Mvua mukolele mu Santiago tshimenga tshikulu tshia ditunga dia Chilie muaba uvuabu banua diamba, muikale mangumba a benzavi ne malu a tshikisu. Pamvua ne bidimu bitanu, bakashipa papa wanyi. Pashishe, tatu mukuabu uvua ne tshikisu wakabanjija maman wanyi. Uvua utukuma misangu yonso. Pantu mvuluka bidimu abi, bitu anu binsama ku muoyo.

Pamvua ngenda nkola, ngakalonda dikasa dibi, meme kulua muena tshikisu tshikole. Mvua nteleja misambu mibi, nkuatshika maluvu bikole ne imue misangu nnua diamba. Tuvua tuluangana misangu ne misangu ne bapanyi ba diamba mu njila, misangu ya bungi bavua bakeba kunshipa. Musangu mukuabu, muntu wa mu dingumba dikuabu dia benzavi uvua muntumine muluanganyi wa mvita muende lumu bua kunshipa, kadi ngakanyema ne mputa wa kele kavuaye muntue. Musangu mukuabu kabidi, dingumba dia bapanyi ba diamba diakanteka ka tshingoma ku mutu bajinga ku ngowa.

Mu 1996, ngakananga nsongakaji mukuabu diende Carolina, ne mu 1998 tuakaselangana nende. Patuakalela muanetu wa kumpala, ngakatuadija kumvua buôwa bua tshikisu tshimvua natshi, bualu mvua mua kulua bu tatu uvua musele maman wanyi ne kukengesha bena mu dîku dianyi. Meme kukeba diambuluisha mu tshibambalu tshivua tshiambuluisha benzavi bua kushintuluka. Bakangondopa, kadi tshivua anu mushintuluke to. Nkavua mfika munda too ne bua ka bualu kakese; tshiyi mua kudikanda to. Mvua njinga kudishipa bualu mvua nkengesha dîku dianyi. Kadi tshivua mulue kudishipa to.

Bidimu bia bungi kumpala tshivua ngitaba dikalaku dia Nzambi, kadi mvua mulue kujinga bua kumumanya. Nunku ngakatuadija kubuela mu tshitendelelu tshikuabu. Mu tshikondo atshi, mukajanyi uvua ulonga Bible ne Bantemu ba Yehowa. Mvua mukine Bantemu ba Yehowa, ne misangu ya bungi mvua mbamba malu a busenji. Kadi misangu yonso bavua bangandamuna bimpe, mu mushindu umvua tshiyi mutekemene to.

Dikuabu dituku, Carolina wakandomba bua kubala Musambu 83:18 mu Bible wanyi. Mvese eu udi uleja patoke ne: dîna dia Nzambi n’Yehowa. Bivua binkemeshe bikole bua kumona ne: mu tshitendelelu tshimvua bavua bakula bua nzambi, kadi kabavua bakula bua Yehowa to. Ku ntuadijilu kua 2000, ngakatuadija panyi kulonga Bible ne Bantemu ba Yehowa.

Pangakatungunuka ne kulonga, ngakapeta disulakana pangakamanya ne: Yehowa n’Nzambi udi uditeka pa muaba wa bakuabu ne ubafuila luse. Tshilejilu, mu Ekesode 34:6, 7, Bible udi wamba ne: Yehowa ‘n’Nzambi wa luse ne dinanga, kena ukuata tshiji lubilu, udi muule tente ne luse lujalame ne bushuwa, udi uleja binunu bia bantu luse lujalame, udi ubuikidila bantu mapanga abu ne kusambuka kuabu kua mikenji ne malu mabi abu.’

Nansha nanku, kabivua bipepele bua meme kutumikila malu avuabu bandongesha. Mvua mutuishibue ne: tshia kukokesha bua kulekela tshikisu tshimvua natshi to. Dîba dionso dimvua ngalukila tshianyima, Carolina uvua unkankamija bua kuya kumpala. Uvua umvuluija ne: Yehowa uvua umona mushindu umvua nditatshisha awu. Dingambuluisha diende diakampesha bukole bua kutungunuka ne kusankisha Yehowa nansha mumvua ngela meji ne: tshiakukumbana to.

Dikuabu dituku, mulongeshi wanyi wa Bible Alejandro wakandomba bua kubala Galatiya 5:22, 23. Mvese eyi idi yamba ne: Dimuma dia nyuma wa Nzambi didi: “dinanga, ditalala, muoyo mule, bulenga, buimpe, ditabuja, bupole, didikanda.” Alejandro wakangumvuija ne: nyuma wa Nzambi ke udi mua kungambuluisha bua kuikala ne ngikadilu eyi, kadi ki nganu ku bukole buanyi meme nkayanyi to. Bulelela ebu buakashintulula mmuenenu umvua nende bikole!

Pashishe ngakabuela mu mpungilu munene wa Bantemu ba Yehowa. Bulongame, mankenda, bulunda bimvua mumone kudi Bantemu mu mpungilu eu biakantuisha ne: mvua mupete tshitendelelu tshilelela. (Yone 13:34, 35) Ngakatambula mu ngondo muibidi mu 2001.

Yehowa mmunshintulule, mvua muntu wa tshikisu, mpindieu ndi muena ditalala. Ndi ngela meji ne: mmungumbushe mu bitotshi munkavua mudiine. Bantu ba bungi bavua bankine, kadi tshiena mbenzela bualu to. Kadi mpindieu, ndi ne disanka dia kuenzela Nzambi mudimu ne mukajanyi ne bana banyi babidi.

Balela banyi ne balunda banyi ba kale badi bakema bikole bua mundi mushintuluke. Ke bualu kayi ba bungi ba kudibu mbitabe bua kulonga bulelela bua mu Bible. Ndi kabidi ne diakalenga dia kuambuluisha bantu bakuabu bua kumanyabu Yehowa. Bidi bienza disanka bua kumona mudi bulelela bua mu Bible bushintulule nsombelu wabu!