Wewe muikale muledi udi ne muana utshidi nsonga, neumone ne: matandu adi aleja mudi mudimu wa buledi mukole ne ulomba kuikala ne lutulu. Maria mamuende wa muana wa bidimu 14 wa mu ditunga dia Brésil udi wamba ne: “Pavua muananyi wa bakaji kayi unnemeka mvua ngumvua tshiji tshikole.” Carmela wa mu ditunga dia Italie udi mutuilangane ne lutatu lua muomumue udi wamba ne: “Pavua tshiji tshitukuata, tuvua tutuadija kukokangana. Ndekelu wa bionso, muananyi wa balume eu uvua uya kudikangila mu nzubu muende utuadija kutanda ne dîyi dikole.”

Bua tshinyi bamue bana batshidi bansonga batu bamueneka bikale ne bilumbu? Ke tshidibu bamona kudi bansonga nabu anyi? Imue misangu. Bible udi wamba ne: bantu badi muntu upetangana nabu badi ne buenzeji bukole kudiye, buimpe anyi bubi. (Nsumuinu 13:20; 1 Kolinto 15:33) Manaya a bungi adi akoka ntema ya bana lelu adi abasaka ku lungenyi lua buntomboji ne ku dibenga kuikala ne kanemu.

Kadi kudi malu makuabu audi mua kukonkonona adi kaayi makole mua kupita nawu paudi ujingulula mudiwu ne buenzeji kudi muanebe. Tukonkonone bimue bilejilu.

Mupostolo Paulo wakafunda ne: “Pamvua muana, mvua ngakula bu muana, mvua ne lungenyi lua buana, mvua ngela meji bu muana; kadi mpindieu unkadi muntu mukole, ndi mulekele malu a buana.” (1 Kolinto 13:11)  Mêyi a Paulo aa adi aleja ne: bana ne bantu bakulumpe badi bela meji mu mushindu mushilangane. Mmu mushindu kayi?

Bana batu bamona bualu buonso ne: mbuimpe anyi ne: mbubi. Kadi, bantu bakulumpe batu bamona ngenyi idi misokome ne bela meji bikole kumpala kua kuangata dipangadika kampanda. Tshilejilu, bantu bakole badi mua kukonkonona malu a bikadilu bilenga ne kuela meji mudi bienzedi biabu mua kutonda anyi kusankisha bakuabu. Ke mutu baledi bela meji pa tshibidilu. Kadi bana kabatu bela meji nunku to.

Bible udi ukankamija bansonga bua kukoleshabu lungenyi luabu anyi ‘bukole bua kupangadija malu.’ (Nsumuinu 1:4) Bushuwa, Bible udi ulomba bena Kristo bonso bua kuenza mudimu ne ‘tshieledi tshiabu tshia meji.’ (Lomo 12:1, 2; Ebelu 5:14) Imue misangu, mushindu udi muanebe utshidi nsonga wela meji udi mua kumusaka bua kukokangana nebe nansha mu tumalu tukese. * Anyi udi mua kukuleja mmuenenu wende kampanda, kadi umueneka patoke mudiye kayi wela meji bimpe. (Nsumuinu 14:12) Mu nsombelu wa mushindu eu, mmunyi muudi mua kuelangana meji ne muanebe kanuyi nukokangana?

Paudi welangana meji ne muanebe, kuedi meji ne: wewe ngudi ne dîyi dia ndekelu dia kuamba to. Nansha muanebe umueka bu udi kayi musue kuitaba tshiudi wamba, imue misangu mu kupita kua matuku udi mua kulekela dikokangana nebe ne kutuadija kuitaba tshiudi umuambila. Kabikukemeshi bua kumona mu matuku makese muanebe upinganyina lungenyi luuvua mufile pamuapa uleja ne: yeye ke muenalu.

Kenji wa mu ditunga dia Japon, udi wamba ne:“Imue misangu meme ne muananyi wa balume tutu tukokangana bua tumalu tukese, bu mudi dinyangakaja dia bintu anyi bua diyobola muakunyende wa bakaji. Mu malu a bungi utu musue bua mmuebeje tshivuaye wela meji ne mmuleje mundi mumumvue ne mmuambile ne: ‘Aah, ke mudi bualu nanku’ anyi ne: ‘Ke tshivua usua kuamba.’ Pandi ngela meji bimpe, ndi mmona ne: bu meme mumuambile mêyi a buena au, imue misangu katuvua mua kuikala tukokangana bikole to.”

Bualu bunene mu dikolesha dia muana utshidi nsonga nkumulongolola bua enze malu bu muntu mukulumpe dituku dikalaye mua kumbuka kumbelu bua kuya kusomba wende muaba. (Genese 2:24) Mu tshikondo etshi baledi badi balongolola bumuntu bua muana bua alue muntu wa nsongo. Padi nsonga udi mumanye tshidiye bimpe utuilangana ne buenzeji bubi bua bantu bakuabu, neele meji bikole bua tshidiye mua kuenza pamutu pa kuimanyina anu pa bipeta bibi bidi mua kumufikila. Udi mua kudiebeja ne: ‘Ndi muntu wa mushindu kayi? Mmalu a mushindu kayi a mushinga andi mulamate? Ntshinyi tshivua muntu udi mulamate malu a mushinga mua kuenza mu bualu ebu?’​—2 Petelo 3:11.

Bible udi utuambila bua Jozefe nsongalume uvua mumanye bimpe tshidiye. Tshilejilu pavua mukaji wa Potifa umuenzeja bua kulala nende, Jozefe wakamuambila ne: “Mmunyi mundi mua kuenza bualu bubi bunene nunku ne kuenzela Nzambi bibi?” (Genese 39:9, NW) Nansha muvuaku kakuyi mukenji uvua ukandika bena Isalele bua kuenda masandi, Jozefe uvua mumanye tshivua mmuenenu wa Nzambi mu bualu ebu. Kabidi, mêyi ende a ne: “Mmunyi mundi” adi aleja ne: uvua umona malu mu mushindu uvua Nzambi uamona.​—Efeso 5:1.

Nansha muanebe pende udi mua kuikala wenda ukolesha bumuntu buende. Bualu ebu budi ne mushinga bualu yeye mutuishibue bua malu kampanda, nebimuambuluishe bua kupita bimpe ne buluishi bua bena mulongo nende, ne neashale mushindame. (Nsumuinu 1:10-15) Kadi bumuntu ebu budi kabidi mua kumusaka bua kubenga kukuteleja nansha wewe. Bualu bua nunku bobu bukufikile, ntshinyi tshiudi mua kuenza?

Kuikala ne bumuntu buimpe ne kulamata bikole ku malu mimpe kudi ne mushinga wa bungi. Bible udi wamba ne: bena Kristo kabena ne bua kujinga kuikala bu bana badibu “batambakaja anu bu kudi mavuala, baya nabu eku ne eku kudi lupepele luonso lua dilongesha.” (Efeso 4:14) Nunku, ambuluishe muanebe bua akoleshe bumuntu buende ne ikale mulamate ku malu adi mimpe.

Ivana wa mu République Tchèque udi wamba ne: “Pandi ngambila bana banyi ba bakaji ne: ndi musue kubateleja, batu pabu banemeka bipepele mmuenenu wanyi nansha yeye mushilangane ne wabu. Ntu nditatshisha bua kubenga kubenzeja bua balonde ngelelu wanyi wa meji, kadi ntu mbalekela bua baleje wabu ngelelu wa meji.”

Bamue bana batu ne tshibidilu tshia kuambulula malu amue amue awu bua baledi babu bashintulule mmuenenu wabu. Bualu bua mushindu eu bobu buenzeka misangu ne misangu mu dîku diebe, wikale mudimuke. Nansha mudi kuanyishila muana bua kuenza amue malu mua kumusankisha, udi ulongesha muanebe ne: bua yeye kupeta tshidiye ujinga anu yeye mukokangane nebe. Ntshinyi tshiudi mua kuenza? Londa mubelu wa Yezu eu: “Panudi nuamba dîyi ne: ‘Eyowa,’ dikale anu eyowa; panudi nuamba ne: ‘Tòo,’ dikale anu tòo.” (Matayi 5:37) Bana nebikale kabayi bakokangana nebe bobu bajungulule ne: udi mulamate ku mêyi ebe.

Kadi wikale ne nkatshinkatshi. Tshilejilu, lekela muanebe umvuije bua tshinyi udi umona ne: udi ne bua kuakajulula imue mikalu iudi mumuelele mu amue malu. Mu bualu bua mushindu eu, kuena witaba tshidi muana wamba bua mutoyi udiye ukuela, kadi udi ulonda mubelu wa mu Bible wa ne: “Enzayi bua bantu bonso bamanye ne: kanuena bena malu makole.”​—Filipoyi 4:5.

Bushuwa, kakuena muledi udi mupuangane to. Bible udi wamba ne: “Tuetu bonso tutu tulenduka misangu ya bungi.” (Yakobo 3:2) Wewe mumone ne: udi pebe ne tshiudi muenze bua nufike ku dikokangana, kuelakanyi bua kulomba muanebe luse. Paudi witaba tshilema tshiebe, udi ufila tshilejilu tshia budipuekeshi ne upesha muanebe tshilejilu tshimpe tshia yeye kulondaye.

Kenji wa mu ditunga dia Japon udi wamba ne: “Tuetu bamane kukokangana, pavua tshilunji tshianyi tshituya, mvua ndomba muananyi wa balume luse bua mumvua muakule bibi. Bivua bimuambuluisha bua kupuekesha pende tshilunji, ne bivua bimuambuluisha bua kuntelejaye bimpe.”