “Matuku onso ntu ngenza malu adi amusankisha.” Tuetu tumuidikija, netudienzeje bua kushala batabale padibi bikengela bua tuetu kusankisha Yehowa ne Muanende Yezu.