Yehowa mmukangule mêsu anyi

Muyuki mulonda kudi Patrice Oyeka

Dikuabu dituku ku dilolo, ngakangata dipangadika dia kudishipa bualu mvua mpofu, ndimona nkayanyi mushadile anu bua kuteleja malu ku bisanji. Ngakela bintu bia lulengu mu dikopo dia mâyi, meme kuditeka pa mêsa kumpala kuanyi. Mvua musue kuowa mâyi bua musangu wa ndekelu ne kudilongolola bimpe kumpala kua meme kunua bintu bia lulengu abi bua kudishipa. Bua tshinyi mvua musue kudishipa? Ntshinyi tshivua tshienzeke bua nshale ne muoyo bua kunulondela bualu ebu lelu?

MVUA muledibue mu dia 2/2/1958, mu provense wa Kasaï Oriental mu ditunga dia République démocratique du Congo. Tatu wakafua pamvua ne bidimu tshitema ne tutuanyi ke wakankolesha.

Pangakajikija tulasa, ngakapeta mudimu mu budimi bua mitshi ya madimbu. Dimue dituku mu dinda mu tshidimu tshia 1989, pamvua ndongolola luapolo lua mudimu mu biro bianyi, diakamue ngakadimona nkadi mu mîdima tshiyi mmona tshintu nansha tshimue. Bu mutuvua mu dinda, ngakela meji ne: nzembu mmiye, kadi mvua anu ngumvua muadi wa motere. Ngakumvua buôwa, meme kujingulula ne: tshivua mua kumona kabidi tshintu nansha tshimue, nansha bintu bine bimvua mfunda.

Diakamue meme kubikila umue wa ku bantu bamvua ndombola bua kuya nanyi kudi muntu uvua utangila malu a babedi ku mudimu. Muntu au wakangambila ne: bidi bikengela baya nanyi kudi munganga wa mu tshimenga uvua ne dimanya dia bungi mu bualu ebu. Pakamona munganga au ne: kamonyi kanyi ka dîsu kavua kanyanguke ne tshivua bimpe to, wakandomba bua baye kungondopa mu tshimenga tshia Kinshasa.

Pangakafika ku Kinshasa

Pangakafika ku Kinshasa ngakamonangana ne baminganga ba mêsu ba bungi, kadi nansha umue wa kudibu kakangambuluisha to. Meme mumane kuenza matuku 43 mu lupitadi, baminganga bakangambila ne: nenshale mpofu matuku anyi onso a muoyo. Pashishe bena mu dîku dietu bakangangata kuyabu nanyi mu bitendelelu bia mishindu ne mishindu bua kungondopabu mu tshishima, kadi tshitendelelu nansha tshimue katshivua tshikokeshe bua kungondopa to.

Ndekelu wa bionso, ngakajimija ditekemena dia kumona kabidi. Tshivua kabidi ne bua nsongo bumvua mua kuenza mu nsombelu wanyi to. Mvua mujimije lumonu luanyi ne mudimu wanyi. Mukaji umvua nende kunyema ne bionso bituvua nabi mu nzubu. Mvua ngumvua bundu bua kupatuka pambelu anyi bua kutuilangana ne bantu bakuabu. Mvua anu musombele mu nzubu nkayanyi. Mvua ndimona nkayanyi ne ndiumvua tshiyi ne mushinga nansha mukese.

Ngakateta misangu ibidi bua kudishipa. Musangu muibidi ke undi mumvuije ku ntuadijilu kua muyuki eu. Muana mukese wa mu dîku dietu ke wakampandisha. Wakangata dikopo ne kuitshikija bivuamu panshi kayi mumanye pamvua ngowa mâyi. Ndi ne disanka bua muvua muana au kayi munue bintu bia lulengu abi to. Kadi mvua munyingalale bikole pamvua tshiyi mupete dikopo adi. Pashishe, meme kuambila bena mu dîku dietu tshimvua nkebela dikopo adi ne tshimvua musue kuenza.

 Ndi ngela Nzambi tuasakidila ne bena mu dîku dietu bua muvuabu bantabalele. Ngakalekela dijinga dia kudishipa.

Ngakapetulula disanka mu nsombelu wanyi

Dikuabu dituku mu Dia lumingu mu tshidimu tshia 1992, pamvua musombe mu nzubu nnua makanya, Bantemu ba Yehowa babidi bakalua kuntangila pavuabu mu mudimu wabu wa diyisha wa ku nzubu ne ku nzubu. Pakamonabu ne: mvua mpofu, bakambadila Yeshaya 35:5 udi wamba ne: ‘Mu dituku adi mêsu a mufofo neatabale, matshi a badi ne mapapa neajikuke.’ Pangakumvua mêyi aa biakangenza disanka. Bantemu ba Yehowa kabavua bangambile bua londapu lua mu tshishima bu muvuabu bangambile mu bitendelelu bikuabu mumvua nya to. Kadi bakangumvuija ne: meme mumanye Nzambi, mêsu anyi neatabale mu buloba bupiabupia budi Nzambi mulaye. (Yone 17:3) Diakamue meme kutuadija kulonga Bible ne Bantemu ku diambuluuisha dia mukanda wa Udi mua kuikala ne muoyo wa kashidi pa buloba bukudimuna mparadizu. Meme kutuadija kubuela mu bisangilu bionso bia bena Kristo ku nzubu wa Bukalenge uvua pabuipi ne muaba umvua musombele, ne meme kushintulula nsombelu wanyi. Ngakalekela kunua makanya.

Kadi bumpofu buanyi buvua bumpangisha bua kuya kumpala mu malu a Nzambi. Nunku ngakatuadija kulonga tulasa tua bampofu bua kumanya mua kubala ne kufunda muakulu wa bampofu. Bualu ebu buakangambuluisha bua kuenza midimu mu Kalasa ka Nzambi katu kenzeka ku nzubu wa Bukalenge. Mu matuku makese, meme kutuadija kuyisha bena mutumba nanyi. Meme kupetulula disanka mu nsombelu wanyi. Ngakatungunuka ne kuya kumpala ne meme kudilambula kudi Yehowa. Meme kutambula mu dia 7/5/1994.

Pakavula dinanga dianyi bua Yehowa ne bua bantu, ngakapeta dijinga dia kulua mpanda-njila wa pa tshibidilu. Mvua mutuadije bumpanda-njila bua pa tshibidilu katshia ku 1/12/1995. Ndi kabidi ne diakalenga dia kuikala mukulu katshia mu ngondo 2/2004. Imue misangu batu bambikila bua kuela miyuki ya malu a mu Bible mu bisumbu bikuabu bu ngamba-malu mukumbudi. Mabenesha onso aa adi ampesha disanka dia bungi ne adi angambuluisha bua kuvuluka ne: kakuena bulema budi mua kutupangisha bua kukumbaja disua dietu dia kuenzela Yehowa Nzambi mudimu.

Yehowa udi umpesha “mêsu” makuabu

Anu munkavua muleje, mukajanyi uvua munyeme bualu mvua mulue mpofu. Kadi Yehowa mmumpeshe dibenesha dia pa buadi. Ndi mua kuamba mu ngumvuilu mukuabu ne: mmumpeshe mêsu. Anny Mavambu uvua muitabe bua meme kumusela nansha mumvua ne bulema, wakalua mêsu anyi. Bu mudiye pende mpanda-njila, misangu yonso utu uya kumfila mu buambi ne utu umbadila malu a mu miyuki indi ngenza bua meme kuafunda mu muakulu wa bampofu. Anny udi dibenesha dia pa buadi kundi. Ku diambuluisha diende mvua mumone bulelela bua mêyi adi mu Nsumuinu 19:14 a ne: ‘Nzubu ne biuma bidi bumpianyi budi bufuma kudi batatu, kadi mukaji mubake wa meji udi dipa didi difuma kudi Yehowa.’

Yehowa mmutubeneshe meme ne Anny bualu tudi ne bana babidi, wa balume ne wa bakaji. Ndi ne dijinga dikole dia kumona mpala yabu mu Mparadizu! Bualu bukuabu bua disanka bundi nabu mbua ne: tutuanyi uvua mutuitabile bua kusomba mu lupangu luende wakitaba pende bulelela ne kutambulaye. Tuetu bonso tudi mu tshisumbu tshimue.

Nansha mundi mpofu, ndi anu ne dijinga dia kuenza malu a bungi mu mudimu wa Nzambi bualu mmumbeneshe bikole. (Malaki 3:10) Dituku dionso edi ndi ndomba bua Bukalenge bua Nzambi bulue ne bumbushe makenga onso pa buloba. Katshia ngamanya Yehowa, ndi mua kuamba ne dishindika dionso ne: ‘Disankisha didi difuma kudi Yehowa didi divuija bubanji, ne kena utenteka kanyinganyinga pa mutu padi.’​—Nsumuinu 10:22.

[Bimfuanyi mu dibeji 15]

Ndi ngenza muyuki wa malu a mu Bible. Meme ne dîku dianyi ne tutuanyi