Bible mmukanda wa kale be! Ukadi muenze bidimu bungi kayi? Bavua batuadijile difunda dia Bible ku Est kua Asie, kukadi bidimu bitue ku 3 500. Patudi tufuanyikija, tshivua mua kuikala tshikondo tshivua mulongolongo wa bakalenge ba mu dîku dia bukole dia Shang bakokesha mu Chine, bidimu 1 000 kumpala kua tshitendelelu tshia Budah kutuadijatshi mu Inde.​—Bala kazubu ka ne: “ Malu adi atangila Bible.”

Bua mukanda kuambuluishawu bantu ne kuikala ne mushinga kudibu, udi ne bua kuikala umvuika bimpe ne wakula malu adi abatangila. Bible udi anu bu mukanda wa mushindu eu. Udi ufila mandamuna mimpe a nkonko ya mushinga ya mu nsombelu wa bantu.

Tshilejilu, pamuapa ukadi mudiebeje ne: ‘Bua tshinyi tudi ne muoyo?’ Katshia ku kale too ne lelu, lukonko elu lutshidi anu lusamisha bantu mitu. Kadi tudi mua kupetela diandamuna mu Genese, mukanda wa kumpala wa mu Bible, mu nshapita 1 ne 2. Mu nshapita eyi Bible udi ulonda muyuki wa “ku tshibangidilu,” mmumue ne: miliyare ne miliyare ya bidimu pavua tshibuashibuashi tshietu etshi, mitoto ne bikata biayi ne buloba bifukibue. (Genese 1:1) Pashishe udi umvuija bua tshinyi Nzambi uvua mufuke buloba, umvuija bitupa bilondangane bia muvuabu bufike ku dikala muaba wa kusombela, muvua bifukibua bifike ku dikalaku ne muakafika bantu pa buloba.

Bible udi utupesha mibelu mimpe ya mua kupita ne ntatu ya ku dituku ne ku dituku. Mbipepele bua kuyumvua. Bidi nanku bua malu abidi.

Bua kumpala, Bible utu ne ngakuilu mutoke, umvuika bipepele ne muimpe. Mu Bible kamuena biambilu bidi kabiyi biumvuika to, kadi mudi miaku idi yumvuika bimpe ne itudi bibidilangane nayi. Imue ngenyi idi imueneka mikole badi bayamba mu miaku itudi bamanye bimpe.

Tshilejilu, bua kulongesha bantu malu avua abalenga ku muoyo, Yezu uvua ufila bilejilu bia bungi bivua bipetangana ne nsombelu wabu wa matuku onso. Bia bungi bia kudibi uvua mubifile mu muyuki udibu babikila ne: Muyuki wa pa Mukuna udibu balonde mu mukanda wa Matayi, mu nshapita 5 too ne wa 7. Muntu kampanda wakabikila muyuki eu ne: “muyuki wa malu malelela” wamba ne: “ki mmuenza bua kuuja mitu yetu ne ngenyi mipite bungi to, kadi mbua kutuludika ne kuakaja bienzedi bietu.” Udi mua kubala nshapita eyi pamuapa mu minite 15 anyi 20, neukeme  bua kumona mudi mêyi a Yezu mapepele kadi mikale ne bukole.

Bualu bukuabu budi buenza bua Bible ikale mupepele bua kumvua, mmalu adimu. Ki mmukanda wa mianu ne nsumuinu to. Kadi, mukanda kampanda udi wamba ne: “udi wakula bua bantu bonso: bende lumu ne ba tshianana aba, bua ntatu ivuabu batantamene, ditekemena diabu, bilema ne ditshimuna diabu.” (The World Book Encyclopedia) Mbipepele bua tuetu kumanya miyuki ya bantu balelela aba ne malu abu, ne kumvua malongesha mimpe adimu.​—Lomo 15:4.

Bua wewe kumvua mukanda kampanda bimpe, bidi bikengela wikale mu muakulu uudi mumanye. Bidi bimueneka ne: lelu eu Bible mmukudimuna mu muakulu uudi umvua, nansha wewe musombele muaba kayi. Tangila malu adi enza bua bualu budi bukemesha ebu bufike ku dienzeka.

Dikudimuna. Ku ntuadijilu bavua bafunde Bible mu tshiena Ebelu, mu tshiena Alama ne mu tshiena Greke. Nunku, anu bantu bakese ke bavua mua kubala Bible. Bua miakulu mikuabu kupetayi payi Bible, bakudimunyi ba muoyo muimpe bakadienzeja bikole bua kumukudimuna. Bua madikolela abu au, mbakudimune Bible mujima anyi tshitupa tshiende mu miakulu mitue ku 2 700. Bidi bimvuija ne: bantu bapite pa 90 pa bantu lukama badi mua kubala tshitupa tshia Bible mu muakulu wabu wa ku dibele.

Dipatula. Bavua bafunde mifundu ya Bible ya ntuadijilu pa bintu bivua binyanguka lukasa bu mudi biseba bia nyama ne papyrise. Bua kulama mifundu ayi bidimu bia bungi bua bantu bakuabu balue kuyipeta, bivua bikengela kuyitentula ku bianza misangu ne misangu. Kuyitentula eku kuvua kulomba makuta a bungi, nunku anu bantu bakese ke bavua mua kuyipeta. Kadi pakapatuka mashinyi a mikanda a Gutenberg kukadi mpindieu bidimu bipite pa 550, Bible yakapatuka mipite bungi. Badi batshinka ne: bakadi babanye miliyare ne miliyare ya Bible mujima anyi tshitupa tshiende.

Kakuena mukanda nansha umue wa malu a Nzambi utudi mua kufuanyikija ne Bible to. Bushuwa Bible mmukanda udi ukengela kumvua. Nansha nanku, udi mua kupeta lutatu bua kumumvua, kadi udi mua kupeta diambuluisha. Muaba kayi? Mmunyi mudibi mua kukuambuluisha? Bala tshiena-bualu tshidi tshilonda.