DIANDAMUNA dia mu tshikoso didi ne: eyowa. Yehowa udi ulaya bantu badiye wanyisha ne: ‘Bualu bua nembabuikidile mibi yabu, ne tshiena mvuluka malu mabi abu kabidi.’ (Yelemiya 31:34) Nunku Yehowa udi utujadikila ne: padiye ubuikidila muntu udi unyingalala bua mibi yende, kena uyivuluka kabidi to. Kadi bualu ebu budiku bumvuija ne: Mufuki wa diulu ne buloba kena ukumbana bua kuvuluka mibi ya muntu ukadiye mufuile luse anyi? Mêyi adi mu Yehezekele adi umvuija patoke mudi Yehowa ubuikidilangana ne upua muoyo.​—Bala Yehezekele 18:19-22.

Yehowa uvua mukuate mudimu ne muprofete Yehezekele bu muleji mpala wende bua kumanyisha dilumbuluisha diende kudi bena Yuda ne bena Yelushalema bavua kabayi ne lulamatu. Bantu ba mu tshisamba etshi bakalekela ntendelelu wa Yehowa ne kuujabu buloba buabu ne malu a tshikisu. Yehowa wakadianjila kumanyisha ne: bena Babilona bavua ne bua kubutula Yelushalema. Kadi nansha muvua Yehowa mumanyishe kabutu aka, uvua kabidi mumanyishe mukenji wa ditekemena. Muntu yonso uvua ne bua kudisunguila tshivuaye musue, ne kuambula bujitu bua malu ende.​—Mvese wa 19, 20.

Ntshinyi tshivua tshienzeka pavua muntu ulekela kuenza malu mabi ne utuadija kuenza malu mimpe? Yehowa wakamba ne: ‘Bialekela muntu mubi malu mabi ende onso akenzaye, biatumikilaye mikenji yanyi ne bienzaye malu makanangane ne mikenji ne malu adi makane, neikale ne muoyo bulelela, kena ufua nansha.’ (Mvese wa 21) Bushuwa, Yehowa uvua “musue kubuikidila” muena mpekatu uvua ulekela dienza malu mabi, ne unyingalala ne muoyo mujima.​—Musambu 86:5.

Kadi netuambe tshinyi bua mibi ivuaye muenze? Yehowa udi wamba ne: ‘Kabena bavuluka bualu bumue bua mu malu mabi akenzaye diambedi bua kumubanda nabu.’ (Mvese wa 22) Udi mumone mudi mvese eu wamba ne: muntu udi unyingalala bua mibi yende ‘kabena bavuluka bualu bumue bua mu malu mabi akenzaye.’ Bua tshinyi bualu ebu budi ne mushinga?

Mu Bible, muaku wa tshiena Ebelu udibu bakudimune ne: “kuvuluka” udi umvuija malu a bungi kupita anu kuvuluka malu a kale. Mukanda mukuabu wakakula bua muaku eu ne: “Misangu ya bungi muaku eu udi umvuija kuenza bualu kampanda anyi udi upetangana ne miaku ya pa muanda idi isaka ku tshienzedi.” Nunku, “kuvuluka” kudi mua kumvuija “kuenza bualu kampanda.” Nunku padi Yehowa wambila muntu udi munyingalale bua mibi yende ne: ‘kabena bavuluka bualu bumue bua mu malu mabi akenzaye,’ udi usua kuamba ne: kakuenzela muntu eu bualu kampanda bua mibi yende eyi, bu mudi kumupisha anyi kumunyoka to. *

Mêyi a mu Yehezekele 18:21, 22 adi aleja bimpe menemene mu mushindu udi ulenga ku muoyo mudi Yehowa ubuikidilangana mibi. Padi Yehowa utubuikidila mibi yetu, kena utubadila nayi kabidi mu matuku atshilualua. Kadi Yehowa udi wimansha mibi ya muntu udi munyingalale panyima pende. (Yeshaya 38:17) Bidi anu bu udi ukupula mibi ayi mu meji ende.​—Bienzedi 3:19.

Bu mutudi bena mapanga, tudi dijinga ne luse lua Nzambi bualu tudi tuenza mibi misangu ya bungi. (Lomo 3:23) Kadi Yehowa mmusue bua tumanye ne: tuetu banyingalale ne muoyo mujima bua mibi yetu, udi utufuila luse. Padiye ubuikidila mibi udi upua muoyo, mbuena kuamba ne: kena uvuluka mibi yetu ayi bua kutupisha anyi kutunyoka bua bualu buayi. Mêyi aa kaenaku atukankamija anyi? Luse lua Yehowa ludiku lukusaka bua wewe kusemena pabuipi nende anyi?

[Mêyi adi kuinshi]