BUEBE wewe, lutatu luvua nalu Frederick ne Leanne luvua penyi? Bavua ne meji mimpe. Bonso bavua banange Nzambi ne bavua bamone ne: bivua bikengela kulonga Bible pamue. Kadi bivua bimueneka ne: bualu buine buvua mua kubambuluisha bua kuikala mu buobumue bukavua bubakebela lutatu. Bavua mua kulonga pamue, kadi kabavua badifila bikole mu malu a Nzambi to.

Kuikala bantu badi ne nyuma kudi kumvuija tshinyi? Bua tshinyi mbimpe mulume ne mukajende bikale bantu badi ne nyuma? Nntatu kayi idibu mua kupeta ne mmunyi mudibu mua kuyitantamena?

Bible utu wakula bua muntu udi ‘ne nyuma’ anyi udi munange malu a Nzambi bua kuleja mushindu udi muntu umona malu mu nsombelu. (Yuda 18, 19) Tshilejilu, mupostolo Paulo wakaleja dishilangana didi pankatshi pa muntu udi ne nyuma ne muntu wa pa buloba. Wakamba bua bantu badi banange malu a pa buloba ne: badi batamba kutangila anu malu abu pamutu pa kutangila a bakuabu. Badi benza tshidibu basue pamutu pa kuditatshisha bua kutumikila mikenji ya Nzambi.​—1 Kolinto 2:14; Galatia 5:19, 20.

Kadi bantu badi ne nyuma badi bangata mikenji ya Nzambi ne mushinga. Badi bamona  Yehowa bu mulunda wabu, ne baditatshisha bua kumuidikija. (Efeso 5:1) Badi benzela bakuabu malu mimpe ne dinanga ne lutulu. (Ekesode 34:6) Badi batumikila Nzambi nansha padibi bibakolela bua kumutumikila. (Musambu 15:1, 4) Darren wa mu Canada ukadi musela kukadi bidimu 35 udi wamba ne: “Bua dianyi diumvua, muntu udi ne nyuma ngutu misangu yonso wela meji bua tshidi ngakuilu wende ne bienzedi biende mua kuenzela malanda ende ne Nzambi.” Mukajende Jane udi wamba pende ne: “Ndi ngela meji ne: mukaji udi ne nyuma ngudi uditatshisha bikole dituku dionso bua kuenza malu adi aleja ne: udi ne dimuma dia nyuma wa Nzambi.”​—Galatia 5:22, 23.

Bulelela, kabiena bikengela anu kusela bua kushisha kuikala muntu udi ne nyuma anyi kunanga malu a Nzambi to. Bible udi utulongesha ne: muntu yonso udi ne dibanza dia kulonga malu a Nzambi ne kumuidikija.​—Bienzedi 17:26, 27.

Bua tshinyi bena dibaka badi ne bua kuditatshisha bua kuikala bantu badi ne nyuma? Tuangatabi tshilejilu etshi: Bantu babidi badi badima mu budimi kampanda ne mbasue kukunamu bisekiseki. Wa kumpala mmusue kubikuna tshikondo kampanda, kadi mukuabu udi wela meji ne: mbimpe kubikuna pashishe. Wa kumpala mmusue kuela bintu bia bufuka, kadi mukuabu udi ubenga ne muoyo mujima wamba ne: bisekiseki kabiena dijinga ne bufuka to. Wa kumpala mmusue kuipilamu dituku dionso. Kadi mukuabu mmusue kushala muvunga maboko windila bua bisekiseki bidikolele. Mu bualu ebu, bisekiseki bidi anu mua kukola, kadi kabiakuikala bia bungi bu muvuabi mua kuikala bu ba bidime bonso babidi bumvuangane bua tshidibu mua kuenza ne benze mudimu pamue bua kupeta tshivuabu bakeba.

Mulume ne mukajende badi bu ba bidime aba. Umue wa kudibu yeye munange malu a Nzambi, nsombelu udi mua kulengelaku. (1 Petelo 3:1, 2) Kadi, nsombelu udi mua kulengela bikole padibu bonso batumikila mikenji ya Nzambi ne baditatshisha bua kuambuluishangana padibu benzela Nzambi mudimu. Solomo mfumu wa meji wakafunda ne: ‘Bantu babidi badi bapita umue.’ Bua tshinyi? ‘Bualu bobu badi bapeta difutu dimpe ku mudimu wabu. Bualu bua biadishindabu, umue neabishe mukuende.’​—Muambi 4:9, 10.

Pamuapa, wewe ne muena dibaka nebe nutu basue kudifila mu malu a Nzambi. Kadi anu bu ba bidime aba, kuakula anu ne mukana kakuena ne bualu bua nsongo to. Tumonayi ntatu ibidi inudi mua kupeta ne munudi mua kuyitantamena.

LUTATU 1: Katuakupeta dîba to.

Sue utshidi ubuelelaku mu dibaka udi wamba ne: “Bayanyi utu ulua kungangata ku mudimu mu dîba dia 7 njanjanja wa dilolo. Patudi tufika, midimu yonso ya kumbelu mmituindile. Bitu bitutatshisha bualu tutu dijinga ne dîba dia kulonga malu a Nzambi, kadi eku mubidi pawu musue kuikisha.”

Munudi mua kujikija lutatu: Enzayi malu bilondeshile nsombelu ne ikalayi nuambuluishangana. Sue udi wamba ne: “Tuvua bumvuangane ne bayanyi bua kubika patshiatshia bua kulonga imue nshapita ya mu Bible kumpala kua kuya ku mudimu. Udi kabidi ungambuluisha mu imue midimu ya kumbelu bua mpeta dîba dia kuikala kuyukila nende.” Mmasanka kayi avuabu bapete bua diditatshisha diabu edi? Bayende Ed udi wamba ne: “Ndi mumone ne: pantu nyikila misangu yonso malu a Nzambi ne mukajanyi, tudi tujikija bilumbu bipepele ne tukepesha ntatu itudi nayi.”

Pa kumusha diyikila ne muena dibaka nebe, mbimpe kusambila nende nansha minite mikese dituku dionso. Bidi mua kunuambuluisha bishi? Ryan ukadi musele kukadi bidimu 16 udi wamba ne: “Matuku mashala aa, meme ne mukajanyi tuvua bapetangane ne ntatu ya bungi. Kadi tuvua tukeba dîba dia kusambila pamue butuku bonso, tuambila Nzambi yetu idi mitutonde. Ndi mumone ne: kusambila pamue nkutuambuluishe bua kujikija ntatu yetu ne kupetulula disanka mu dibaka.”

LUTATU 2: Tutu bashilangane.

Mulume mukuabu, diende Tony udi wamba ne: “Meme tshitu nkokesha kusomba bua kudibadila mikanda to.” Mukajende Natalie udi wamba ne: “Ntu musue kubala ne kuambila bakuabu malu andi mulonge. Ntu mmone imue misangu ne: bayanyi utu untshina ndambu patutu tulonga malu a mu Bible.”

Munudi mua kujikija lutatu: Ikalayi nuambuluishangana, kanulejanganyi mamanya enu ne kanubipishanganyi to. Ela mukuebe kalumbandi ne mukankamije bua ngikadilu yende mimpe. Tony udi wamba ne: “Disanka ditu nadi muena kuanyi patutu tulonga Bible ditu imue misangu dintonda ndambu ne kumpala mvua ne lujoko bua kuyukila nende malu a Nzambi. Nansha nanku, mukajanyi utu ungambuluisha bikole. Mpindieu, tukadi tulonga malu a mu Bible pamue ne ndi mumone ne: kakuena bualu bua kutshina to. Ntu musue kuyukila nende malu aa. Mbituambuluishe bua kuikala ne ditalala mu dibaka dietu.”

Balume ba bungi ne bakaji babu mbamone ne: nsombelu wabu wa mu dibaka udi ulengela padibu baditekela dîba lumingu luonso bua kubala ne kulonga Bible pamue. Umanye ne: paudi ubala mvese kampanda mu Bible, mbimpe uleja mudiye mua kukuambuluisha wewe kadi ki mmudiye mua kuambuluisha muena dibaka nebe to. (Galatia 6:4) Kanuyukidi malu anutu nukokelangana panudi nulonga to, kadi ayukilayi dîba dikuabu. Bua tshinyi?

Tuangatabi tshilejilu etshi: Wewe udia biakudia ne bena mu dîku dienu, udiku mua kubanga kusukula mputa uudi nende bua kumuela buanga anyi? Kuena mua kuenza nanku to, bualu udi mua kuendesha bantu ku muoyo. Yezu wakafuanyikija kulonga malu a Nzambi ne kuenza disua diende ne kudia biakudia. (Matayo 4:4; Yone 4:34) Wewe wakula bua bilema bia muena dibaka nebe misangu yonso inudi nulonga Bible, dijinga diende dia kulonga Bible didi mua kumutalala ku muoyo. Bulelela, mbimpe nuenu kuyukila bua bilumbu binudi nabi. Kadi kebayi dîba dimpe dinudi mua kuyukila malu aa.​—Nsumuinu 10:19; 15:23.

Nuenu nuditatshisha bua kuikala bantu badi ne nyuma anyi badi banange malu a Nzambi mu dibaka dienu, nenupete ditalala dia bungi ne disanka. Ke bualu kayi Dîyi dia Nzambi didi ditujadikila ne: ‘Tshintu tshionso tshidi muntu ukuna, ntshiotshi tshiapolaye.’​—Galatia 6:7.

Frederick ne Leanne batudi batele ku ntuadijilu kua tshiena-bualu etshi, bakadimuenena bulelela bua tshidi Bible wamba etshi. Bakadi mu dibaka kukadi bidimu 45, ne badi ne nsombelu muimpe bualu batu anu baditatshisha bua kuikala bantu badi ne nyuma. Frederick udi wamba ne: “Mvua mpisha mukajanyi bualu kavua uyikila nanyi to. Kadi ngakalua kumona ne: mvua anu ne bua kudienzeja panyi.” Mukajende udi wamba pende ne: “Dinanga dietu bua Yehowa Nzambi ke divua dituambuluishe patuvua mu ntatu. Tudi ne tshibidilu tshia kudilongela ne kusambila pamue kukadi bidimu. Pandi mmona bayanyi udienzeja bua kuleja ngikadilu ya bena Kristo, bidi bipepela bua meme kumunanga.”