Mmunyi muudi udiumvua bua 21/12/2012, matuku a ngondo a mu kalandriye ka bena Maya adi bantu ba bungi baleja ne: nshikidilu wa buloba bujima neenzeke dituku adi? Malu audi utekemena adi mua kukufikisha ku disanka anyi ditekeshibua mu mikolo peshi ku dibenga kutangila malu awu. Bualu ebu budi anu dimanyisha dikuabu dia dishima dia dituku dia nshikidilu wa buloba ebu anyi?

Kadi netuambe tshinyi bua “dituku dia nshikidilu wa buloba” udi Bible wakuila? (Matayi 24:3, MMM) Bamue badi ne buôwa bua ne: neboshe buloba ebu. Bakuabu badi ne disanka bua kumona tshikala mua kuenzeka palua nshikidilu wa buloba. Bantu ba bungi bakadi batshioke bua mukadibu bindile nshikidilu mutantshi mule. Kadi malu aa adiku aleja ne: nshikidilu nealue peshi kakulua anyi?

Nebikukemeshe wewe mumvue tshidi Bible wamba menemene bua nshikidilu wa buloba ebu. Bible kena anu uleja tshitudi ne bua kushadila batekemene nshidikilu, kadi udi kabidi umvuija muatondabi bantu pikalabu mua kumona ne: nshikidilu udi unengakana. Tudi tukulomba bua ubale mandamuna adi Bible ufila bua imue nkonko itu bantu ba bungi badiela bua nshikidilu wa buloba ebu.

DIANDAMUNA DIDI BIBLE UFILA: ‘Nzambi wakajadika buloba pa bishimikidi biabu, bua kabunyungi too ne kashidi.’​—MUSAMBU 104:5.

Buloba ebu kabuakubutuka mu kapia anyi mu mushindu mukuabu to. Kadi Bible udi ulongesha ne: buloba ebu nebushale tshisombedi tshia bantu tshia kashidi ne tshiendelele. Musambu wa 37:29 udi wamba ne: ‘Bantu bakane nebapiane buloba, nebashikamemu tshiendelele.’​—Musambu wa 115:16; Yeshaya 45:18.

Nzambi mumane kufuka buloba, wakamba ne: buloba ‘buakadi buimpe be,’ ne ke mutshidiye ubumona. (Genese 1:31) Pamutu pa Nzambi kubutulaye buloba, mmulaye bua “kubutula bantu badi babutula buloba,” mbuena kuamba ne: neakube buloba ku dibutuka dia kashidi.​—Buakabuluibua 11:18.

Udi mua kudiebeja bua tshidi 2 Petelo 3:7 wamba. Mvese eu udi wamba ne: “Diulu ne buloba bidiku mpindieu mbilamibue bua kapia.” Kabienaku bileja ne: buloba ebu nebubutudibue ne kapia anyi? Mu bulelela, imue misangu Bible utu wakula bua muaku “diulu,” “buloba,” ne “kapia” mu ngakuilu wa mu tshimfuanyi. Tshilejilu, padi Genese 11:1, wamba ne: ‘Buloba bujima buakatungunuka ne kuikala ne muakulu umue, (NW)’ mbenze mudimu ne muaku “buloba” bua kuakula bua bantu.

Mvese idi pabuipi ne 2 Petelo 3:7 idi ileja ne: diulu anyi buloba peshi kapia bidibu bakuile mu mvese eu, bidi mu ngakuilu wa mu tshimfuanyi. Mvese 5 ne 6 idi yakula bua Mvula wa kabutu wa mu matuku a Nowa idi ileja mudiku dipetangana ne tshidi Petelo muambe. Mu tshikondo atshi, buloba bua kalu buakabutudibua, kadi ki ndibulunge dietu edi divua dibutudibue to. Nunku, “buloba” budi Bible uleja ne: buakabutudibua ku Mvula wa kabutu, mbantu babi bonso ne bena tshikisu bavua ne muoyo tshikondo atshi. Mvula eu wakabutula kabidi “diulu” mmumue ne: bantu bavua bakokesha pa buloba. (Genese 6:11) Mu mushindu wa muomumue, 2 Petelo 3:7 mmudianjile kumanyisha dibutuka dia kashidi dia bantu babi ne dia bakokeshi ba pa buloba bu bantu babutudibua ne kapia.

DIANDAMUNA DIDI BIBLE UFILA: “Buloba budi bupita ne majinga abu kabidi, kadi muntu udi wenza disua dia Nzambi, udi ushala kashidi.”​—1 YONE 2:17.

“Buloba” budi bupita ki ndibulunge dietu edi to, kadi mbantu badi pa buloba badi kabayi benza disua dia Nzambi. Anu bu mutu munganga umbusha tshitupa tshia mubidi tshidi ne disama dia kansere bua kupandisha mubedi, Nzambi “neumbushe” bantu  babi bua ne: bantu bakane basombe pa buloba ne disanka. (Musambu 37:9) Mu mushindu eu, “nshikidilu wa buloba” mbualu buimpe.

Nkudimuinu ya Bible mmikudimune bimpe tshiambilu tshia “nshikidilu wa buloba ebu” ne: “nshikidilu wa ndongoluelu wa malu eu,” anyi “ndekelu wa buloba.” (Matayi 24:3, MMV) Bikala bantu ne buloba mua kupanduka ku nshikidilu wa buloba ebu, ki mbimpe bua kuitaba ne: nekuikale ndongoluelu mupiamupia anyi buloba bupiabupia anyi? Bible udi wandamuna ne: eyowa, bualu udi wakula bua “ndongoluelu wa malu utshilualua.”​—Luka 18:30.

Yezu wakabikila tshikondo tshilualua atshi ne: “Dituku dialedibua bintu bionso tshiakabidi.” Mu tshikondo atshi, neapingaje bantu ku nsombelu uvua Nzambi musue bua bikale nende ku ntuadijilu. (Matayi 19:28) Netuikale ne disanka bua

• Mparadizu pa buloba muikale bantu bonso mu bukubi ne nsombelu muimpe.​—Yeshaya 35:1; Mika 4:4.

• Mudimu muimpe udi usankisha.​—Yeshaya 65:21-23.

• Dijika dia masama onso.​—Yeshaya 33:24.

• Muapingana bakulakaje ku bunsonga.​—Yobo 33:25.

• Muabika bantu ku lufu.​—Yone 5:28, 29.

Tuetu tuenza “disua dia Nzambi,” tuenza malu adiye utulomba, katuena mua kumvua buôwa bua nshidikilu wa buloba ebu to. Kadi netumuindile ne muoyo mujima.

DIANDAMUNA DIDI BIBLE UFILA: “Panudi numona malu aa enzeka, numanye ne: Bukalenge bua Nzambi bukadi pabuipi.”​—LUKA 21:31.

Mulongeshi mukuabu diende Richard Kyle mmufunde mu mukanda wende mukuabu ne: “Dishintuluka dia malu mu tshimpitshimpi ne dinyanguka dia nsombelu wa bantu bidi bibafikisha ku diela meji ne: nshikidilu ukadi pabuipi, nangananga padi dishintuluka dia malu ne dinyanguka dia nsombelu bimueneka bikale bikole mua kubiumvuija.” (The Last Days Are Here Again).

Kadi malu avua baprofete bafunde mu Bible bua nshikidilu, kaavua umvuija malu mabi avua menzeke mu tshikondo tshiabu to. Kadi bavua benzeja ku nyuma wa Nzambi bua kuleja malu avua ne bua kulua kuenzeka mu matuku a ku nshikidilu wa buloba ebu. Konkonona imue ya ku milayi ya baprofete, ne sungula eyi idi yenda ikumbana mu matuku etu aa.

•   Mvita, biyole bia nzala, bikumina bikole ne bipupu bia masama a lufu.​—Matayi 24:7; Luka 21:11.

• Divulangana dia malu mabi.​—Matayi 24:12.

• Dinyanga dia buloba kudi bantu.​—Buakabuluibua 11:18.

• Bantu nebadinange, nebanange makuta ne masanka kadi kabayi banange Nzambi.​—2 Timote 3:2, 4.

• Dinyanguka dia mêku.​—2 Timote 3:2, 3.

• Dibenga kuitaba tshimanyinu tshia ne: nshikidilu ukadi pabuipi.​—Matayi 24:37-39.

• Diyisha dia lumu luimpe lua Bukalenge bua Nzambi pa buloba bujima.​—Matayi 24:14.

Anu muvua Yezu muambe, patudi tumona “malu aa onso” tumanye ne: nshikidilu wa buloba ebu ukadi pabuipi. (Matayi 24:33) Bantemu ba Yehowa badi bitaba ne: bijadiki ebi mbilelela, ne badi bayisha bantu malu aa mu matunga 236.

DIANDAMUNA DIDI BIBLE UFILA: “Dîba diambabu ne: “Ditalala, ne kakuena bualu bua kutshina!” dîba adi kabutu ka tshimpitshimpi nekalue diakamue kudibu, anu bu mudi bisama bia pa kulela bikuata mukaji udi ne difu; kabakupanduka nansha kakese.”​—1 TESALONIKE 5:3.

Bible udi uleja dipetangana didi pankatshi pa dibutuka dia buloba ne ntuadijilu wa bisama bia pa kulela bitu bikuata mukaji, bualu kakuena mushundu wa mukaji kubiepuka to, ne bitu bimufikila mu tshimpitshimpi. Tshikondo tshia ku nshikidilu tshidi anu bu mukaji udi ne difu, mukaji udi windila muana mmumanye bimanyinu bionso bidi bileja ne: ukadi pakulela. Doktere wende udi mua kutshinka dituku didiye mua kulela, kadi nansha yeye kayi mulele dituku divua doktere muambe, mamu mmutuishibue amu ne: nealele mu matuku makese emu. Bia muomumue, malu adi kaayi malelela adi bantu batekemene bua nshikidilu, kaena mua kutupangisha bua kuamba ne: tudi mu “matuku a ku nshikidilu” to.​—2 Timote 3:1.

Udi mua kudiebeja ne: ‘Bikala tshimanyinu tshidi tshileja ne: nshikidilu wa buloba ebu ukadi pabuipi tshimueneke patoke, bua tshinyi bantu ba bungi kabena bitaba bualu ebu?’ Bible udi uleja ne: pikala nshikidilu ukadi pabuipi bantu ba bungi kabakuitaba  dilua diende. Pamutu pa kuitababu dishintuluka dinene dia malu adi enzeka mu matuku a ku nshikidilu, bantu badi bobu bamba ne: “Katshia dituku divua bankambua betu balale tulu mu lufu, malu onso adi atungunuka ne kuikala anu muomumue kumbukila ku ntuadijilu kua bufuki.” (2 Petelo 3:3, 4) Mu mêyi makuabu, tshimanyinu tshia matuku a ku nshikidilu tshidi tshimueneka patoke, kadi bantu ba bungi kabena batshitaba to.​—Matayi 24:38, 39.

Tshiena-bulu etshi tshidi tshiakula anu bua bimue bijadiki bia mu Bible bidi bileja ne: nshikidilu ukadi pabuipi. * Udi musue kumanya malu a bungi anyi? Bikalabi nanku, udi mua kumonangana ne Bantemu ba Yehowa bua kulonga nabu Bible kuyi ufuta makuta to. Badi mua kukulongeshela kumbelu kuebe, anyi muaba mukuabu uudi musue peshi ku telefone. Tshidi ne bualu ndîba diebe, bualu neulonge malu mimpe a mushinga mukole.