Kukadi bidimu bitue ku 3 000, mufundi wa tusala kampanda wa kafunda ne: “Ndi muenjibue mu mushindu wa dikema udi wenza buôwa.” (Musambu 139:14, NWT) Paudi utangila mushindu udi muana ukola kumbukila ku mukuji umue, kabienaku bikukemesha anyi? Bantu ba bungi badi bitaba ne: bintu bidi ne muoyo mbienza kudi Mufuki kampanda.​—Bala Musambu 139:13-17; Ebelu 3:4.

Eu udi mufuke diulu ne bidimu ne buloba budi bantu basombe ke udi mufuke kabidi muoyo. (Musambu 36:9) Uvua muyukile ne bantu bua kutumvuija tshidiye.​—Bala Yeshaya 45:18.

Mu mishindu ya bungi, bitupa bia mubidi wetu bidi bipetangana ne bia nyama. Bidi nanku bualu Mufuki uvua mufuke bantu ne nyama bua kuikalabu ne muoyo pa buloba. Uvua mudianjile kufuka muntu kayi mufumine ku nyama, kadi mufumine ku buloba.​—Bala Genese 1:24; 2:7.

Bantu mbashilangane ne nyama mu mishindu minene ibidi. Wa kumpala, bantu badi ne mushindu wa kumanya malu, kunanga ne kunemeka Mufuki. Muibidi, nyama kayivua mifukibue bua kuikala ne muoyo tshiendelele to, kadi bantu bavua bafukibue bua kuikala ne muoyo tshiendelele. Kadi lelu, bantu bonso mbapiane lufu bualu muntu wa kumpala wakabenga bulombodi bua Mufuki.​—Bala Genese 1:27; 2:15-17.