Anu mudibu bafunde mu Bible, “ditabuja” ndituishibua didi dishindamene pa bijadiki bikole. Muntu udi muitabuje Nzambi mmutuishibue ne: neakumbaje malu onso adiye mulaye.

Mu nsombelu wende mujima, Mose uvua mueyemene bikole milayi ya Nzambi. (Genese 22:15-18) Uvua ne diakalenga dia kuikala ne nsombelu muimpe mu Ejipitu, kadi wakalekela diakalenga edi “kusungulaye bua kukengeshibua ne bantu ba Nzambi pamutu pa kuikala ne disanka dia tshitupa tshîpi dia bubi.” (Ebelu 11:25) Uvuaku muangate dipangadika edi kayiku muele meji, ne mmulue kubungama pashishe anyi? Tòo, bualu Bible udi wamba ne: Mose “wakatungunuka mushindame bu uvua umona Yeye udi kayi umueneka.” (Ebelu 11:27) Mose kavua munyingalale musangu nansha umue bua dipangadika divuaye muangate.

Mose uvua mudifile bua kukolesha ditabuja dia bantu bakuabu. Tshilejilu, tukonkonone tshivua tshienzeke pavua bena Isalele badimone bikale mu buteyi pankatshi pa tshiluilu tshia Palô ne Mbuu Mukunze. Bu muvua bena Isalele ne buôwa bua dikenga divua mua kubafikila, bakadidila Yehowa ne Mose. Ntshinyi tshiakenza Mose?

Mose uvua mua kuikala kayi mumanye ne: Nzambi uvua mua kukosolola Mbuu Mukunze bua bena Isalele bapete njila wa kupandukila. Kadi Mose uvua mutuishibue ne: Nzambi uvua mua kuenza bualu kampanda bua kukuba bantu bende. Mose uvua musue bua bana babu bena Isalele bikale pabu batuishibue mushindu eu. Bible udi wamba ne: ‘Mose wakambila bantu ne: kanutshinyi, imanayi, numone lupandu lua Yehowa lualueye kunupa lelu.’ (Ekesode 14:13) Mose uvuaku muambuluishe bena Isalele bua kuikalabu ne ditabuja dikole anyi? Eyowa, bualu Bible kena wakula anu bua Mose, kadi udi wamba bua bena Isalele bonso ne: “Bua ditabuja, bakapitshila mu Mbuu Mukunze anu bu pa buloba bume.” (Ebelu 11:29) Ditabuja dia Mose kadivua dimuambuluishe anu yeye kayende to, kadi divua diambuluishe muntu yonso uvua mumuidikije.

Tudi mua kuidikija Mose tuetu beyemene milayi ya Nzambi mu nsombelu wetu. Tshilejilu, Nzambi mmutulaye bua kutukumbajila majinga etu a ku mubidi, tuetu bateke ntendelelu wende pa muaba wa kumpala mu nsombelu wetu. (Matayi 6:33) Bushuwa, bu mudi bantu ba bungi baditua mu dikeba dia bintu bia ku mubidi, bidi mua kutukolela bua kuteka malu a Nzambi pa muaba wa kumpala. Kadi tudi mua kuikala bashindike ne: tuetu tuenza muetu muonso bua kupepeja nsombelu wetu ne kudifila bikole mu ntendelelu wetu, Yehowa neatukumbajile malu onso atudi nawu dijinga. Yehowa udi utujadikila ne: “Tshiakukushiya nansha kakese, tshiakukulekela nansha kakese.”​—Ebelu 13:5.

Tudi kabidi mua kudienzeja bua kuambuluisha bakuabu bua bakole pabu mu ditabuja. Tshilejilu, baledi bimpe mbamanye diakalenga dinene didibu nadi dia kuambuluisha bana babu bua bakoleshe ditabuja diabu kudi Yehowa. Padi bana benda bakola, batu dijinga ne kumanya ne: Nzambi udiku ne mmutuelele mikenji ya tshidi tshimpe ne tshidi tshibi. Bana mbasue kabidi bua nubajadikile ne: kulonda mikenji ya Nzambi ke bualu bua mushinga budibu ne bua kuenza mu nsombelu wabu. (Yeshaya 48:17, 18) Baledi badi bapesha bana babu dipa dia mushinga mukole padibu babambuluisha bua bitabe ne: Nzambi “udiku ne udi ulua mufutshi wa badi bamukeba ne muoyo mujima.”​—Ebelu 11:6.