Udi mua kueyemena tshitendelelu mu malu a mvita anyi?
Alberto uvua wenza mudimu wa busalayi kukadi kupite bidimu bitue ku dikumi, udi wamba ne: “Pastere wetu uvua utubenesha wamba ne: ‘Nzambi udi nenu.’ Kadi mvua diambila ne: ‘Ndi nya bua kushipangana, eku Bible wamba ne: “Kushipianganyi.”’”
Ray uvua musalayi mu Mvita mibidi ya buloba bujima. Dimue dituku wakebeja pastere ne: “Udi mubande mu buatu bua kutusambidila bua tuetu kutshimuna, baluishi betu kabenaku pabu benza tshitudi tuenza etshi anyi?” Pastere wakamuandamuna ne: Mukalenge utu wenza malu mu mishindu itudi katuyi mua kujingulula to.
Pikala diandamuna edi kadiyi dikusankisha, kuena nkayebe to.
TSHIDI BIBLE ULONGESHA MU BUALU EBU
Yezu wakamba ne: mukenji wa Nzambi udi mutambe mikuabu ngua “kunanga muntu nebe bu muudi mudinange.” (Mâko 12:31) Yezu uvuaku musue kuleja ne: bua tuetu kunanga muntu bikengela tuanji kumanya muaba udiye usombela anyi ditunga diabu anyi? Tòo. Wakambila bayidi bende ne: “Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.” (Yone 13:34, 35) Dinanga divua munkatshi muabu divua ne bua kulua dikole, ne bantu bavua ne bua kubamanyina mu bualu ebu. Pamutu pa bobu kushipangana, bavua ne bua kufila mioyo yabu bua bakuabu.
Bena Kristo ba kumpala bavua benza malu mu diumvuangana ne mêyi a Yezu. Mukanda kampanda wa malu a tshitendelelu udi wamba ne: “Tertullien, Origène ne bafundi banene ba malu a Nzambi ba kumpala bavua bamba ne: bivua bikandikibue bua bena Kristo kushipangana, mukenji eu ke uvua mubambuluishe bua kubenga kubuela mu tshiluilu tshia mvita tshia bena Lomo.”
NTSHINYI TSHITU BANTEMU BA YEHOWA BENZA?
Bu mudi Bantemu ba Yehowa bikale mu matunga matue ku onso, batu badisangana mu matunga adi aluishangana. Kadi batu benza muabu muonso bua kulama dinanga didi dikale tshimanyinu tshiabu.
Bamfumu ba bitendelelu badiku balongesha mua kuikala ne dinanga dilelela dia bena Kristo anyi?
Tshilejilu, tshikondo tshiakakutuka mvita ya bukua bisamba mu ditunga dia Rwanda mu 1994, pankatshi pa ba-Hutu ne ba-Tutsi, Bantemu ba Yehowa bakabenga kudibueja mu bimvundu ebi. Bantemu ba bisamba ebi bavua basokokangane, nansha muvua bualu ebu buteka mioyo yabu mu njiwu. Pavua bantomboji ba ba-Interahamwe bakuate Bantemu babidi ba ba-Hutu bavua basokoke Bantemu nabu ba ba-Tutsi bakabambila ne: “Tudi ne bua kunushipa bualu nuvua basokoke ba-Tutsi bua katubashipi to.” Bia dibungama, bakashipa Bantemu babidi ba ba-Hutu abu.—Yone 15:13.
Udi wela meji kayi: malu adi Bantemu ba Yehowa benza aa kaenaku apetangana ne mêyi a Yezu adi aleja bua kunangangana bikole anyi?
