Kabatuku banji kukuenzela malu ne kansungansunga anyi? Kabatuku banji kubenga dilomba diebe, kukupala mudimu anyi bakuenzele bualu kampanda ne kapeja bua dikoba diebe, tshisamba tshiebe anyi bua nsombelu uudi nende anyi? Biobi nanku, kuena nkayebe to. Kadi lumu luimpe ndolu elu: malu mabi a mushindu eu adi matangalake pa buloba bujima kaena mu diulu to. Mupostolo Petelo wakamba ne dishindika dionso ne: ‘Nzambi kena ne kansungansunga to.’​—Bala Bienzedi 10:34, 35.

Petelo uvua muambe mêyi ende aa muaba uvuaye kayi ne tshibidilu tshia kuya; mmumue ne: mu nzubu mua Koneliyo uvua kayi muena Yuda. Petelo uvua muena Yuda, nunku mu tshikondo atshi bena Yuda bavua bamona bantu bavua kabayi bena Yuda bu bintu bia bukoya ne kabavua mua kudisangisha nabu to. Ntshinyi tshivua Petelo muye kuenza mu nzubu mua Koneliyo? Mu tshikoso, Yehowa Nzambi ke uvua mumutuangaje ne Koneliyo! Nzambi wakambila Petelo mu tshikena kumona ne: “Wewe lekela kubikila bintu bidi Nzambi mulengeje ne: mbibipe.” Nansha muvua Koneliyo kayi mumanye Petelo, dituku dimue kumpala, muanjelu wakatuma Koneliyo kudi simona Petelo mu tshikena kumona tshivuaye mupete. (Bienzedi 10:1-15) Pakajingulula Petelo ne: Yehowa ke uvua muenze bualu ebu, kavua mua kudikanda bua kuakula to.

Petelo wakamba ne: ‘Mpindieu ndi mujingulule bulelela ne: Nzambi kena ne kansungansunga to.’ (Bienzedi 10:34) Muaku wa tshiena Greke udibu bakudimuna ne: ‘kansungansunga’ udi umvuija ku muaku ku muaku ne: “musunguluji wa mpala.” Mumanyi kampanda wa malu a Bible wakamba bua muaku eu ne: “Batu bakuata mudimu ne muaku eu bua kuakula bua mulumbuluishi udi utangila mpala wa muntu ne ukosa tshilumbu, kayi ulondesha mudi tshilumbu, kadi utshikosa bilondeshile mudiye munange anyi mukine muntu.” Nzambi katu wanyisha mpala wa muntu kupita wa mukuabu bua dikoba diende, ditunga diabu, nsombelu wende anyi bua malu makuabu adi amueneka to.

Kadi Yehowa utu umona tshidi mu mutshima wetu. (1 Samuele 16:7; Nsumuinu 21:2) Petelo wakamba kabidi ne: “Udi witaba muntu wa mu tshisamba tshionso udi umutshina, udi wenza malu makane.” (Bienzedi 10:35) Kutshina Nzambi kudi kumvuija kumunemeka, kumupesha lumu ne kumueyemena pa kulekela malu adi amunyingalaja. Kuikala muntu muakane ku mêsu kua Nzambi kudi kumvuija kabidi kuenza malu adi mimpe ku mêsu kuende. Yehowa udi usanka bua muntu udi ne mutshima muule tente ne ditshina dia Nzambi didi mua kumusaka bua kuenza tshidi tshimpe.​—Dutelonome 10:12, 13.

Bobu kabayi banji kukuenzela malu ne kansungansunga, udi ne bua kupeta dikankamika mu mêyi avua Petelo muambe bua Nzambi. Yehowa udi ubikila bantu ba bisamba bionso mu ntendelelu wende mulelela. (Yone 6:44; Bienzedi 17:26, 27) Udi uteleja ne wandamuna masambila a batendeledi bende kayi utangila tshisamba tshiabu, ditunga anyi nsombelu wabu to. (1 Bakelenge 8:41-43) Tuikale bashindike ne: Padi Yehowa utangila pa buloba udi umona bantu anu mu mushindu umue. Bidiku bikusaka bua kulonga malu a bungi adi atangila Nzambi udi kayi ne kansungansunga eu anyi?