Muntu uyukila ne Ntemu wa Yehowa​—Yezu nNzambi anyi?

BANTEMU BA YEHOWA batu basue kuyukila ne bantu malu a mu Bible. Kudiku bualu kampanda bua mu Bible butu bukutatshisha anyi? Udiku musue kumanya amue malongesha anyi malu atu Bantemu ba Yehowa benza anyi? Biobi nanku, wewe mupetangane ne Ntemu wa Yehowa, kuelakanyi bua kuyukila nende bua malu au to. Neikale ne disanka bua kuyikila nebe.

Bualu budi bulonde ebu, mmuyuki mulelela uvua mua kuikala muenzeke pankatshi pa muntu ne Ntemu wa Yehowa. Tutekabi ne: Ntemu wa Yehowa udi ne dîna ne: Meta udi uya kumbelu kua mamu mukuabu diende Ntumba.

Batu bamba ne: kanutu nuitabuja Yezu to, mmuomu anyi?

Meta: Pastere wetu utu wamba ne: Bantemu ba Yehowa kabatu bitabuja Yezu to, mmuomu anyi?

Ntumba: Ndi nkujadikila ne: tuetu tutu tuitabuja Yezu; tudi kabidi tuitaba ne: bua kupeta lupandu, tudi ne bua kuleja mutudi bamuitabuje.

Meta: Nansha meme panyi ntu ngitaba nanku.

Ntumba: Wamonyi ne: tuetu bonso tudi ne mmuenenu wa muomumue mu bualu ebu’s. Dianyi nNtumba, kadi wewe?

Meta: Meme ndi Meta, ndi ne disanka dia bungi mutuamanyanganyi.

Ntumba: Nansha meme panyi. Imue misangu udi mua kuikala udiebeja ne: ‘bikala Bantemu ba Yehowa bitabuja Yezu bushuwa, kadi bua tshinyi bantu badi bamba ne: kabatu bamuitabuja?’

Meta: Ee, wewe ke udi mua kungambila.

Ntumba: Kudi malu a bungi Meta wetu, kadi mu tshikoso tudi bitabuje Yezu ne muoyo mujima kadi katutu tuitaba malu onso atu bantu bamba bua bualu buende to.

Meta: Bu mudi bualu kayi?

Ntumba: Bamue batu bamba ne: Yezu uvua anu muntu muimpe patupu. Kadi tuetu katutu tuitaba malu a mushindu au to.

Meta: Nansha meme panyi.

Ntumba: Wamonyi ne: tudi bapetangane kabidi nebe mu bualu ebu’s. Bualu bukuabu mbua ne: Bantemu ba Yehowa kabatu bitaba malongesha adi abengangana ne tshivua Yezu muambe bua malanda ende ne Tatuende to.

Meta: Tshiena mumvue tshiudi musue kuamba to.

Ntumba: Mu bitanda bia bungi batu balongesha ne: Yezu nNzambi. Pamuapa bakadi bakulongeshe pebe nanku.

Meta: Mmuomu, pastere wetu mmutuambile ne: Yezu ne Nzambi mmuntu umue.

Ntumba: Kadi udiku mua kuitaba ne: mushindu muimpe wa kumanya bulelela budi butangila Yezu, nkukonkonona tshivuaye yeye muine muambe bua bualu buende anyi?

Meta: Eyowa.

Yezu wakamba tshinyi?

Ntumba: Tubale mvese wa mu Bible udi utuambuluisha bua kumvua bimpe bualu ebu. Teleja tshidi mukanda wa Yone 6:38 wamba: “Tshiakufuma mu diulu bua kuenza bu mundi musue, anu bu mudi wakuntuma musue.” Yezu yeye muikale Nzambi, nunku mvese eu udi ne tshibuejakaji.

 Meta: Tshibuejakaji kayi?

Ntumba: Yezu mmuambe mu mvese eu ne: kavua mufume mu diulu bua kuenza disua diende to.

Meta: Mmuomu, wakamba ne: mmulue bua kuenza disua dia uvua mumutume.

Ntumba: Kadi bu Yezu muikale Nzambi, wakamutuma pa buloba apa nnganyi? Bua tshinyi uvua ujinga kuenza disua dia uvua mumutume?

Meta: Nkadi ngenda ngumvua tshiudi wamba. Kadi meme tshiena mutuishibue ne: anu mvese umue eu udi uleja mudi Yezu kayi Nzambi to.

Ntumba: Nanku tumone tshivua Yezu muambe umue musangu. Wakamba mêyi a muomumue mu Yone nshapita wa 7. Bala koku Yone 7:16.

Meta: Udi wamba ne: ‘Yezu wakabakudimuna dîyi ne: Diyisha dianyi ki ndianyi, ndia udi muntume.’

Ntumba: Tuasakidila bua dibala. Bilondeshile mvese eu, Yezu uvuaku ulongesha malu ende anyi?

Meta: Tòo, udi wamba ne: malu avuaye ulongesha avua a Muntu uvua mumutume.

Ntumba: Bidi nanku, tudi ne bua kudiebeja ne: ‘Uvua mutume Yezu nnganyi? Uvua mumupeshe bulelela buvuaye ulongesha nnganyi?’ Yeye au udiku mua kuikala mutambe Yezu anyi? Bualu muntu yonso utu utuma mukuabu utu mumutambe.

Meta: Bualu bua dikema, tshitu muanji kubala mvese eu to.

Ntumba: Tumona kabidi tshivua Yezu muambe mu Yone 14:28, udi wamba ne: ‘Nuakumvua dîyi dingakunuambila ne: Ndi nya, nempingane kunudi. Bu nuenu bansue, nuakadi kusanka, bualu bua meme ndi nya kudi Tatu, bua Tatu udi muntambe meme.’ Bilondeshile mvese eu, buebe wewe, mmunyi muvua Yezu udimona kumpala kua Tatuende?

Meta: Udi wamba muaba eu ne: Tatuende mmumutambe yeye. Nanku ndi ngela meji ne: uvua umona Nzambi bu muntu uvua ku mutu kuende.

Ntumba: Bidi nanku. Tuangatabi tshilejilu tshikuabu; tumona tshivua Yezu muambile bayidi bende mu Matayo 28:18. Udi wamba ne: ‘Yezu wakalua kudibu, wakabambila ne: Bakumana kumpa bukokeshi buonso mu diulu ne pa buloba.’ Udi mumvue ne: Yezu muambaku ne: utu ne bukokeshi buonso anyi?

Meta: Tòo, muambe ne: mbamupeshabu.

Ntumba: Kadi bu Yezu muikale Nzambi, mmunyi muvuabu mua kumupesha bukokeshi bua bungi? Uvua mumupeshabu nnganyi?

Meta: Nenshale kuela meji bua bualu abu.

Uvua wambila nganyi?

Ntumba: Kudi bualu bukuabu kabidi budi mua kufila tshibuejakaji bikale Yezu Nzambi.

Meta: Mbualu kayi abu?

Ntumba: Mbualu budi butangila batismo wa Yezu. Anji teleja bualu budi Luka 3:21, 22 ulonda. Bala koku.

Meta: ‘Pakabatizabu bantu bonso ne Yezu kabidi, pakadiye utendelela Nzambi, diulu diakabululuka ne nyuma muimpe wakapueka pambidi pende ne mubidi bu wa nyunyu wa nkutshi; dîyi diakafuma mu diulu ne: Wewe udi Muana wanyi munanga, udi unsankisha bimpe.’

Ntumba: Udi mumona tshivua Yezu wenze pavuabu bamutambuishe anyi?

Meta: Uvua usambila.

Ntumba: Mmuomu. Kadi tudi mua kudikonka ne: ‘bikale Yezu muikale Nzambi, uvua ulomba nganyi?’

Meta: Wedi lukonko luimpe, nenduele pastere wetu.

Ntumba: Tangila bukuabu bualu budi anu mu mvese itudi babale eyi, badi bamba ne: pavua Yezu mupatuke mu mâyi, dîyi dia muntu diakafuma mu diulu. Uvua mumvue tshivua Muntu au muambe anyi?

Meta: Uvua muambe ne: Yezu mMuanende uvuaye munange, udi umusankisha.

Ntumba: Wambi bimpe. Kadi Yezu yeye muikale Nzambi, uvua muakule mêyi avua afume mu diulu au nnganyi?

Meta: Tshitu muanji kudiela nkonko ya nunku pa bualu ebu to.

Bua tshinyi “Tatu” ne “Muana”?

Ntumba: Mu mvese eyi mudi kabidi bualu bukuabu butudi ne bua kukonkonona: Tuabadi  muvua Yezu wamba mudi Nzambi muikale Tatuende wa mu diulu. Pavua Yezu mutambule, dîyi kufuma mu diulu diamba ne: Yezu mMuananyi. Bushuwa, Yezu muine uvua udiamba mudiye Muana wa Nzambi. Anji ngambilabi, wewe musue kundongesha mudi bantu babidi bikale diatshimue, mmalanda a mu dîku kayi adi pankatshi pabu audi mua kuntelela bua kumvuija bualu ebu?

Meta: Ndi mua kuakula bua adi pankatshi pa bana ba muntu babidi.

Ntumba: Menemene, imue misangu udi nansha mua kuakula bua bana ba mapasa badi bafuanangane ku bionso. Kadi Yezu uvua ubikila Nzambi ne: Tatu, udiamba yeye ne: Muana. Nanku, udi mumona ne: uvua musue kuleja bantu tshinyi?

Meta: Ngumvu tshiudi ukeba kuamba. Yezu udi wamba mudiku muntu mukuabu mukulumpe bikole ne muikale ne bukokeshi bua bungi kupita mukuabu.

Ntumba: Ke mudibi. Anji elabi meji. Wafiki ku difila tshilejilu tshia bana ba mapasa tshikumbane bua kuleja mudi bantu babidi mua kuikala diatshimue. Yezu yeye muikale Nzambi, kuenaku umona ne: bu muvuaye mulongeshi munene, uvuaku pende mua kuela meji ku tshilejilu tshia buena etshi peshi ku tshikuabu tshimpe tshidi tshileja mudi bantu babidi diatshimue anyi?

Meta: Uvua mua kutshifila.

Ntumba: Kadi wakatela miaku bu mudi “Tatu” ne “Muana” bua kuleja malanda adiye nawu ne Nzambi.

Meta: Wakudi bualu bukuabu bua mushinga mukole.

Bayidi ba kumpala ba Yezu bavua bambe pabu tshinyi?

Ntumba: Wewe ne dîba, ndi mua kukuambila kabidi bualu bukuabu budi butangila tshiena-bualu etshi kumpala kua meme kuya.

Meta: Eyowa, udi mua kungambila, kadi mu minite mikese.

Ntumba: Bu Yezu muikale Nzambi, bayidi bende kabavuaku mua kuamba bualu ebu patoke anyi?

Meta: Si mmuomu, bavua anu mua kuamba.

Ntumba: Kadi katuena babale muaba nansha umue udibu balongeshe nanku mu Bible to. Kadi, tangila tshidi mupostolo Paulo, umue wa ku bayidi ba Yezu ba kumpala mufunde. Mu Filipoi 2:9, udi umvuija tshivua Nzambi muenze panyima pa lufu ne dibishibua dia Yezu ne: ‘Nzambi wakamubandisha kuulu kule, wakamupa dîna didi pa mutu pa dîna dionso.’ Bilondeshile mvese eu, Nzambi wakenzela Yezu tshinyi?

Meta: Mbambe ne: Nzambi wakamubatshisha kuulu kule.

Ntumba: Mbimpe. Kadi Yezu yeye muikale diatshimue ne Nzambi kumpala kua kufuaye ne pashishe Nzambi kumubandisha kuulu kule, uvuaku mua kuikala mumuteke ku mutu kuende anyi? Mmunyi mudi muntu mua kupita Nzambi?

Meta: Nansha kakese, kabiena mua kuenzeka to.

Ntumba: Bulelela, bilondeshile malu onso atudi bamone aa, udiku mumona ne: Bible udi ulongesha ne: Yezu nNzambi anyi?

Meta: Tòo, kabiena nanku to. Bible udi wamba ne: Yezu mMuana wa Nzambi.

Ntumba: Ntshia bushuwa. Meta wetu, ndi nkujadikila ne: Bantemu ba Yehowa batu banemeka Yezu bikole. Tudi tuitaba ne: Bu muvuaye Masiya mulaya, lufu luende luakunzuluila bantu bonso ba lulamatu njila wa lupandu.

Meta: Ke mundi ngitabuja panyi.

Ntumba: Kadi udi mua kuikala udiebeja ne: ‘Mmushindu kayi utudi mua kuleja Yezu dianyisha bua mudiye mufila muoyo wende bua bualu buetu?’ *

Meta: Nkavua muele meji bua bualu abu.

Ntumba: Imue misangu, ndi mua kupingana bua Bible atuandamune. Meme mulue lumingu lualonda mu dituku ne mêba a buena aa, nenkusangane anyi?

Meta: Eyowa, nengikalaku.

Ntumba: Bimpe, nendue kumonangana nebe.

[Mêyi adi kuinshi]