Mandamuna a nkonko ya mu Bible
Bua tshinyi badi babikila Yezu ne: Muana wa Nzambi?
Nzambi katu ne mukaji muena dîna eu uvuaye mulele nende bana to. Yeye ke mufuki wa bionso bidi ne muoyo. Bantu bavua bafukibue ne mushindu wa kuidikija ngikadilu ya Nzambi. Ke bualu kayi badi babikila Adama muntu wa kumpala uvua Nzambi mufuke ne: “Muana wa Nzambi.” Bia muomumue, badi babikila Yezu ne: “Muana wa Nzambi” bualu bavua mufuke ne ngikadilu ya buena ya Tatuende.—Bala Luka 3:38; Yone 1:14, 49.
Dîba kayi divuabu bafuke Yezu?
Nzambi wakafuka Yezu kumpala kua kufukaye Adama. Nzambi wakafuka Yezu ne pashishe kuenzaye nende mudimu bua kufuka bintu bionso ne banjelu kabidi. Ke bua tshinyi Bible udi ubikila Yezu ne: “Muanabute wa bifukibua bionso” wa Nzambi.—Bala Kolosayi 1:15, 16.
Kumpala kua Yezu kuledibuaye mu Beteleheme, uvua ne muoyo mu diulu bu tshifukibua tshia mu nyuma. Pakakumbana tshikondo, Nzambi wakangata muoyo wa Yezu mu diulu kuwela mu difu dia Mariya bua aledibue bu muntu.—Bala Luka 1:30-32; Yone 6:38; 8:23.
Bua tshinyi Nzambi uvua muanyishe bua Yezu aledibue pa buloba bu muntu? Mmudimu kayi wa pa buawu uvua Yezu mukumbaje? Udi mua kupeta mandamuna a nkonko eyi mu Bible, ne neyikuambuluishe bua kuvudija dimanya diebe dia malu a mu Bible ne kuanyisha tshidi Nzambi ne Yezu benze bua bualu buebe.
