Mvua muledibue mu Acul, tshimenga tshivua ntanta mule ku mikuna mile ya ku Ouest kua ditunga dia Guatémala. Dîku dietu ndia bena Ixil, tshisamba kampanda tshia mu ndelanganyi ya bena Maya. Pa kumbusha muakulu wa tshiena Espagne, mu dikola dianyi mvua ngakula muakulu wa mu musoko wetu. Mvua mukole mu tshikondo tshivua mvita mibi ivua mienzeke munda mua bidimu 36 mu Guatémala itua ipela. Mu tshikondo atshi, bena Ixil ba bungi bakafua.

Pamvua ne bidimu 4, mukuluanyi wa bidimu 7 uvua unaya ne grenade ku bianza, kutayikaye mu mpukapuka. Pakenzeka bualu ebu mêsu anyi akafua, tutuanyi au kufuaye kabidi. Pashishe, kuntumabu mu tshilongelu tshia bana badi bampofu mu tshimenga tshia Guatémala, meme kulongamu mfundilu wa bampofu. Tshivua mumanye bua tshinyi bena mu tshilongelu atshi bavua bankandike bua kuyukila ne bana bakuabu to, nansha balongi nanyi bavua anu bangepuka. Misangu yonso mvua anu nkayanyi ne mvua njinga bikole ngondo ibidi ya dikisha itubu bafila tshidimu tshionso, bualu ntshikondo tshimvua kumbelu ne mamu wanyi uvua misangu yonso uditeka pa muaba wanyi ne bulenga buonso. Diakabi, mamu wakafua pantshivua ne bidimu 10. Pangakamona ne: mvua mujimije muntu utu munnange kupite bantu bonso, muoyo wa munda wakansama bikole.

Pamvua ne bidimu 11 ngakapingana mu tshimenga tshietu, meme kusombela kua tutuanyi wa kua tatu mukuabu. Uvua unkumbajila majinga anyi a ku mubidi, kadi kakuvua muntu uvua mua kumvua mumvua ndiumvua to. Imue misangu mvua ndidila Nzambi ne: “Bua tshinyi mamu mmufue? Bua tshinyi meme ndi mpofu?” Bantu bavua bangambila ne: ndisua dia Nzambi. Ngakafika ku nkomenu wa ne: Nzambi mmubi ne katu uditatshisha bua bantu to. Mvua musue kudishipa, kadi tshivua ne mushindu wa kuenza nanku to.

Bufofu buvua buntekeshe ku mubidi ne mu lungenyi. Bu muntshivua muana, bantu bavua balala nanyi ku bukole misangu ya bungi. Tshitu muanji kuamba malu au bualu mvua ngela meji ne: muntu nansha umue kakuatangila to. Bantu kabavua batamba kungakuisha ne meme panyi tshivua nyukila ne muntu nansha umue to. Mvua anu muditole pa nkayanyi ne mubungame, tshivua ngeyemena muntu nansha umue to.

Pantshivua ne bidimu muinshi mua 10, pa dîba dia dikisha, Bantemu bakuabu  babidi (mulume ne mukajende) bakalua muaba umvua. Mulongeshi kampanda wa mu tshilongelu tshietu uvua ungumvuila luse ke uvua mubalombe bua balue kuntangila. Bakangambila mulayi wa mu Bible wa ne: dimue dituku bafue nebabishibue ne bampofu nebamone. (Yeshaya 35:5; Yone 5:28, 29) Mvua munange malu avuabu bandongesha, kadi bivua binkolele bua kuyukila nabu bualu tshivua ne tshibidilu tshia kuakula to. Kadi nansha mumvua musue kuikala kule nabu, bakatungunuka anu ne kulua kuntangila ne lutulu ne bulenga buonso bua kundongesha Bible. Bena dibaka aba bavua benda ntanta wa kilometre 10 babanda mikuna bua kufika mu tshimenga tshimvua.

Muanetu wa kua tatu mukuabu wakangumvuija muvuabu wamba ne: mbamvuale bimpe bikale ne sombelu mupepele. Kadi bavua misangu yonso baditatshisha bikole bua bualu buanyi, bantumina tumue tubintu. Ngakamona ne: anu bena Kristo balelela ke badi mua kudipangisha malu bua bakuabu mushindu eu.

Ngakalonga Bible ku diambuluisha dia mikanda ivua ne mfundilu wa bampofo. Nansha mumvua ngumvua malu amvua ndonga, bivua bikole bua meme kuitaba amue malu bua mushindu umvua ndiumvua. Tshilejilu, bivua binkolele bua kuitaba ne: Nzambi uvua bushuwa uditatshisha bua bualu buanyi anyi ne: bantu bakuabu bavua mua kungenzela malu anu mudi Nzambi mua kungenzela. Ngakumvua bua tshinyi Yehowa mmuanji kulekela malu mabi enzeka bua tshitupa tshiipi, kadi tshivua mmumona bu Tatu wa dinanga to. *

Ku kakese ku kakese, malu amvua mulonge mu Bible akangambuluisha bua kushintulula ngelelu wanyi wa meji. Tshilejilu, ngakalonga ne: Nzambi udi umvuila bantu badi bakenga luse lua bungi. Nzambi wakamba bua batendeledi bende bavuabu bakengesha ne: ‘Nakutangila dikenga dia bantu banyi. Bualu bua ndi mumanye kanyinganyinga kabu.’ (Ekesode 3:7) Pangakalua kuanyisha ngikadilu milenga ya Yehowa, biakansaka bua kudilambula kudiye. Mu 1998, ngakatambula meme kulua Ntemu wa Yehowa.

Tshidimu tshimue panyima pa meme mumane kutambula, ngakabuela mu kalasa ka bampofo kavua pabuipi ne tshimenga tshia Escuintla. Mukulu wa mu tshisumbu tshia muaba au wakamona lutatu lumvua nalu bua kubuela mu bisangilu bu muntshivua musombele mu tshimenga tshietu. Tshisumbu tshivua pabuipi menemene tshivua pa mukuna uvua bena dibaka abu babanda bua kulua kulonga nanyi, ne bivua binkolele bua kuyaku. Bua kungambuluisha, mukulu au wakaludika dîku kampanda dia Bantemu ba mu Escuintla muaba umvua bualu bavua bitabe ku budisuile bua kunteka kuabu ne kungambuluisha bua kubuela mu bisangilu bia mu tshisumbu. Katshia anu dituku adi, bavua bantabalela anu bu ne: mvua muena mu dîku diabu.

Ndi ne bilejilu bikuabu bia bungi bia dinanga dilelela divua bena mu tshisumbu mbandeje. Malu onso aa mmantuishe ne: bu mundi Ntemu wa Yehowa, ndi munkatshi mua bena Kristo balelela.​—Yone 13:34, 35.

Tshitshiena kabidi ndimona tshiyi ne mushinga ne ditekemena to. Mpindieu nsombelu wanyi udi ne tshipatshila. Bu mundi mudifile bikole mu mudimu wa Bantemu ba Yehowa wa dilongesha bantu Bible, ndi mudifile bikole mu dilongesha bakuabu malu malelela a mu Bible pamutu pa kutangila bubedi buanyi. Ndi kabidi ne diakalenga dia kuambuluisha bu mukulu mu tshisumbu tshia muaba undi ne ngenzamu miyuki ya patoke. Mvua kabidi mupete diakalenga dia kuenza miyuki ya malu a mu Bible mu bisangilu binene bia Bantemu ba Yehowa mutu bantu binunu ne binunu babuela.

Mu 2010, ngakapeta diplome mu Kalasa ka dilongesha mudimu (kadibu babikila mpindieu ne: Kalasa ka bamanyishi ba Bukalenge) kavua kenzeke mu El Salvador. Kalasa aka kakangambuluisha bua kukumbaja bimpe majitu amvua nawu mu tshisumbu. Pangakapeta malongesha aa, ngakadiumvua ne mushinga wa bungi ne munangibue bikole kudi Yehowa Nzambi udi mua kuvuija muntu yonso mukumbane bua kumuenzela mudimu.

Yezu wakamba ne: “Disanka dia kupa ndipite dia kuangata.” (Bienzedi 20:35) Lelu, ndi bushuwa mua kuamba ne: ndi ne disanka, kadi nansha mumvua tshiyi ngela meji mushindu eu kumpala, mpindieu ndi ndiumvua mukumbane bua kuambuluisha bantu bakuabu.