Pantshivua muana, baledi banyi bakabenganana kushipabu dibaka, nunku maman wakatukolesha meme ne bana betu babidi. Mu tshikondo atshi, bana bavua tumama mu ditunga dia France kabavua balonga tulasa bu mudibi bienzeka lelu to. Imue misangu mishindu ivuabu bakuata nayi mudimu bua kuambuluisha bana aba ivua ibatatshisha bikole. Kadi katshia ku buana buanyi mvua ne diakalenga divua tumama tua bungi katuyi nadi to. Lekelayi nnumvuije.

Imue misangu, balongeshi ba bungi bavua bela meji ne: kudi mushindu wa kulongesha bana badi tumama mua kuakula ne kumvua padibu batangila mudi mishiku ya balongeshi inyunga. Bushuwa, mu ditunga dia France mumvua mukolele, mbulamatadi uvua mukandike bua kulongesha bana muakulu wa tumama mu tulasa. Bavua basuika maboko a tumue tumama pa nyima mu tshikondo tshivuabu batulongesha.

Mu bidimu bianyi bia ntuadijilu, mvua mpitshisha mêba a bungi lumingu luonso ne munganga wa malu a tumama uvua undongesha mua kuakula. Bavua bankuata ku tshibanga anyi ku mutu ne bangenzeja bua mpatule dîyi dimvua tshiyi nansha ngumvua. Bivua binkolele bua kuyukila ne bana bakuabu. Bivua bidimu bia lutatu buanyi meme.

Pashishe, pangakapeta bidimu bisambombo, bakantuma mu tulasa tua tumama. Ke musangu wa kumpala uvua mutuilangane ne tumama tukuabu. Mu tulasa atu bavua kabidi bakandike muakulu wa tumama. Pavua muntu uteta bua kuyukila mu muakulu wa tumama mu kalasa, bavua bamukuma pa minu anyi bamukoka nsuki. Kadi tuvua tuakula mu musokoko ne jeste ya mu tuetu. Ndekelu wa bionso, ngakamanya mua kuyukila ne bana bakuabu. Ke mua katuadija bidimu bianyi binayi bia disanka.

Pamvua ne bidimu dikumi, mvua mu tulasa tupuekele ne bana bavua bumvua. Bavua banseka! Mvua ngela meji ne: tumama tukuabu tuvua tufue ne mvua mushale nkayanyi pa buloba. Bu muvua bena mu dîku dietu batumikila mibelu ivua baminganga bavua bamanye malu a tumama babambila, ne bu muvuabu ne buôwa bua ne: tshilu kupanga kuakula, bakabenga kulonga muakulu wa tumama ne kabavua bitaba bua meme kudisangisha ne tumama tukuabu to. Ndi mvuluka dituku dikuabu dituvua baye kutangila mumanga wa matshi, uvua ne mukanda wa muakulu wa tumama muteka pa mêsa. Pangakamona foto ivua pa tshizubu tshia mukanda, ngakamuleja ne munu, ne kumuambila ne: “Ndi musue mukanda eu!” Munganga kusokokaye diakamue mukanda au. *

Maman uvua uditatshisha bua kutulongesha mua kutumikila mikenji ya mu Bible. Uvua uya netu mu bisangilu bia Bantemu ba Yehowa bivuabu benza mu Mérignac pabuipi ne Bordeaux. Bu muntshivua muana, mvua ngumvua anu malu makese mu bisangilu. Kadi bena mu tshisumbu bavua balua kusomba ku luseke luanyi, bamfundila malu a bivuabu balongesha mu bisangilu. Dinanga diabu ne mushindu uvuabu baditatshisha bua bualu buanyi biakandenga bikole. Ku nzubu, maman uvua ulonga nanyi Bible, kadi tshivua nkuata bimpe bivuaye undongesha to. Mvua ndiumvua anu bu muprofete Danyele pavuaye mupete mêyi a buprofete kudi muanjelu, wakamba ne: ‘Ngakumvua mêyi aa, kadi tshiakaajingulula nansha.’ (Danyele 12:8) Kadi buanyi meme, lutatu luvua ne: “Mvua mmona, kadi tshivua ngumvua.”

Ku kakese ku kakese, malu malelela akatuadija kubuela mu muoyo wanyi. Ngakatuadija kunanga malu amvua ngumvua ne kuatumikila mu nsombelu wanyi. Ngikadilu mimpe ya bantu bakuabu ivua kabidi indongesha. Tshilejilu, Bible udi utuambila bua kuikala ne lutulu. (Yakobo 5:7, 8) Tshivua ngumvua bimpe tshivua kuikala ne lutulu kusua kumvuija to. Kadi, pamvua ntangila muvua bena Kristo bakuabu baleja ngikadilu eu, mvua mufike ku diumvua tshidi lutulu lumvuija. Bulelela, tshisumbu tshia bena Kristo tshivua tshingambuluishe bikole.

Dikuabu dituku pamvua ne bidimu dikumi ne bia mu njila, ngakamona tumama tukuabu tuyukila mu muakulu wa tumama. Ngakatuadija kudisangisha natu mumusokoko ne meme kutuadija kulonga muakulu wa tumama wa bena France. Ngakatungunuka ne kubuela mu bisangilu bia bena Kristo. Meme kumonamu Stéphane Ntemu mukuabu utshivua nsonga uvua uditatshisha bua bualu buanyi. Uvua wenza muende muonso bua kuyukila nanyi, ne meme kudia nende bulunda. Kadi bia dibungama, bakela Stéphane mu buloko bualu kavua musue kuenza mudimu wa busalayi to. Biakansama ku muoyo bikole! Mu tshikondo tshivua Stéphane mu buloko, ngakatuadija kuteketa mu mikolo ne tshivua kabidi nya mu bisangilu to.

Ngondo dikumi ne umue pashishe, bakapatula Stéphane mu buloko ne yeye kupingana kumbelu. Mvua ne disanka dia bungi pangakamona Stéphane uyukila nanyi mu muakulu wa tumama. Biakampitshila! Ntshinyi tshivua tshienzeke? Pavua Stéphane mu buloko wakalonga muakulu wa tumama wa bena France. Pamvua ntangila muvua Stéphane wenza jeste ne bianza biende ne muvuaye wenza ku mêsu, ngakumvua disanka dia bungi bua tshivua bualu ebu mua kungenzela.

Stéphane wakatuadija kulonga nanyi Bible. Tshikondo atshi ke tshingakatuadija kumvua bulelela bua mu Bible bimpe. Pantshivua muana, mvua ne tshibidilu tshia kutangila bimfuanyi bia mu mikanda yetu idi yumvuija Bible, bua kumona tshidibi biumvuija ne kukonkonona bimpe menemene bua kubueja malu adibi bindongesha mu lungenyi. Mvua mumanye Abalahama, “kakanunuina” kende, ne “musumba munene,” kadi anu pangakapeta diumvuija dia malu aa mu muakulu wa tumama ke pangakashisha kuumvua bimpe menemene. (Genese 22:15-18; Buakabuluibua 7:9) Biakamueneka patoke ne: mvua mupete muakulu wanyi, muakulu umvua munange ne muoyo mujima.

Mpindieu bu munkavua ngumvua bivuabu bulongesha mu bisangilu, biakandenga ku muoyo bikole ne mvua musue kulonga malu a bungi. Ku diambuluisha dia Stéphane, lumvu luanyi lua Bible lakatungunuka ne kuvula, ne mu 1992 ngakadilambula kudi Yehowa Nzambi ne kutambula. Kadi nansha mumvua muye kumpala, ntshivua anu ne bundu bua kuyukila ne bantu, bu mumvua tshiyi muibidile kuyukila nabu katshia ku buana.

Mu kupita kua matuku, bakasangisha kasumbu ka tumama kamvua ku tshisumbu tshia Pessac uvua kumpenga kua Bordeaux. Biakangambuisha bikole, ne meme kutungunuka ne kuya kumpala mu Dîyi dia  Nzambi. Nansha mumvua nduangana ne lutatu lua kuyukila ne bantu, balunda banyi bavua bumvua, bavua benza muabu muonso bua ngumvue malu onso bimpe. Bena dibaka bakuabu, Gilles ne mukajende Elodie bavua benza muabu muonso bua kuyukila nanyi. Bavua bambikila misangu ya bungi bua kuya kudia nabu anyi kuya kunua nabu kafé bisangilu bimane kujika. Bualu ebu buakangambuluisha bua meme kudia nabu bulunda bukole. Ndi ne disanka dia bungi bua mundi munkatshi mua bantu badi balonda mikenji ya Yehowa ya dinanga.

Anu mu tshisumbu emu ke mumvua mumonangane ne Vanessa. Mushindu uvuaye wenza malu ne buakane uvua unsankisha bikole. Nansha mumvua kamama kavua mumone bu bualu to. Kadi uvua mumone bu mushindu wa kulongaye mua kuyukila ne kamama. Mvua mulue kumunanga bikole, ne tuetu kuselangana mu 2005. Nansha muntshidi ne lutatu lua kuyukila ne bantu, mukajanyi Vanessa udi ungambuluisha bua meme kulekela bundu ne kudiunzulula kudi bakuabu. Ndi nganyisha diambuluisha diende bikole ne ndi nkumbaja majitu anyi bimpe.

Tshidimu tshituakaselangana, Betele wa France wa Bantemu ba Yehowa udi mu Louviers wakambikila bua meme kuya kulonga mudimu wa dikudimuna mu ngondo umue. Mu bidimu bidi panshi ebi, Betele udi wenza mudimu bikole bua kupatula mikanda yetu mishilashilangane mu muakulu wa tumama wa mu France mu DVD. Kadi bu muvuaku mudimu wa bungi, Betele uvua musue kusakidila bantu bakuabu mu mudimu wa dikudimuna eu.

Meme ne Vanessa tuvua bamone ne: kuenza mudimu ku Betele kuvua diakalenga dinene ne dibenesha dia kudi Yehowa Nzambi, kadi ku lukuabu luseke bivua kabidi bitutonda. Tuvua tudiebeja ne: ntshinyi tshivua mua kufikila kasumbu ketu ka tumama? Ntshinyi tshituvua mua kuenza ne nzubu wetu? Vanessa neapete mudimu mu tshimenga etshi anyi? Yehowa wakatuambuluisha bua kupita bimpe ne malu onso aa. Mu bulelela, ndi mumone mudi Yehowa mutunange ne munange bantu bonso badi tumama.

Pangakatuadija mudimu wa dikudimuna, ngakumvua bimpe tshionso tshidibu benza bua kuambuluisha tumama bua kumanya Nzambi. Ndi ne disanka dia bungi dia kumona mudi Bantemu nanyi ba bungi baditatshisha bua kuyukila nanyi. Jeste mikese idibu balonga ne benza bua kuyukila nanyi idi indenga bikole ku muoyo. Tshiena ndiumvua nkaya to. Malu onso a dinanga aa adi aleja buobumue bua pa buabu budi nabu bantu ba Yehowa.​—Musambu 133:1.

Ndi ne dianyisha dia bungi kudi Yehowa bua mudiye mulongolole tshisumbu tshia bena Kristo bua muntu yonso udimu ikale diambuluisha kundi. Ndi ne disanka bua mundi mfila dianyi diambuluisha dikese mu diambuluisha tumama nanyi bua kumanya Mufuki wetu wa dinanga ne kusemena kudiye. Ndi muindile ne muoyo kulu kulu dituku dikalabu mua kumbusha lutatu lua diyukila munkatshi mua bantu badi mu buobumue ne muikalabu mua kuakula “muakulu mukezuke,” mbuena kuamba ne: bulelela budi butangila Yehowa Nzambi ne disua diende.​—Sefanya 3:9.