Dinanga didi diumvuija kuditatshisha bikole bua bakuabu. Muntu udi ne dinanga udi uleja ku mêyi, ku bienzedi biende mushindu udiye udiumvua bua bantu badiye munange, nansha kuenza nunku koku kumulomba bua kudipangisha amue masanka.

Mose uvua muleje muvuaye munange Nzambi. Mushindu kayi? Nunku vuluka mêyi adi mu 1 Yone 5:3 a ne: “Bualu dinanga dia Nzambi didi diumvuija ne: tutumikile mikenji yende.” Bu muvua Mose munange Nzambi, uvua utumikila mikenji yende. Mose uvua utumikila Nzambi mu malu onso ni manene ni makese. Tshilejilu pavua Nzambi mumulombe bua kutuilanganaye ne Palô anyi pavuaye mumulombe bua kolola dikombo diende pa Mbuu Mukunze, Mose uvua anu mutumikile. Nansha pavua mukenji umueneka mupepele anyi mukole bua kuukumbaja, Mose uvua anu utumikila. “Mose wakenza nunku.”​—Ekesode 40:16.

Mose uvua munange bena Isalele nende. Bavua bamanye ne: Yehowa uvua ukuata mudimu ne Mose bua kulombola bantu bende, ke bualu kayi bavua baya kudi Mose bua kumukuatshilabu malu abu. Bible udi wamba ne: ‘Bantu bakimana kumpala kua Mose dinda too ne ku dilolo.’ (Ekesode 18:13-16) Elabi meji muvuabi mua kuikala bitshiokesha Mose pavuaye uteleja dituku dijima malu avua bena Isalele bamukuatshila! Nansha nanku, Mose uvua ne disanka dia kuambuluisha bantu bavuaye munange.

Pakumbusha dibateleja, Mose uvua kabidi usambila bua bantu bavuaye munange. Uvua usambila too ne bua bantu bavua bamuenzela malu mabi. Tshilejilu, pavua muanabu ne Mose wa bakaji Miriyame munungane bua Mose, Yehowa wakamutua disama dia nsudi. Pamutu pa Mose kusankaye bua dinyoka divuabu bapeshe muanabu, wakamulombela diakamue kudi Nzambi wamba ne: ‘Ndi nkusengelela ne: Nzambi, umuondape.’ (Nomba 12:13) Dinanga ke divua disake Mose bua kuenza disambila dia mushindu eu.

Tudi mua kuidikija Mose patudi tuleja mutudi banange Nzambi bikole. Dinanga dia mushindu eu didi ditusaka bua kutumikila mikenji ya Nzambi “ne muoyo” mujima. (Lomo 6:17) Patudi tutumikila Yehowa ne muoyo wetu mujima, tudi tusankisha muoyo wende. (Nsumuinu 27:11) Bidi bitusankisha ne tuetu bine. Nanku tuetu tuenzela Nzambi mudimu ne dinanga dilelela, netuenze malu mimpe ne netuikale kabidi ne disanka bua mutudi tueenza!​—Musambu 100:2.

Mushindu mukuabu wa tuetu kuidikija Mose nkuikala ne dinanga dia kudipangisha amue masanka bua bakuabu. Padi balunda anyi balela betu batutuadila malu abu, dinanga didi ne bua kutusaka bua 1) kubateleja ne muoyo mujima, 2) kuditeka pa muabu wabu mbuena kuamba ne: kudimvua mudibu badiumvua, ne 3) kubaleja ne: tudi tuditatshisha bua bualu buabu.

Anu bu Mose, tudi mua kusambila bua bantu batudi banange. Imue misangu tudi mua kumvua bibi padi bantu batukuatshila malu abu kadi katuyi ne mushindu wa kubambuluisha. Tudi nansha mua kudiabakena kubambila ne: “Bidi bintonda bualu tshindi mua kuenza tshidi anu kusambila bua bualu buebe.” Kadi vuluka ne: ‘Disambila dia muntu muakane didi ne bukole bua bungi.’ (Yakobo 5:16, MMM) Masambila etu adi mua kusaka Yehowa bua kuenzela muntu bualu buvuaye kayi ne dijinga dia kuenza. Bushuwa, kakuena bualu butambe buimpe butudi mua kuenzela bantu batudi banange kupita kusambila bua bualu buabu. *

Kuenaku witaba ne: tudiku mua kulongela malu a bungi kudi Mose anyi? Nansha muvuaye muntu bu tuetu, wakashiya tshilejilu tshimpe tshitambe tshia ditabuja, didipuekesha ne tshia dinanga. Tuetu tulonda tshilejilu tshiende ne muoyo mujima, netshituambuluishe tuetu, nansha bantu bakuabu.​—Lomo 15:4.