Bilondeshile diksionere kampanda, muaku sianse udi umvuija “mushindu kampanda wa dilonga bufuki ne mudi bintu bia mu diulu ne bia pa buloba bidi bimueneka bienza mudimu, dilonga edi ndimanyine pa dibijoja ne ntema yonso, dibiteta bua kumona mudibi bienza mudimu ne dibipima.” Kuenza nunku mmudimu mukole utu nangananga utshiokesha mu lungenyi. Bena malu a sianse badi bapatata ne diteta ne dijoja edi munkatshi mua mbingu, ngondo anyi bidimu bia bungi. Imue misangu kabatu anu bapete bualu bua nsongo to, kadi misangu ya bungi makebulula abu atu ambuluisha bantu. Tuangate bilejilu bikese ebi.

Tshiapu kampanda tshia ku mputu tshiakasangisha bindundu ne bimue bintu bia kutata nabi mâyi bua kupatula tshiamu kampanda tshidi tshiambuluisha bantu bua kuepuka masama adi afuma ku dinua mâyi mabi. Batu benza mudimu ne biamu bia mushindu eu tshikondo tshia bikumina, bu mudi tshivua tshienzeke mu Haiti mu 2010.

Mu tshibuashibuashi emu, satellite ya bungi itu yenza mudimu pamue bua kupatula tshitubu babikila ne: GPS (tshiamu tshidi tshileja muntu muaba udiye). GPS uvua mueza bua basalayi, kadi udi wambuluisha bendeshi ba mashinyi, ba ndeke, ba mazuwa a pa mâyi nansha bilembi ne bena ngendu bua kumanya njila. Ku diambuluisha dia bena sianse badi bamuenze, GPS udi wambuluisha muntu bua kumanyaye kudiye musue kuya.

Utu ne telefone anyi? Utu ne ordinatere peshi Enternete anyi? Ukadiku mumone mudi makanda ebe a mubidi makane bua mudi malu luondapu maye kumpala anyi? Utu wenza ngendu ne ndeke anyi? Biobi nanku, tshimue tshia ku bintu bidi bena malu a sianse benze bua bantu tshidi tshikuambuluisha. Malu a sianse mmakuambuluishe mu mishindu ya bungi.

Bu mudi bena malu a sianse bajinga kuvudija dimanya diabu, badi benza bikole makebulula mu bifukibue bidi pa buloba. Bamanyi ba malu a atome mbadifile bikole bua kumanya bidi munda mua atome, eku bamanyi ba malu a mabulunge pabu bakonkonona malu a kale akadi menze bidimu miliyare ya bungi bua kumanya muakatuadija bintu bidi mu tshibuashibuashi. Bu mudi bamue bena malu asianse badisuike bua kuya kule, too ne mu miaba idi kayiyi imueneka ne idi kayiyi kulenge, badi bela meji ne: bikala Nzambi wa mu Bible udiku, bobu badi mua kufika muaba udiye.

Bamue bena malu a sianse ne bena nkindi badi bamanyike bikole mbaye kule be! Mbatungunuke ne kulonda lungenyi lua muena malu sianse Kampanda diende Amir Aczel lua ne: “malu sianse adi ajadika ne: Nzambi kenaku.” Tshilejilu, mumanyi kampanda wa malu a fizike muende lumu udi wamba ne: “bu mudiku kakuyi tshijadiki tshia mudi Nzambi kampanda wenza malu mu bifukibue, kakuyi mpata, Nzambi wa nunku kenaku nansha.” Bakuabu badi bangata bintu bidi Nzambi muenze ebi bu malu a “majimbu” anyi bintu bidi kabiyi biumvuika to.” *

 Kadi, lukonko ludi lujuka: Malu adi bena sianse balonge aa mmabafikishaku ku dimanya dijalame dia malu onso adi atangila bifukibue anyi? Tòo. Bena malu a sianse mbalonge malu a bungi, kadi babungi ba kudibu badi bitaba ne: kutshidi malu a bungi a kumanya ne makuabu atudi katuyi mua kufika ku dimanya. Steven Weinberg, mumanyi wa malu a fizike wakapeta difutu dia Nobel mu dimanya dia malu a bifukibue, wakamba ne: “Katuakufika anu ku dimanya bimpe malu onso to.” Martin Rees mulongeshi kampanda wa malu a mabulunge mu Grande-Bretagne wakafunda ne: “Kudi bimue bintu bidi bantu kabayi mua kufika ku diumvua nansha kakese.” Tshia kumanya ntshia ne: kutshidi malu a bungi a kumanya ne makuabu atudi katuyi mua kufika ku dimanya mu bifukibue bia bungi, kutuadijila ku tutupa tukese tua mubidi (selile) too ne ku bintu binene bidi mu tshibuashibuashi emu. Mona bilejilu bidi bilonda ebi:

• Balongi ba malu a muoyo ki mbanji kumanya bionso bidi bienzeka munda mua selile udi ne muoyo to. Ki mbanji anu kumanya bimpe mudiyi idia, mudiyi ipatula proteyine ne mudiyi iditapulula to.

• Bukole butu bukoka bintu butu ne buenzeji kutudi dituku dionso edi. Kadi butshidi anu tshishima kudi bena malu a sianse. Ki mbumvue anu bimpe menemene mudi bukole ebu bukoka muntu, bumupingaja pa buloba padiye utumpika muulu anyi mudibu bulama ngondo pa muaba wende padiye unyunguluka buloba.

• Bamanyi ba malu a mu tshibuashibuashi badi batshinka ne: bia pa lukama 95 bia bintu bidi mu tshibuashibuashi kabiena bimueneka ne mêsu nansha ne biamu biabu to. Badi batapulula bintu ebi mu mishindu ibidi: bintu bifike ne bukole bufike. Mushindu udi bintu ebi ki mmumanyike to.

Kudi kabidi malu makuabu adi kaayi mamanyike adi atatshisha bena sianse. Bua tshinyi bidi ne mushinga? Mufundi wa malu a sianse kampanda muende lumu wakamba ne: “Malu atudi katuyi bamanye nga bungi kupite atudi bamanye. Buanyi meme, malu a sianse adi ne bua kutukemesha ne kutusaka bua kualonga bikole pamutu pa kushala balamate anu tshitudi tuetu bamanya.”

Nunku wewe udiebeja bikale malu a sianse mafuane kupingana pa muaba wa Bible ne kutupangisha bua kuitabuja Nzambi, tangila bualu ebu: Bikala bena malu a sianse banene ne biamu biabu binene bafike ku dimanya anu malu makese patupu mu bifukibue, netulejaku ne: tudi ne meji tuetu babenge musangu umue bua kuenza makebulula bua kumanya malu makuabu adi bena sianse bapangile anyi? Mukanda kampanda wakamba patoke bua bualu ebu ku ndekelu kua tshiena-bualu tshiawu tshile tshivua tshiakula bua muvua malu a mabulunge matuadije ne maye kumpala wamba ne: “Mu bidimu bitue ku 4 000 bikadi malu a mabulunge menze, tshibuashibuashi tshitshidi anu tshikemesha kupita ne muvuatshi tshikemesha bena Babilona.”​—Encyclopedia Britannica

Bantemu ba Yehowa badi banemeka bukenji budi muntu nabu bua kuangata dipangadika mu bualu ebu. Tudi tudienzeja bua kulonda mubelu wa mu Bible eu: “Enzayi bua bantu bonso bamanye ne: kanuena bena malu makole.” (Filipoyi 4:5) Ke bualu kayi tudi tukulomba bua kukonkonona mudi Bible upetangana ne malu a sianse.