Udiku mua kuvuluka dituku diuvua mulele muanebe anyi? Kakuyi mpata uvua mumvue disanka pauvua mumuambule. Kadi bua baledi badi bu Carlo ne Mia, disanka diabu diakasambakana ne kanyinganyinga pakabambilabu ne: muanabu udi ne disama anyi bulema kampanda.

Udiku ne muana udi ne bulema anyi? Udi mua kudiebeja muudi mua kupita ne lutatu elu. Bikalabi nanku, kuteketshi mu maboko to. Baledi badi ne nsombelu wa buena webe mbatantamene lutatu lua mushindu eu. Tukonkonone ntatu isatu ya pa tshibidilu iudi mua kutuilangana nayi ne mudi meji adi mu Bible mua kukuambuluisha.

Baledi ba bungi batu bumvua bibasama ku muoyo padibu babambila ne: muanabu udi usama. Juliana mamu mukuabu wa mu Mexique udi wamba ne: “Pavua munganga mungambile ne: muananyi Santiago uvua ne disama  dia ujimija lungenyi, tshivua mua kuitaba to. Mvua ngumvua anu bu ne: diulu ndikulukile.” Bantu bakuabu badi mua kudiumvua anu muvua mamu mukuabu wa mu Italie diende Villana mudiumvue. Villana udi wamba ne: “Mvua muangate dipangadika dia kulela nansha muvua bualu ebu buikale ne njiwu ya bungi bua bamamu ba mulongo wanyi. Kadi pavua muananyi mupete disama dia trisomie ditu ditekesha lungenyi, mvua mumvue bu ne: meme ke uvua mukebele muana lutatu elu.”

Lungenyi luolu lukushikile anyi udipisha umanye ne: bantu bonso batu badiumvua mushindu eu. Nzambi kavua mulongolole bua bantu bikala basama to. (Genese 1:27, 28) Kavua mufuke baledi ne bukole bua kuitaba bipepele bualu budi kabuyi bua ku tshifukilu. Tudi mua kuamba ne: ki mbibi bua kumvua bibi paudi mufuishe anyi paudi usamisha muana. Udi ne bua kumanya ne: bidi mua kukulomba matuku a bungi bua kutantamena muudi udiumvua ne kuibidilangana ne nsombelu mupiamupia.

Ntshinyi tshiudi mua kuenza biwikala udiela tshilumbu pambidi? Vuluka ne: kakuena muntu nansha umue udi mumanye bimpe disambulujangana dia bikadilu, miaba itudi ne malu makuabu adi enzeja bua muana aledibue ne bulema kampanda. Ku lukuabu luseke, udi mua kutuadija kuela muena dibaka nebe tshilumbu pambidi. Epuka lungenyi lua nunku. Newenze bimpe wewe mueleshangana diboko ne muena dibaka nebe ne badifile bikole bua kutabalela muanenu.​—Muambi 4:9, 10.

TSHINUDI MUA KUENZA: Longa mudi nsombelu wa muanebe. Bible udi wamba ne: ‘Badi bibaka nzubu ne meji, dijingulula dia mianda didi dimujadika.’​—Nsumuinu 24:3.

Udi mua kulonga malu a bungi kudi baminganga ne mu mikanda idi yakula bua bubedi abu. Udi mua kufuanyikija dilonga dia mudi bubedi bua muanebe ne dilonga dia muakulu mupiamupia. Ku ntuadijilu udi mua kuikala mukole, kadi udi anu mua kuulonga.

Carlo ne Mia batuvua batele ku ntuadijilu bavua bapete mibelu kudi munganga ne kudi tshibambalu tshidi tshimanye bimpe malu adi atangila bubedi bua muana. Badi bamba ne: “Bualu ebu bua katuambuluisha bua kumvua bimpe malu atudi mua kutekemena ne kuikala ne mmuenemu muimpe bua bubedi budi nabu muana. Tuvua bamone ne: muanetu uvua mua kuikala ne nsombelu uvua umueneka muimpe mu mushindu kampanda. Bualu ebu buvua butukolesha bikole.”

Udi mua kudiumvua ne: kutabalela muana udi ne bubedi kudi kujikija makanda ebe a mubidi. Mamu mukuabu wa mu Nouvelle-Zélande diende Jenney udi wamba ne: “Bidimu ndambu pashishe bamane kukuata muananyi ne disama dia tuneke, misangu yonso imvua nteta bua kuenza mudimu kumbelu kupita mumvua ngenza kuonso eku, mvua ndiumvua mutshioke ne ndila muadi.”

Lutatu lukuambu ndua ne: udi mua kudimona nkaya. Ben udi ne muana udi ne disama dia miskle ya mubidi yonso mitekete. Udi wamba ne: “Bantu ba bungi kabena mua kumvua mudi nsombelu wetu to.” Udi mua kuleja muntu lutatu luebe luonso, kayi anu ukumvua to. Kadi balunda bebe ba bungi badi ne bana bikale ne makanda a mubidi. Nunku udi mua kuelakana bua kubambila malu ebe.

TSHINUDI MUA KUENZA: Lomba diambuluisha. Witabe diambuluisha didibu mua kukupesha. Juliana utukadi batele kuulu eku udi wamba ne: “Imue misangu meme ne mbayanyi tuvua tumvua bibi bua kulomba diambuluisha.” Kadi udi usakidila wamba ne: “Tuvua balonge mua kubenga kudieyemena. Padi bantu bakuabu batuambuluisha, katuena tudimona nkayetu to.” Mulunda webe anyi mulela webe yeye mukulombe bua kusomba ne muenebe udi usama mu bisangilu bia bena Kristo anyi mu tshibilu kampanda, anyisha dilomba adi ne disanka dionso. Bible udi wamba ne: ‘Mulunda utu wananga mu bikondo bionso, mmuanetu utu uleja bulela mu tshikondo tshia dikenga.’​—Nsumuinu 17:17.

Tabalela makanda ebe a mubidi. Anu mutu mashinyi atu ambula babedi dijinga ne kasolonyi bua kutungunuka ne kuambula babedi bua kuya nabu mu lupitadi, ke mudibi kabidi buebe wewe, bua kutungunuka ne kutabalela muanebe udi usama udi ne bua kudia bimpe ne kuibidija mubidi webe. Ke tshivua Javier udi ne muana ne bulema muenze. Udi wamba ne: “Bu mudi muananyi kayi mua kuenda, meme ndi ndienzeje bua kudia bimpe bua mpete makanda a kumona mua kumuendesha. Meme ke makasa ende.”

Mmunyi muudi mua kupeta dîba dia kuditabalela? Bamue baledi batu bashintakanangana bua kulama muanabu. Kuenza nunku kudi kuambuluisha bua muledi umue ikisha anyi atabalela majinga abu makuabu. Bidi mua kumueneka bikole, kadi udi ne bua kuangata dipangadika dia kumanya malu adi kaayi ne mushinga ne kuangata dîba diuvua ufila ku malu au ne kudifila ku diditabalela wewe nkayebe. Kadi anu bu mudi Mayuri mamu wa mu ditunga dia Inde wamba: “Mu kupita kua matuku neupete makanda a kudifila ku malu ebe a pa tshibidilu.”

Uyukile ne mulunda wa pa muoyo. Nansha balunda badi kabayi ne bana basama badi mua kukukankamija. Udi kabidi mua kulomba Yehowa mu disambila. Bulelela,  disambila nedikuambuluishe anyi? Yazmin udi ne bana babidi badi ne disama dia (mucoviscidose) ditu dipangisha muntu bua kupuyakana bimpe ne dimusamisha tshifu udi wamba ne: “Kuvua bikondo bivua malu mankolele ne ndiumvua anu bu muntu ukeba kufua.” Kadi udi wamba kadibi ne: “Mvua ndomba Yehowa bua angambuluishe ne bukole. Pashishe mvua ndiumvua mukumbana bua kutungunuka ne kuambula bujitu abu.”​—Musambu 145:18.

Disama dia muana didi mua kushintulula ndilu wa bena mu dîku, muaba udibu mua kuya ne dîba didi baledi bua kupitshisha ne muana yonso. Nunku, bana bakuabu badi mua kudiumvua bu kabena babatabalela. Baledi badi mua kudifila bikole ku disama dia muana bifuana kunyanga ne malanda abu a bena dibaka. Lionel, tatu mukuabu wa mu ditunga dia Libéria udi wamba ne: “Imue misangu mukajanyi utu wamba ne: ndi mumulekeele bujitu bua muana. Ntu ndiumvua anu bu ne: kena unemeka to, ne imue misangu ntu muamba mêyi mashile.”

TSHINUDI MUA KUENZA: Mbimpe kujadikila bana bebe bonso ne: udi uditatshisha bua bualu buabu, longolola malu adi abasankisha. Jenney utukadi batele kuulu eku udi wamba ne: “Imue misangu tutu tuenza bualu bua pa buabu anu bua muanetu wa kumpala, tudi mene mua kuya kudia nende mu restoran wende utuye musue bikole.”

Bua kulama dibaka dienu, ikalayi nuyukila ne nusambila pamue ne muena dibaka nebe. Aseem, tatu mukuabu wa mu ditunga dia Inde udi ne muana muikale ne disama dia kupaluka udi wamba ne: “Nansha mundi meme ne mukajanyi tudiumvue batshioke imue misangu ne malu matutonde, tutu tukeba dîba dia kusomba kaba kamue, kuyukila ne kusambila pamue. Dituku dionso mu dinda kumpala kua bana kabayi banji kujuka ku tulu, tutu tusomba kaba kamue bua kuyukila pa mvese kampanda wa mu Bible.” Bena dibaka bakuabu batu bayukila pa nkayabu kumpala kua kuyabu kulala. Miyuki inudi nuyukila pa nkayenu ne masambila anudi nuenza ne muoyo mujima nebikoleshe dibaka dienu mu bikondo bia ntatu mikole. (Nsumuinu 15:22) Anu mudi bena dibaka bakuabu bamba ne: “Bikondo bimpe bitudi katuyi mua kupua muoyo mu dibaka dietu, mbitudi bapitshishe pamue mu lutatu.”

Bible udi ulaya ne: mu katupa kîpi emu Nzambi nembushe masama onso ne ntatu bidi bitatshisha bana ne bakole. (Buakabuluibua 21:3, 4) Mu dituku adi, “muena musoko kena wamba ne: Ndi ne disama.” *​—Yeshaya 33:24.

Kadi bua mpindieu, udi mua kuikala bimpe bu muledi nansha muanebe yeye ne bulema. Carlo ne Mia batuvua batele kuulu eku badi bamba ne: “Kanuteketshi mu mikolo padibi bimueneka ne: malu onso kaena enda bimpe to, kadi nutambe kuimanyina pa malu mimpe a muanenu bualu adi anuku a bungi.”