Mvua mukolele mu Warialda ka tshimenga kakese ka mu Nouvelle-Galles du Sud. Mu Warialda mudi madimi manene, muaba udibu bamunyina mikoko ne ngombe ne badi bakunamu mamiinu ne tubilunga tua tukese. Tshimenga etshi tshidi ne mankenda ne bena tshikisu bakese.

Bu mumvua muana wa bute mu dîku dia bana dikumi, ngakatuadija kuenza mudimu bua kuambuluisha dîku dietu pamvua ne bidimu 13. Bu mumvua tshiyi mulonge bikole, mvua ngenza mudimu ku madimi. Pangakakumbaja bidimu 15, ngakatuadija kuenza mudimu bu mulami wa tubalu.

Kuenza mudimu mu madimi kuvua ne mabenesha a bungi. Mvua kabidi munange mudimu ne muaba umvua ngenzela mudimu. Mvua nsomba kumpenga kua mudilu butuku ne ntangila ngondo ne mitoto midiadije muulu padi kapepele ka dilolo katuta mu tshisuku muaba umvua musombele. Ndi mvuluka mumvua mutuadije kuela meji ne: kudi ne bua kuikala muntu kampanda udi mufuke bintu bionso bia dikema ebi. Ku lukuabu luseke, bantu ba muaba umvua musombele bavua ne buenzeji bubi kundi. Mvua ngumvua tshiakuidi tshibi kudi bantu, ne biakansaka bua meme kutuadija kunua makanya. Dinua dia makanya ne tshiakuidi tshibi biakalua tshibidilu kundi.

Pangakakumbaja bidimu 18, ngakaya mu Sydney. Ngakajinga bua kubuela mu busalayi kadi mumvua tshiyi mulonge bikole bakambenga. Ngakapeta mudimu ne meme kusomba mu Sydney tshidimu tshimue. Tshikondo atshi ke tshimvua mupetangane ne Bantemu ba Yehowa bua musangu wa kumpala. Ngakitaba dibikila dia kubuela mu bisangilu biabu ne meme kujingulula diakamue ne: badi balongesha malu malelela.

Kadi kunyima kua matuku makese, ngakangata dipangadika dia kupingana muitu. Ngakasombela mu tshimenga tshia Queensland. Ngakapeta mudimu, meme kusela, kadi ngakatuadija kabidi kunua maluvu.

Tuakalela bana babidi ne mukajanyi. Tuetu bamane kulela bana aba, ngakatuadija kuela meji bikole bua muikala nsombelu  wanyi mu matuku atshilualua. Pangakavuluka malu amvua mumvue mu bisangilu bia Bantemu bingakabuela mu Sydney, ngakangata dipangadika dia kuenza bualu kampanda bua bimvua mumvue.

Ngakapeta Tshibumba tshia Nsentedi tshikuabu tshia kale tshivua ne adrese wa Betele wa Bantemu ba Yehowa ba mu Australie. Ngakabatumina mukanda bua kubalomba diambuluisha. Kabia kanenga to, ngakamona Ntemu mukuabu muena bulenga ne dinanga ulua bua kuntangila; wakatuadija kundongesha Bible.

Pamvua ndonga Bible, ngakalua kumona ne: mvua ne bua kushintuluka bikole mu nsombelu wanyi. Mvese kampanda wa mu Bible uvua mutambe kundenga bikole ngua 2 Kolinto 7:1. Mvese eu udi utukankamija bua “tudilengeje ku bukoya buonso bua mubidi.”

Ngakangata dipangadika dia kulekela kunua makanya ne maluvu. Kabivua bipepele bua kulekela malu aa to, bualu mvua muenze malu aa bidimu bia bungi. Kadi mvua mudisuike bua kuikala ne nsombelu udi usankisha Nzambi. Diambuluisha dinene dingakapeta ndiakutumikila mêyi adi mu Lomo 12:2 adi amba ne: “Lekelayi kuidikija malu a mu ndongoluelu wa malu eu, kadi nushintuluke, nukudimune meji enu.” Ngakajingulula ne: bua meme kushintulula nsombelu wanyi, ndi ne bua kushintulula ngelelu wanyi wa meji ne kumona bikadilu bianyi anu mudi Nzambi ubimona ne: mbibi. Ku diambuluisha diende, ngakakumbana bua kulekela dinua makanya ne dikuatshika dia maluvu.

Lutatu lunene lumvua nalu ndua kulekela tshiakuidi tshibi. Mvua mumanye ne: Bible udi wamba mu Efeso 4:29 ne: “Dîyi dibole kadipatuki mukana muenu.” Nansha nanku, tshiakalekela ngakuilu wanyi mubi eu lukasa to. Ngakamona ne: bivua bimpe bua kuelangana meji bua mêyi adi mu Yeshaya 40:26. Mvese eu udi wamba bua mitoto ya muulu ne: ‘Bandishayi mêsu enu kuulu, numone bienu! Wakafuka bintu ebi nganyi? Nyeye udi upatula misumba yabi, ubala bungi buabi, ne udi ubibikila buonso buabi mêna abi; ne bualu bua bunene bua bukole buende, ne bualu bua bukole bua bukokeshi buende, kakuena umue wabi udi upanga kumueneka.’ Meme kuela meji ne: bikala Nzambi ne bukole bua kufuka bintu bidi mu diulu ne pa buloba, bindi nganyisha pandi mbitangila, mu bulelela mmukumbane bua kumpesha bukole bua kushintulula nsombelu wanyi bua mmusankishe. Mu kusambila ne kudienzeja bikole, ngakatuadija ku kakese ku kakese kukanda ludimi luanyi.

Bu mumvua mulami wa bimuna, tshivua mpeta mpunga wa bungi wa kuyukila ne bantu, bualu kuvua anu bantu bakese mu madimi mutuvua. Kadi, ku diambuluisha dia dimanya dimvua mupete mu bisangilu bia Bantemu ba Yehowa, ngakamanya mua kuyukila ne bantu. Dimanya edi diakangambuluisha bua kumanya malu a bungi, tshilejilu bua kuyisha bakuabu lumu luimpe lua Bukalenge bua Nzambi.​—Matayi 6:9, 10; 24:14.

Ndi ne disanka dia kuenza mudimu munkatshi mua bidimu bia bungi bu mukulu mu tshisumbu tshia bena Kristo. Ndi mmona kuenza muanyi muonso bua kuambuluisha bena Kristo nanyi bu diakalenga dinene. Dibenesha dinene dimvua mupete ndia kuenzela Yehowa mudimu mu buobumue ne mukajanyi undi munange ne bana batudi balele nende.

Ndi ngela Yehowa tuasakidila bua mudiye mungitabile meme muntu udi mulonge tulasa tukese bua kulongeshibua kudiye. (Yeshaya 54:13) Mêyi a mu Nsumuinu 10:22 adi ansankisha bikole, adi amba ne: ‘Disankisha didi difuma kudi Yehowa didi divuija bubanji.’ Meme ne bena mu dîku dianyi tudi ne disanka dia kulonga malu a bungi pa bidi bitangila Yehowa ne bua kumuenzela mudimu bua kashidi ne tshiendelele.