Mêku adi ne mulume anyi mukaji mufume mu dibaka dikuabu atu misangu yonso ne lutatu lua mua kusomba bimpe ne bantu badi kabayi mu dîku diabu. * Baledi ba bungi badi basombe ne bana ba muledi mukuabu, badi ne bua kumvuangana bimpe ne muledi wa muana udiye musangane bua malu bu mudi: dîba didiye mua kumutangila, kumunyoka ne kumuambuluisha ne makuta. Balunda ne balela badi pabu ne bua kuenza muabu muonso bua kuibidilangana ne nsombelu wa bena mu dîku dipiadipia edi. Tumonayi mudi mibelu ya mu Bible mua kuambuluisha bantu badi mu dîku didi mulume anyi mukaji mufume mu dibaka dikuabu mua kutantamena ntatu eyi.

Mamu mukuabu diende Judith wa mu ditunga dia Namibie udibu basele kudi mulume mukuabu udi wamba ne: “Mamuende wa bana ba bayanyi wakambila bana bende ne: meme mvua mukaji mupiamupia wa tatuabu patupu ne bana batuvua mua kulela ne tatuabu kabavua mua kulua bana babu to. Mêyi ende aa avua matonde bikole menemene bualu ndi munange bana bende aba anu bu bana banyi balela.”

Bamanyi ba malu a mêku badi baleja ne: malanda adi pankatshi pa muana wa muledi mukuabu ne dîku didi muledi wende muenzulule adi mua kunyanguka ne bafuana  kufika too ne ku ditapuluka. Lutatu lutu lumueneka nangananga pankatshi pa mamu udi mushiye muana ne mukaji mukuabu udi bayende musele. Ntshinyi tshidi mua kubambuluisha?

Tshidi mua kuambuluisha: Udielele mikalu mu amue malu. Wewe kuyi muanyishile muledi mukuabu bua kuelaye dîyi mu malu a muana, nebitatshishe muanebe bikole mu lungenyi. * Baledi ba muana ‘badi bamulele’ badi ne muaba wa pa buawu mu nsombelu wa muana eu. (Nsumuinu 23:22, 25) Kadi wewe mupeshe muena dibaka nebe wa kale dîyi dia kuamba mu malu a bungi a mu dîku diebe dipiadipia, bidi mua kutonda muena dibaka nebe mupiamupia anyi kumufikisha munda. Dienzeje bua kuikala ne nkatshinkatshi, udielele mikalu mu amue malu mu malanda ebe ne muledi mukuabu bua kukuba dibaka diebe dipiadipia.

MIBELU BUA BALEDI

• Paudi uyukila ne muena dibaka nebe wa kale, muyuki wenu wimanyine anu pa malu a bana benu ne kanuyukidi malu makuabu a tshianana to. Tshilejilu, udi mua kuebeja ne budimu dîba dinudi mua kuikala nubikilangana ku telefone ku dituku. Kuenza nunku nkuimpe pamutu pa nuenu kuikala nubikilangana tshianana tshianana anyi butuku bumane kuila bikole.

• Wewe kuyi ne bukenji bua kulama bana bebe nuenu bamane kubengangana, udi pamuapa mua kuikala ubabikila ku telefone, ubafundila mikanda anyi ubatumina mesaje ku Enternete. (Dutelonome 6:6, 7) Bamue baledi badi mua kuyukila ne bana bamonangana mpala ku Enternete. Bidi mua kukuambuluisha bua kumanya majinga adi nawu bana bebe ne kubapesha mibelu mimpe idi mua kubambuluisha.

MIBELU BUA BAMAMU BADI MU DIBAKA DIDI NE BANA BA KUDI MUKAJI MUKUABU

• Leja muudi ‘uditeka pa muaba’ wa mamuende wa bana baudi nabu mu dîku bua amone bimpe ne: kuena mupingane pa muaba wende to. (1 Petelo 3:8) Misangu yonso ikala umuambila munudi basombe ne bana mu mêsu abu, utamba kuimanyina pa malu adi mimpe. (Nsumuinu 16:24) Mulombe mibelu ne umuele tuasakidila padiye ukupeshayi.

• Kuenji bua bana batambe kuleja mudibu bakunange bikole mu mêsu a mamuabu udi mubalele to. Mamu mukuabu diende Beverly wa mu ditunga dia États-Unis udibu basele kudi mulume udi mushale ne bana ba kudi mukaji mukuabu udi wamba ne: “Bana ba mukaji wa kale wa bayanyi bavua basue kuikala kumbikila ne: Maman. Tuakumvuangana nabu bua bikale bambikila maman anu patudi kumbelu kadi kabena mua kumbikila nunku kumpala kua Jane mamuabu mubaledi anyi kumpala kua bena mu dîku dia ba Jane to. Bualu ebu buakangambuluisha bua tuetu kumvuangana bimpe ne Jane. Pashishe tuvua tuambuluishangana bua mibelu ituvua mua kupesha bana bua manaya a mu tulasa ne padibu benza malu makuabu.”

MIBELU BUA BALEDI BENA BANA NE BALEDI BADI BASOMBE NABU

• Kuakudi bibi kumpala kua bana bua muledi muena bana baudi nabu anyi kuakudi bibi bua muledi udi musombe ne bana bebe. Bitu bipepele bua kuakula bibi bua muledi mukuabu, kadi bidi bitonda muana bikole. Kuena mumanye dîba ne mushindu wikalabu mua kuambulula mêyi ebe awu. (Muambi 10:20) Muana yeye mukuambile ne: muledi wende mukuabu anyi muledi udi musombe nende mmuakule bibi buebe wewe, leja muudi wangata tshidi muana eu mukuambile ne mushinga. Udi mua kumuambila ne: “Bidi bintonda bua muudi mumvue bualu  ebu. Mamuebe mmumfikile munda, imue misangu padi muntu ne tshiji udi mua kuamba malu adi kaayi mimpe.”

• Teta bua kuikala ne mikenji ne manyoka bia muomumue bua bebe bana ne ba muledi mukuabu. Koku kakuyi mushindu wa kuenza nunku, umvuija bana dishilangana didiku kuyi wakula bibi bua muledi mukuabu to. Londa kadinaya aka:

  Mamu udi ne bana ba muledi mukuabu udi wamba ne: Tim, bu wewe musue anyika esui-me webe ku nshinga.

  Tim udi wandamuna ne: Patuvua ne maman wetu tuvua tuyiteka anu panshi yeye ulua kutuanyikila.

  Mamu udi ne bana ba muledi mukuabu udi wamba ne tshiji ne: Dipota diebe, mamuenu uvua unulongesha bua kuikala bena lulengu.

  Mushindu udi mamu eu muandamune muana mmuimpe anyi?

  Mamu udi ne bana ba muledi mukuabu udi wamba ne lutulu ne: Mbimpe; kadi muaba eu muntu yonso udi udianyikila yeye nkayende.

• Epuka bua kupesha bana bebe bonso midimu dîba didibu balongolole bua kuya kutangila muledi mukuabu. (Matayi 7:12) Wewe kuyi ne mushindu wa kushintulula midimu iudi mupeshe bana, yukila ne muledi mukuabu udibu basue kuya kutangila kumpala kua kuambila bana tshiudi mulongolole.

Mukanda mukuabu (Step Wars) udi wakula bua mamu kampanda udi udiabakena bua mudi bayende utua ku tshia bana bende ba balume bakadi bantu bakole kayi witaba ne: bana bende abu kabena bamunemeka to. Mamu au udi wamba ne: “Diakamue, biakamfikisha munda bikole.” Mmunyi muudi mua kulama malanda ne bana ba muena dibaka nebe bakadi bantu bakole bua kukuba dibaka diebe?

Tshidi mua kuambuluisha: Ikala uditeka pa muaba wa bakuabu. Bible udi wamba ne: “Muntu yonso katungunuki ne kukeba anu diakalenga diende nkayende, kadi atungunuke ne kukeba dia mukuabu.” (1 Kolinto 10:24) Teta mua kumvua ne kujingulula majinga a bantu bakuabu. Bana ba muena dibaka nebe banudi nabu bakadi bantu bakole badi mua kudiumvua bu badi mua kujimija dinanga dia muledi wabu. Anyi badi mua kumvua ne: bobu basankidile muledi mupiamupia, badi mua kuleja ne: kabavua balamate muledi wabu udi mubalele to. Mu bulelela, baledi badi mua kumona ne: ki mbimpe kuamba bana mêyi mabi to, bualu bana badi mua kubenga kubalamata.

Pamutu pa kuenzeja bulunda ku makanda, lekela malanda ebe ne bana ba muena dibaka nebe banudi nabu adikolele nkayawu bimpe. Ki mbimpe kuenzeja muntu bua aleje dinanga dilelela to. (Musambu wa Solomo 8:4) Nunku ikala ne nkatshinkatshi ne meji mimpe bua malu audi mutekemene bua kukolesha malanda ebe ne bana ba muena dibaka nebe banudi nabu.

Kuambi malu onso audi wela meji anyi muudi udiumvua nansha bobu bakuenzele malu mabi to. (Nsumuinu 29:11) Padibi bikukolele bua kukanda ludimi luebe, sambila anu bu muvua Mukalenge Davidi wa mu Isalele musambile ne: ‘Yehowa, uteke mutentekedi bua kukanda mukana muanyi; ulame tshiibi tshia ku mishiku yanyi.’​—Musambu 141:3.

Wewe musue kumbuka mu nzubu muvua bana ba muena dibaka nebe bakolele, bidi mua kukukemesha  bua kumona bana banange bobu muaba au bikole. Kujingi mua kuangata dimuangala ne mushinga to, nangananga bua kubumbusha mu nzubu wabu wa kale. Udi kabidi mua kukonkonona diumbuka bua kuya muaba mupiamupia.

Mamu mukuabu diende Marion wa mu ditunga dia Canada udi ne bana bavua bayende mulele ne mukaji mukuabu udi wamba ne: “Baledi banyi bavua anu misangu ya bungi bapesha bana banyi bintu kabayi bapesha ba bayanyi to. Tuvua tudienzeja bua kubasumbila bana ba bayanyi bintu ebi, kadi imue misangu tuvua tupangila makuta.”

Tshidi mua kuambuluisha: Teka bena mu dîku diebe dipiadipia pa muaba wa kumpala. Ambila balela ne balunda bebe bua majitu audi nawu bua dîku dienu dipiadipia. (1 Timote 5:8) Nansha muudi kuyi mua kutekemena bua balela bebe bonso ne balunda bebe banange bena mu dîku diebe dipiadipia edi, udi mua kubalomba bua bikale ne bukalanga ne kabikadi ne kansungasunga. Ubumvuije mudibi mua kunyingalaja bana padibu kabayi babatabalela ne babenzela malu mimpe.

Enza bua baledi ba muena dibaka nebe wa kumpala bikale ne dîyi dia kuamba pa bana. Mamu mukuabu wa mu ditunga dia Angleterre diende Susan udi wamba ne: “Ndi mvuluka kukadi ngondo 18 panyima pa bayanyi wa kumpala mumane kufua, baledi bende bavua ne lutatu bua kuitaba mulume mupiamupia umvua nende. Malu akenda bimpe patuvua babashile mpunga wa kuela dîyi mu dîku dietu, tuambila bana betu bua bikale bababikila ne babela tuasakidila bua diambuluisha diabu.”

Malanda enu ne bantu badi kabayi bena mu dîku dienu adi mua kukebela bena mu dîku dinudi benzulule ntatu. Wewe utumikila mibelu ya mu Bible, bena mu dîku diebe badi mua kupeta mabenesha adi Bible mulaye aa: ‘Badi bibaka nzubu ne meji, dijingulula dia mianda didi dimujadika.’​—Nsumuinu 24:3.