Mvua mukolele mu Los Angeles, mu Californie mu ditunga dia États-Unis, mu miaba ivua mimanyike bikole bua buenzavi ne dinua dia diamba. Tudi basambombo kuetu, meme ndi muana muibidi.

Mamu uvua mutukoleshile mu Ekeleziya wa evanjelike. Kadi bu muntshivua nsonga, mvua muena mpala ibidi. Mu Dialumingu mvua ngimba mu korale wa mu tshitanda. Matuku makuabu a mu lumingu mvua ntshishila mu mafesto, nnua diamba ne ngenda bundumba.

Mvua ne tshiji tshikole tshia lukasa. Mvua nduangana ne tshintu tshionso tshivua ku bianza bua kutshimuna. Malu amvua mulonge mu tshitanda kaavua mangambuluishe to. Mvua ne tshibidilu tshia kuamba ne: “Disombuela ndia Mukalenge, kadi meme ndi tshiamu tshiende tshia mudimu.” Pantshivua mu tulasa tua bikadilu mu bidimu bia 1960, mvua ndonda lungenyi lua tshisumbu tshia tshididi tshivua tshimanyike bua muvuatshi tshimanyina manême a bantu, bavua batshibikila ne: Black Panthers. Ngakabuela mu tshisumbu tshia balongi bavua bimanyina manême a bantu. Misangu ya bungi tuvua tubenga malu avua bantu bavua ku mutu benza, misangu ya bungi tuvua tukanga tulasa bua ndambu wa matuku.

Bivua bimueneke ne: dibenga dia malu edi kadivua anu dijikija tshiji tshianyi to. Ke meme kutuadija kuditua mu dienza malu a tshikisu mabi matambe. Tshilejilu, umue musangu meme ne balunda banyi tuakamona filme wa kale uvua uleja muvuabu bakengesha bapika ba mu Afrike bavua mu États-Unis. Malu aa akanjula tshiji tshikole, musangu umue tuetu kuasa bansonga babidi ba batoke anu muaba au. Pashishe tuetu kuya mu miaba ivua batoke bua kukeba bantu bakuabu ba kukuma.

Pankavua ne bidimu bitue ku 19, meme ne bana betu ba balume tukavua tuenza malu mabi matambe. Tuakapeta bilumbu ne bena mu mbulamatadi. Muakunyanyi umue uvua muena mu dingomba dia benzavi bavua bamanyike bikole, meme kudisanga panyi nabu. Nsombelu wanyi uvua wenda anu unyanguka bibi menemene.

Mulunda wanyi mukuabu baledi bende bavua Bantemu ba Yehowa. Bakambikila mu bisangilu biabu, meme kuyamu. Anu ntshidi mfikilaku, ngakamona muvua Bantemu bashilangane ne bantu bakuabu. Muntu yonso uvua ne Bible wende ne umubala pavuabu bamba bua kubala mu tshisangilu. Too ne bansonga bavua benza miyuki mu bisangilu ebi! Biakankemesha bikole bua kumanya ne: Yehowa ke dîna dia Nzambi ne kumvua  baditela. (Musambu 83:18) Mu tshisumbu muvua bantu ba mu bisamba bionso, kadi tshivua tshikemesha ntshia ne: kamuvua kansungasunga ka makoba abu to.

Kumpala mvua musue anu kuya mu bisangilu bia Bantemu, kadi tshivua musue kulonga nabu Bible to. Dimue dituku meme mu bisangilu bia Bantemu butuku, balunda banyi bavua baye muaba uvuabu bimba mizike. Kuntu aku, bobu kukuma nsongalume mukuabu kumushipabu bualu kavua mubapeshe kankotshi kende to. Dituku diakalonda, kuyabu benda baditumbisha bua tshivuabu benze atshi. Too ne ku tubadi, bavua baseka pavuabu babela nkonko. Bakakosela babungi ba kudibu buloko bua kashidi. Diakalenga dianyi, tshivua nabu butuku abu to! Ngakangata dipangadika dia kushintulula nsombelu wanyi, meme kutuadija kulonga Bible.

Bu mumvua mumone malu a bungi a kansungasunga ka makoba, malu angakamona kudi Bantemu avua mankemeshe bikole. Tshilejilu, pavua Ntemu mutoke wenza luendu uya ku babende, uvua ushiya bana bende mu dîku dia mufike. Meme kumona kabidi dîku dia mutoke diakidila nsonga kampanda mufike uvua kayi ne kua kusombela. Ngakamona bushuwa ne: Bantemu ba Yehowa bavua balonda mêyi a Yezu adi mu Yone 13:35 a ne: “Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.” Mvua mupete buena-muntu bulelela!

Mu dilonga dianyi dia Bible ngakatuadija kumona ne: bivua bikengela nshintulule mushindu wanyi wa kuela meji. Mvua ne bua kuakaja ngelelu wanyi wa meji bua ngikala ngenza malu adi akebesha ditalala ne mmona kabidi ne: eu ke nsombelu muimpe undi ne bua kuikala nende. (Lomo 12:2) Ku kakese ku kakese, ngakatuadija kulubuluka. Mu ngondo wa kumpala wa 1974 ngakatambula, meme kulua Ntemu wa Yehowa.

Kadi, nansha panyima pa ditambula dianyi mvua amu ne bua kutungunuka ne kuluangana ne tshiji tshianyi. Tshilejilu dikuabu dituku meme mu buambi nyisha ku nzubu ne ku nzubu, muivi mukuabu kuibaye tshisanji mu mashinyi anyi; ngakamulondakaja lubilu lukole, pangakasua kumukuata, wakatshilekelela panshi, kunyemaye. Pangakalondela bantu bakuabu mumvua mufike ku dipetulula tshisanji atshi, mukulu mukuabu kungebejaye ne: “Stephen, bu wewe mumukuate uvua mua kumuenzela tshinyi?” Lukonko alu luakangeleshisha meji bikole, kunsakalu bua kutungunuka ne kuikala mukebi wa ditalala.

Mu ngondo wa 10/1974 ngakatuadija kuyisha mêba a bungi, ngenza mêba 100 ngondo yonso mu dilongesha bantu Bible. Panyima pa matuku ngakapeta diakalenga dia kuenza mudimu bu muena budisuile ku biro bidi bilombola mudimu wa Bantemu ba Yehowa pa buloba bujima bidi ku Brooklyn mu New York. Mu 1978, meme kupingana mu Los Angeles bua kulama mamu wanyi uvua usama. Bidimu bibidi pashishe, meme kusela Aarhonda mukajanyi undi munange bikole. Wakangambuluisha bikole mu dilama dia mamu too ne pakafua mamu. Panyima pa matuku, meme ne Aarhonda tuakabuela mu kalasa ka Gilada, pashishe kututumabu mu Panama mutudi tuenza mudimu bu bamisionere lelu eu.

Katshia ngatambula ndi mutuilangane ne malu a bungi avua ansaka bua kuenza malu ne tshikisu. Ndi mulonge mua kuepuka bantu badi bankeba bilumbu ne mua kutuyisha tshiji tshianyi mu mikuabu mishindu. Mukajanyi nansha bantu bakuabu ba bungi mbangele kalumbandi bua mumvua mupite bimpe ne nsombelu eyi. Mbinkemeshe be! Tshiena nditumbisha bua mudi bumuntu buanyi bushintuluke to, kadi ndi mutuishibue ne: ntshijadiki tshia mudi Bible ne bukole bua kushintulula bantu.​—Ebelu 4:12.

Bible mmulengeje nsombelu wanyi ne mmungambuluishe bua kulua muena ditalala wa bushuwa. Tshitu kabidi nkuma bantu to, kadi ndi mbambuluisha bua kuikalabu mu malanda mimpe ne Nzambi. Ngakalonga kabidi Bible ne muntu uvua muena lukuna wanyi patutshivua mu kalasa! Pakatambulaye, tuakasomba nende ndambu wa matuku mu nzubu umue. Katshia anu pine apu, tudi balue balunda ba pa muoyo. Too ne lelu meme ne mukajanyi tudi balonge Bible ne bantu bapite pa 80 babambuluishe bua kuluabu pabu Bantemu ba Yehowa.

Ndi ne dianyisha dia bungi kudi Yehowa bua mudiye mumpeteshe nsombelu wa nsongo ne wa disanka munkatshi mua bantu badi balejangana buwetu bulelela.