Bavua bandelela mu Moundsville, tshimenga tshimpe tshivua pabuipi ne musulu wa Ohio ku Nord Ouest kua Virginie mu États-Unis. Mbatulele kuetu banayi, bana balume basatu meme ndi muana muibidi. Tuvua ne nsombelu muimpe kuetu. Baledi banyi bavua benji ba mudimu ba kalanda musenga, bavua bamba anu bulelela ne banange bantu nabu. Katuvua ne mfranga ya bungi to, kadi tuvua tupeta tshionso tshituvua natshi dijinga. Bu muvua baledi banyi Bantemu ba Yehowa bavua baditatshisha bua kutulongesha mikenji ya mu Bible katshia anu ku buana buetu.

Kadi pangakakumbaja bidimu dikumi ne pa mutu, muoyo wanyi wakatuadija kulekela malu avuabu bandongeshe. Ngakatuadija kudiebeja ne: muntu yeye mulekele mikenji ya mu Bible imulombola ni udi mua kupeta nsombelu muimpe wa disanka. Meme kuela meji ne: mushindu umue wa kupeta disanka nkuikala ne budikadidi bua kuenza bualu buonso bundi musue. Matuku makese pashishe, ngakatuadija kupumbisha bisangilu bia bena Kristo. Tutuanyi ne muakunyanyi wa bakaji bakalonda pabu njila wanyi mubi wa buntomboji. Baledi betu bakenza muabu muonso bua kutupingaja mu njila muimpe, kadi tuakabenga bionso bivubu benza.

Pashishe meme kulua kumona ne: budikadidi bua dishima bumvua njinga buvua mua kumfikisha ku bupika. Dimue dituku pamvua mfuma mu kalasa nya kumbelu, mulunda wanyi mukuabu wakampesha makanya. Meme kuangata. Katshia anu ku dituku adi, ngakatuadija kuitaba bua kuenza malu makuabu mabi a bungi. Mu bungi bua matuku, meme kutuadija kunua diamba, maluvu ne kuenda masandi. Bidimu bia bungi pashishe, ngakatuadija ku kakese ku kakese kunua makanya makole ne ndekelu wa bionso, meme kushala mupika wawu. Bu munkavua ndifila bikole mu dinua dia diamba, ngakatuadija too ne kudipana bua ntungunuke ne kudiambuluisha.

Nansha munkavua mbenga kumvua tshivua kondo kanyi ka muoyo kangambila, kadi kavua anu kamvuluija ne: malu amvua ngenza avua mabi. Kadi mvua diumvua ne: nkavua munyanguke ne kakuvua mushindu wa meme kushintuluka to. Nansha mumvua ndimona munkatshi mua bantu ba bungi mu fete anyi mu konsere, mvua anu ndimona nkayanyi ne bivua bintonda bikole. Imue misangu mvua mvuluka ngikadilu mimpe ya baledi banyi ne ndiebeja bua tshinyi ndi mubenge kubatumikila ne muditue mu dienza dia malu mabi nunku.

Nansha mumvua mumanye ne: tshiena kabidi mua kushintuluka, bantu bakuabu bavua bobu bamanye ne: nenshintuluke. Mu tshidimu tshia 2000, baledi banyi bakambikila bua kubuela mu mpungilu wa distrike wa Bantemu ba Yehowa. Mvua muyemu anu bua dishikila. Kadi biakankemesha bualu baledi banyi bavua kabidi babikile bana betu babidi bavua pabu bapambuke.

Patuvua mu mpungilu eu, meme kuvuluka ne: muaba utuvua tuenzela mpungilu eu ke umvua muenze konsere munene ne bena dianyi kukadi kupita tshidimu. Malu amvua mumone avua mandenge ku muoyo bikole. Musangu utuvua benze konsere muaba au, bavua bateke bintu bia kuimanshila bintu bia bukoya bia bungi ne muaba au uvua muule ne mishi ya makanya. Bantu ba bungi batuvua tuenza nabu konsere bavua bantu babi, ne mêyi avua mu misambu ituvua tuimba avua a bundu. Kadi mu mpungilu, mvua musombe munkatshi mua bantu badi ne disanka dilelela, bavua kabidi bangakidile ne musangelu wa bungi, nansha mumvua tshiyi mumonangane nabu kukadi bidimu bia bungi. Muaba utuvua tuenzela mpungilu uvua ne mankenda, ne malu avuabu bakula avua apesha bantu ditekemena bua matuku atshilualua. Pakumona malu mimpe adi bulelela bua mu Bible buenzela bantu, biakansaka bua kudiebeja bua tshinyi mvua mububenge!​—Yeshaya 48:17, 18.

Pakajika mpungilu, ngakangata dipangadika dia kupingana mu tshisumbu tshia bena Kristo. Bana betu babidi bakangata dipangadika dia momumue bualu malu avuabu bumvue pabu mu mpungila au avua mabalenge bikole ku muoyo. Tuetu bonso basatu tuakitaba bua kulonga Bible.

Mvese wa mu Bible uvua mutambe kundenga bikole ngua Yakobo 4:8 udi wamba ne: “Semenayi pabuipi ne Nzambi ne yeye neasemene pabuipi nenu.” Ngakalua kumona ne: meme musue kusemena pabuipi ne Nzambi, ndi ne bua kulengeja nsombelu wanyi. Munkatshi mua malu amvua ne bua kulekela, muvua kulekela kunua makanya, diamba ne dikuatshika dia maluvu.​—2 Kolinto 7:1.

Ngakalekela kuendakana ne balunda babi bamvua nabu, ne kukeba balunda bapiabapia munkatshi mua batendeledi ba Yehowa. Mukulu muena Kristo uvua mulonge nanyi Bible uvua mungambuluishe bikole. Uvua umbikila ku telefone misangu yonso anyi upitshila kumbelu bua kummona. Kutuadija anu ku dituku adi, mmulue mulunda wanyi wa pa muoyo.

Mu tshidimu tshia 2001, meme ne bana betu babidi tuakadilambula kudi Nzambi ne kutambula. Baledi banyi ne bakunyi banyi ba balume bavua balamate Nzambi bavua ne disanka dia bungi bua muvua dîku dietu didisange pamue bua kutendelela Yehowa.

Kumpala mvua ngela meji ne: mikenji ya mu Bible mmikole bua kuyitumikila, kadi mpindieu ndi nyimona bu bukubi bulelela. Bible mmumpeshe bukole bua meme kulekela kunua makanya anyi kuapana ne kulua muntu wa nsongo.

Ndi ne diakalenga dia kuikala munkatshi mua dîku dia pa buloba bujima dia Batendeledi ba Yehowa. Bantu aba batu bushuwa banangangane, ne badi batendelela Nzambi mu bobumue. (Yone 13:34, 35) Pakumbusha bana betu bakuabu, ndi kabidi ne diakalenga dia pa buadi dia kupetangana ne mukajanyi Adrianne undi munange ne muoyo mujima. Bidi bituenza disanka dia bungi bua mutudi tuenzela Mufuki wetu mudimu kaba kamue.

Pamutu pa kuipatshila malu a pa buloba ebu, ndi mpindieu nyisha bikole bu mpanda-njila, ndongesha bantu mudibu pabu mua kupeta disanka ku diambuluisha dia Dîyi dia Nzambi. Mudimu eu mmumpeteshe masanka antu tshiyi muanji kupeta. Ndi mua kuamba ne dishindika dionso ne: Bible mmushintulule nsombelu wanyi. Ndekelu wa bionso, ngapetshi budikadidi bulelela.