Mvua mukolele pabuipi ne tshitudilu tshia mazuwa mu tshimenga tshia Turku. Tatuanyi uvua mututshianganyi munene wa mankomu, nanku meme ne muanetu mukuabu wa balume tuvua badifile petu bikole mu manaya a ditutangana mankomu. Pamvua mu kalasa mvua musue kuluangana bikole; tshivua ne buôwa bua kuluangana to. Bu mumvua nsonga, ngakabuela mu dingumba dia benzavi bavua bamanyike bikole, bavua bamfikishe ku malu a tshikisu a bungi. Meme kumanya kabidi mizike ya heavy-metal ne kutuadija kujinga bua kulua muimbi wa mizike ya rock.

Ngakasumba ndambu wa biamu bia kuimba nabi ne meme kuenza tshianyi tshisumbu tshia bimbi. Matuku makese meme kulua mulombodi wa tshisumbu atshi. Mvua musue kuenza malu a lukutukutu pamvua ngimba kumpala kua bantu. Bu muvua tshisumbu tshietu tshia bantu ba tshikisu ne bena luonji, tuakatuadija kumanyika bikole. Tuakatuadija kuimba kumpala kua bantu ba bungi. Tuvua bapatule bande mikese, bantu bakanyisha bikole bande wa ndekelu wa ku bande eyi. Ku ndekelu kua tshidimu tshia 1980, tuakaya mu ditunga dia États-Unis bua tshisumbu tshietu tshimanyike bikole. Tuakenza ndambu wa konsere mu tshimenga tshia New York ne mu Los Angeles, tuetu kumonangana ne bamue bena mu bibambalu binene bia malu a mizike kumpala kua tuetu kualukila mu ditunga dia Finlande.

Nansha mumvua munange bikole dingumba edi, mvua musue bua muoyo wanyi wikale ne tshipatshila. Lungenyi lua kutembangana ne lua malu a tshikisu bivua kudi bantu bavua mu malu a mizike bikavua bintonda. Meme kutuadija kumona kabidi mushindu wanyi wa kuenza malu ne lukutukutu utonda. Mvua ndimone muntu mubi ne mvua ne buôwa bua kuoshibua mu iferno wa kapia. Ngakatuadija kukeba mandamuna mu mikanda yonso ya malu a Nzambi. Meme kulomba Nzambi bikole bua angambuluishe nansha mumvua ngela meji ne: tshiena mua kuenza malu adi mua kumusankisha.

Bua meme kudiambuluisha, ngakatuadija kuenza mudimu ku biro kampanda bia muaba umvua musombele. Dimue dituku, meme kulua kumanye ne: muena mudimu netu mukuabu uvua Ntemu wa Yehowa. Ngakamuela nkonko mipite bungi. Mandamuna ende mimpe  avuaye mumpeshe ku diambuluisha dia Bible akankemesha bikole, ke meme kuitaba bua kulonga nende Bible. Meme mumane kulonga Bible mbingu mikese, bakabikila bena mu dingumba dianyi dia mizike bua kuya kupatula albume mu ditunga dia États-Unis bualu bavua ne bua kubapetsha makuta a bungi. Ke meme kumona ne: edi ke dianyi diakalenga.

Ngakambila Ntemu uvua undongesha Bible au ne: mvua musue kuanji kupatula albume mukuabu pashishe nentuadije kutumikila mêyi a mu Bible. Kavua mundeje mmuenenu wende to, kadi uvua anu mundombe bua kubala mêyi a Yezu adi mu Matayi 6:24. Mvese eu udi wamba ne: “Muntu nansha umue kena mua kuenzela bamfumu babidi mudimu to.” Ngakakema bikole pangakamanya diumvuija dia mêyi a Yezu aa. Kadi matuku makese pashishe, mulongeshi wanyi wa Bible wakakema pende bikole. Bualu ngakamuambila ne: ndi musue kulonda Yezu ne kulekela dingumba dia bimbi ba mizike.

Bible uvua anu bu lumuenu luvua lundeja bilema bianyi. (Yakobo 1:22-25) Mvua mumone ne: mvua muena tshimvundu, nditambisha ne muikale ne bipatshila bibi bitambe. Mvua ne ngakuilu mubi, mvua nduangana mvita, nnua diamba ne maluvu a bungi. Pangakalua kujingulula muvua malu anyi mabi amvua ngenza abengangana ne Bible, ngakumvua bibi bitambe. Nansha nanku, mvua mudisuike bua kushintulula nsombelu wanyi.​—Efeso 4:22-24.

Ku ntuadijilu bivua bintonda bikole pamvua mvuluka malu mabi amvua ngenza kumpala. Kadi Ntemu wa Yehowa uvua undongesha Bible wakangambuluisha bikole mu bualu ebu. Wakandeja tshidi Bible wamba mu Yeshaya 1:18 ne: ‘Nansha bikala mibi yenu mikunze kunzuu, neyikale ne butoke bua neige.’ Mvese eu ne mikuabu ivua mintuishe ne: Tatu wetu wa mu diulu mmuule tente ne luse ne mmusue kubuikidila bantu badi banyingalala bua bilema biabu.

Pamvua mufike kudimanya Yehowa ne kumunanga, ngakadilambula kudiye. (Musambu 40:8) Meme kutambula mu 1992 mu mpungilu wa Bantemu ba Yehowa wa bantu bafume mu matunga a bungi uvua muenzeke mu ditunga dia Russie mu St. Petersburg.

Ndi ne balunda bimpe bapite bungi munkatshi mua Bantemu ba Yehowa. Mpindieu tudi tudisangisha pamue bua kuimba misambu mimpe ne tusanka bua dipa edi dia kudi Nzambi. (Yakobo 1:17) Dibenesha dia pa buadi dindi mupete mmukajanyi Kristina undi musele. Ndi muenze nende malu a bungi mu bikondo bia masanka ne bia ntatu. Mvua kabidi mmuambila malu anyi a pa muoyo.

Bu meme tshiyi mulue Ntemu wa Yehowa, tshivua mua kuikala ne muoyo too ne lelu eu to. Kumpala, mvua misangu yonso ne malu ne ntatu. Kadi mpindieu ndi ne muoyo udi ne tshipatshila tshilelela, ndi mumone ne: bualu buonso budi pa muaba wabu.