Didipuekesha ndibenga kuikala ne budiambi ne didileja. Muntu udi ne budipuekeshi kena umona bakuabu bashadile kudiye to. Muntu yonso muena mibi eu udi ne budipuekeshi udi ne bua kumanya mikalu yende.

Mose kavua mulue ne lutambishi pavuabu bamupeshe bumfumu to. Misangu ya bungi, patu muntu upeta ndambu wa bumfumu, utu uleja lukasa mudiye ne budipuekeshi anyi lutambishi. Mufundi mukuabu wa mu bidimu bia 1800 diende Robert Ingersoll wakaleja bualu ebu mushindu eu: “Bantu ba bungi badi mua kuanyisha ntatu. Kadi wewe musue kumanya tshidi muntu menemene, mupeshe bumfumu.” Mu bualu ebu, Mose mmushiye tshilejilu tshimpe tshia budipuekeshi. Mushindu kayi?

Mose uvua mupete bumfumu, bualu Yehowa uvua mumupeshe mudimu wa kulombola bena Isalele. Kadi, Mose kavua muditambishe nansha kakese bua bumfumu ebu to. Tshilejilu, tukonkononayi mushindu uvuaye mupite ne tshilumbu tshia bumpianyi. (Nomba 27:1-11) Tshilumbu etshi tshivua tshikole, bualu dipangadika divuabu mua kuangata divua ditangila ndelanganyi ivua ilonda.

Ntshinyi tshiakenza Mose? Uvuaku muele meji ne: bu muvuaye ulombola bena Isalele uvua mukumbane bua kuangata dipangadika bua tshilumbu etshi anyi? Uvuaku mudieyemene peshi mueyemene dimanya divuaye nadi dia Yehowa anyi?

Pamuapa muntu muena lutambishi uvua mua kuikala muenze nanku. Kadi, Mose kakenza yeye nanku to. Bible udi wamba ne: ‘Mose wakaya ne bualu ebu kumpala kua Yehowa.’ (Nomba 27:5) Anji elabi meji bua bualu ebu. Nansha muvua Mose muenze bidimu bitue ku 40 mu dilombola tshisamba tshia Isalele, kavua mudieyemene to, kadi wakeyemena Yehowa. Tudi tumona bimpe patoke ne: Mose uvua bushuwa ne budipuekeshi.

Mose kavua muele meji ne: anu yeye nkayende ke uvua mukumbane bua kuikala mfumu to. Uvua ne disanka pavua Yehowa muanyishe bua bena Isalele bakuabu kuikalabu baprofete bu yeye. (Nomba 11:24-29) Pavua tatuende muenu mumulombe bua kusungula bantu bakuabu bua kumuambuluishabu, Mose wakitaba lungenyi elu ne budipuekeshi. (Ekesode 18:13-24) Pakavua Mose pa kufua, nansha mutshivuaye ne makanda a mubidi, wakalomba Yehowa bua kusungula muntu uvua ne bua kupingana pa muaba wende. Pavua Yehowa musungule Yoshuwa bua kupingana pa muaba wende, Mose wakambuluisha Yoshuwa ne muoyo umue, kulombaye bantu bua balonde bulombodi bua Yoshuwa too ne mu Buloba bulaya. (Nomba 27:15-18; Dutelonome 31:3-6; 34:7) Bushuwa, Mose wakamona kulombola bena Isalele bu diakalenga. Kadi kavua wangata bumfumu buende bu mushindu wa kumuenena bakuabu to.

Katuena ne bua kudisua bualu tudi ne bumfumu anyi dimanya dia bungi to. Vuluka ne: bua tuetu kuenza mudimu wa Yehowa mu mushindu muimpe, budipuekeshi buetu budi ne mushinga wa bungi kupita mamanya etu. (1 Samuele 15:17) Tuetu ne budipuekeshi bulelela, netuenze muetu muonso bua kutumikila mubelu muimpe eu wa mu Bible: “Eyemena Yehowa ne mutshima webe wonso, kueyemenyi dijingulula diebe dia mianda.”​—Nsumuinu 3:5, 6.

Tshilejilu tshia Mose tshidi tshitulongesha kabidi bua kubenga kuangata muanzu wetu anyi bumfumu buetu ne mushinga wa bungi.

Mmasanka kayi atudi tupeta patudi tuidikija tshilejilu tshia Mose tshia budipuekeshi? Kakuyi mpata, tuetu bikale ne budipuekeshi bulelela, bantu badi ku luseke luetu nebadiumvue bimpe ne nebatulamate. Bualu bukuabu budi ne mushinga, netusankishe Yehowa Nzambi udi uleja ngikadilu eu muimpe. (Musambu 18:35) Bible udi wamba ne: “Nzambi kena wanyisha bena lutambishi, kadi udi upesha bantu badi badipuekesha ngasa wende.” (1 Petelo 5:5) Kuidikija budipuekeshi bua Mose mbualu buimpe bua dikema!