Mvua muledibue mu tshimenga tshikese tshia Texcoco. Mu tshikondo atshi, njila ya bungi kayivua ne kabudimbu to, ivua ne lupuishi. Bantu bavua bafumina ku misoko ivua kumpenga ne tubalu tuabu bambule bintu bia kupana batangile mu tshimenga. Tuvua mu dîku dia bapele, dîku divua ne bana tshitema, meme mvua muana wa muanda mutekete. Tatuanyi uvua utela bisabata bua tuetu kupeta tshiakudia. Kadi wakafua pantshivua ne bidimu muanda mutekete. Katshia anu ku dîba adi, maman ke ukavua uditatshisha bua tuetu kupeta tshiakudia.

Kakuanyi muntu mulume uvua muimbi wa kidare, uvua kabidi mulombodi wa tshisumbu tshia bimbi bapiluke ba misambu ya Nzambi. Bena mu dîku dietu batue ku bonso bavua bamanye kuimba kidare. Maman uvua muimbi wa misambu mu tshisumbu kampanda tshia bimbi, manseba uvua pende muimbi ne uvua mumanye kuimba piano. Tuvua badifile bikole mu malu a tshitendelelu tshia Katolike. Bu mumvua muitabi wa misa, mvua musue kulua misionere wa bena Katolike. Anu mu tshikondo tshimue tshimue atshi, mvua munange filme ya bantu bakumangana miseba bikole. Bu mumvua ntangila filme ayi bikole, ngakatuadija kulua muena tshikisu.

Pamvua mu tshimenga tshia Puebla, ngakabuela mu tulasa tua malu a Nzambi tuvua bu seminere. Mvua musue kulua Abé. Kadi pangakafika mu tshidimu tshia ndekelu tshia tulasa etu, ngakatuadija kuteketa mu maboko bua tshitendelelu tshia Katolike. Mansere mukuabu utshivua nsongakaji wakajinga bua meme kulala nende. Ngakatantamena diteta edi, kadi bualu ebu bua kanjula dijinga dia meme kusela. Ngakajingulula kabidi ne: ba-Abé ba bungi bavua bena mpala ibidi. Ndekelu wa bionso, ngakalekela tshipatshila tshimvua natshi tshia kulua Abé.

 Ngakangata dipangadika dia kubuela mu tulasa tudibu balongesha bantu mizike mu tshimenga tshia Mexico. Pangakapeta diplome, meme kusela. Tuakalela ne mukaji eu bana banayi. Mvua ndisha dîku dianyi ne makuta avuabu bampesha kudi bena Katolike pamvua ngimba mu tshitendelelu tshiabu.

Kuntuadijilu, tuvua ne bilumbu mu dibaka dietu. Meme ne mukajanyi tuvua tuenzelangana malu a tshikisu bualu lungenyi luetu luvua luwule tente ne malu mabi. Kuntuadijilu, tuvua tupendangana, pashishe tukavua tulengangana too ne bianza pambidi. Ndekelu wa bionso, kunyima kua bidimu 13, tuakanji kulekelangana, pashishe tuetu kulua kushipa dibaka.

Mvua mupetangana ne Bantemu ba Yehowa bua musangu wa kumpala pamvua tshiyi muanji kubengangana ne mukajanyi. Bantemu babidi bakalua ku nzubu kuetu ne kundomba bua kulonga nabu Bible. Mvua ngela meji ne: mvua mumanye malu a Nzambi bikole, ke meme kutuadija kubaleja muvuabu kabayi bamanye tshintu. Meme kubela nkonko ya bungi imvua ngela meji ne: kayivua ne mandamuna to. Biakankemesha bualu bakandamuna nkonko yanyi yonso bimpe ne Bible. Ke meme kumona ne: tshivua mumanye tshintu to. Bu muvua mukajanyi kayi munange Bantemu, ne mumvua ne bia bungi bia kuenza, nunku katuakatungunuka nabu to.

Kunyima kua bidimu bitanu, ngakapetangana kabidi ne Bantemu ba Yehowa, ne tshikondo atshi nkavua mubanjije mukaji mukuabu diende Elvira. Elvira kavua mukine Bantemu ba Yehowa to, nunku bivua bipepele bua meme kutuadija kulonga Bible. Nansha nanku, ngakenza bidimu bia bungi bua meme kulekela nsombelu wanyi wa kale.

Ngakalua kumona ne: bua meme kutendelela Yehowa ne muoyo wanyi mujima, bidi bikengela meme kushintulula nsombelu wanyi bikole. Bualu bua kumpala bumvua ne bua kuenza, nkuimanyika mudimu wanyi wa dimba misambu mu tshitendelelu tshia Katolike, mbuena kuamba ne: mvua ne bua kukeba mudimu mukuabu bua meme kuambuluisha bena mu dîku dianyi. (Buakabuluibua 18:4) Mvua kabidi ne bua kufundisha dibaka dietu ne Elvira ku mikanda ya mbulamatadi.

Kadi bumue bua ku malu manene bumvua ne bua kuenza buvua kumanya mua kukanda tshiji tshikole tshimvua natshi. Mvese ibidi ya mu Bible eyi yakangambuluisha bikole. Musambu 11:5 udi uleja ne: Yehowa mmukine malu a tshikisu ne 1 Petelo 3:7 uvua mungambuluishe bua kumanya ne: meme musue bua Yehowa ateleje masambila anyi, ndi ne bua kunemeka mukajanyi. Pamvua ngelangana meji bua mvese eyi ne ndomba diambuluisha kudi Yehowa mu disambila, ku kakese ku kakese ngakafika ku didikanda.

Mpindieu ndi ne disanka mu dîku dianyi. Ndi ngenza muanyi muonso bua kuakaja malanda anyi ne bana banyi ba mukaji wa kumpala umvua nende ne ndi ngambuluisha bena mu dîku dianyi dia mpindieu bua kuikala ne ditabuja dikole.

Pantshivua muana mutekete, dijinga dianyi divua anu dia kulua Abé bua kuambuluisha bantu. Mpindieu ndi ne nsombelu udi ne tshipatshila. Ndi ndongesha mizike bua kuambuluisha bena mu dîku dianyi. Ndi ngela Yehowa tuasakidila bua mudiye mundeje lutulu luende, mumpeshe mpunga wa meme kushintulula nsombelu wanyi ne kulua muntu muimpe!