Mvua muledibue mu ditunga dia République Dominicaine, mu tshimenga tshia Santo Domingo, ndi muana wa mukala wa mu bana banayi. Baledi banyi bavua balonge bikole ne basue kukolesha bana babu mu nsombelu muimpe. Bidimu binayi kumpala kua meme kuledibua, baledi banyi bakatuilangana ne bamisionere ba mu tshitendelelu tshia bena Mormon. Bu muvua baledi banyi bamona bansonga ba mu tshitendelelu atshi bavuala bimpe ne bikale ne bukalanga, bakangata diakamue dipangadika bua dîku dietu dikale dia kumpala dia mu tshidiila dia kubuela mu tshitendelelu tshia bena Mormon (anyi Église de Jésus Christ des Saints des Derniers Jours).

Pamvua ngenda nkola, mvua musue bikole malu avua enzeka mu tshitendelelu atshi ne muvuatshi tshitabalela bikole nsombelu wa mu dîku ne bikadilu bilenga. Mvua ne disanka dia bungi bua kuikala mu tshitendelelu tshia bena Mormon etshi, ne meme kudifundila tshipatshila tshia kuluamu misionere.

Pangakakumbaja bidimu 18, bena mu diku dietu bakaya kusombela mu ditunga dia États-Unis ne tshipastshila tshia ne: mbuele mu tulasa tua iniversite. Tshidimu tshijima tshimane kupita, mamuanyi mukuabu ne bayende bavua Bantemu ba Yehowa bakalua kututangila mu Floride. Bakatubikila bua tuye nabu mu tshibilu tshiabu tshia malu a Nzambi. Biakandenga bikole ku muoyo bua kumona muntu yonso uvua kumpenga kuanyi ubala mvese ivuabu bafila ne ufunda amue malu. Ke meme kulomba bike ne dibeji ne kutuadija kufunda panyi.

Pakajika tshibilu etshi, mamuanyi mukuabu eu ne bayende bakangambila ne: bu muudi musue kulua misoinere, tudi mua kukuambuluisha bua umanye amue malu a mu Bible. Ngakamona ne: luvua lungenyi luimpe bualu tshikondo atshi mvua mumanye bikole malu a mu Mukanda wa bena Mormon kupita a mu Bible.

Patuvua tuyukila nabu malu a mu Bible ku telephone, mamuanyi mukuabu eu ne bayende bavua misangu yonso bankankamija bua ngikale ntangila bua kumanya bikala malongesha a mu tshitendelelu tshianyi apetangana ne a mu Bible. Bavua basue bua ndimanyine bulelela.

 Kuvua malongesha a bungi amvua ngitaba a mu tshitendelelu tshia bena Mormon, kadi tshivua mumanye menemene tshivua Bible wamba bua malongesha au to. Mamuanyi mukuabu eu wakantumina tshibejibeji tshia Réveillez-vous! tshia 8/11/1995, tshipatula kudi Bantemu ba Yehowa tshivua ne bimue biena-bualu bimanyine pa tshitendelelu tshia Mormon. Biakankemesha bikole bua kumona ne: tshivua mumanye malongesha a bungi a mu tshitendelelu tshietu tshia bena Mormon to. Bualu ebu buakansaka bua kukeba malu avuabu bambe mu Réveillez-vous! au mu Site wetu wa bena Mormon ku Enternete bua kumanya ni mmalelela. Ngakajingulula ne: malu au avua malelela pangakaya kutangila tshilaminu tshia bintu bia kale tshia bena Mormon mu Utah.

Mvua ngela meji misangu yonso ne: Mukanda wa bena Mormon ne Bible bidi bipetangana. Kadi pangakatuadija kubala Bible ne muoyo mujima ngakajingulula ne: malongesha a bena Mormon kaavua apetangana ne tshivua Bible wamba to. Tshilejilu mu Yehezekele 18:4 Bible udi wamba ne: anyima udi ufua. Kadi, Mukanda wa bena Mormon udi wamba mu Alma 42:9 ne: “Anyima kena mua kufua nansha kakese.”

Pakumbusha dishilangana dinene dia malongesha, malongesha a bena Mormon avua malamate ku buena ditunga avua antonda. Tshilejilu mu Mormon bavua balongesha ne: budimi bua Edene buvua mu Jackson (Missouri) mu États-Unis. Banene ba mu tshitendelelu etshi bavua balongesha ne: “Dimue dituku Nzambi neakokeshe buloba bujima ku diambuluisha dia bukalenge bua États-Unis.”

Mvua ndikonka tshikala mua kufikila ditunga dietu ne matunga makuabu bilondeshile dilongesha dia bena Mormon. Dilolo dikuabu ngakayukila bualu ebu ku telefone ne nsongalume mukuabu muena Mormon uvua ulonga bua kulua misionere. Ngakamuebeja ni udi mua kuitaba bua kuluisha bena Mormon bakuabu bikala ditunga diabu diluisha dia bena Mormon bakuabu. Biakankemesha bikole pakangadamunaye ne: eyowa! Ngakadifila bikole bua kumanye bimpe malongesha amvua ngitabuja, ne meme kuyukila ne banene ba mu tshitendelelu tshia Mormon. Bakangambila ne: mandamuna a nkonko imvua mbela avua makole bua kuumvua ne nemfike kudiumvua pantemena butoke dimue dituku.

Diandamuna diabu diakantonda bikole, ke meme kukonkonona bua kumanye tshivua tshinsaka bua kulua misionere mu Mormon. Ngakalua kujingulula ne: tshivua tshinsaka bua kulua misionere tshivua dijinga dimvua nadi dia kuambuisha bantu bakuabu. Bualu bukuabu bumvua musue kushadila misionere buvua ne: mvua musue bua bantu bikale bannemeka. Nansha muvuabu bakulamu bua Nzambi, kadi tshivua mumumanye bimpe menemene to. Nansha mumvua mubale kumpala Bible misangu ya bungi, tshivua anu mmuangata ne mushinga to. Tshivua mumanye bualu nansha bumue pa bidi bitangila tshidi Nzambi mulongolole bua buloba ne bua bantu.

Mu dilonga dianyi dia Bible ne Bantemu ba Yehowa, mvua mumanye malu a bungi bu mudi dîna dia Nzambi, tshidi tshifikila bafue ne mudimu udi nawu Yezu mu dikumbaja dia malu adi Nzambi mulongolole. Pamvua mulue kuibidilangana ne Bible, mvua ne disanka dia kuambila bantu bakuabu bulelela bumvua ndonga. Kuonso eku, mvua mumanye ne: Nzambi udiku, kadi mpindieu ndi mua kuyukila nende ku diambuluisha dia disambila anu bu muntu uyukila ne mulunda wende wa pa muoyo. Ngakatambula meme kulua Ntemu wa Yehowa mu 12/7/2004, ne ngondo isambombo pashishe meme kulua mpanda-njila mu mudimu wa bena Kristo wa diyisha.

Mvua muenze mudimu bidimu bitanu ku biro bietu bia Bantemu ba Yehowa bidi bilombola midimu yetu pa buloba bujima bidi ku Brooklyn mu tshimenga tshia New York. Mvua ne disanka dia bungi dia kuikala mu tshibambalu tshidi tshipatula Bible ne mikanda mikuabu idi yumvuija Bible bidi biambuluisha bantu binunu ne binunu pa buloba bujima, ndi ne disanka dia kutungunuka ne kuambuluisha bantu bakuabu bua bamanye Nzambi.