PANAYIOTA uvua mukolele mu tshidila kampanda tshia mu Mediterane. Patshivuaye nsonga uvua mudifile bikole mu malu a tshididi. Panyima pa matuku kuluaye sekretere wa tshisumbu kampanda tshia tshididi mu musoko muvuaye musombele. Wakaya too ne ku nzubu ne ku nzubu wenda usangisha makuta bua tshisumbu atshi. Kadi pavua matuku enda apita Panayiota wakalua kumona ne: uvua upitshisha dîba diende patupu. Nansha muvua benamu babikilangana balunda, kansungasunga, dijinga malu manene, dikokangana ne mukawu bivua anu munkatshi muabu.

Daniel uvua mukolele mu dîku dia bantu bavua batendelela bikole mu Irlande. Kadi bia dibungama, utshidi anu uvuluka lubombo lua bamfumu ba bitendelelu bavua bakuatshika maluvu, badia bantu makuta ne biba makuta a mu tshibutshilu eku bamulongesha ne: wewe muenze mpekatu newoshike mu kapia ka mu iferno.

Jeffery uvua wenza mudimu wa madisuisha bikole ne upanyishila kompanyi kampanda wa dipana dia mazuwa pa mâyi uvua mu Royaume-Unis ne mu États-Unis. Udi uvuluka misangu ya bungi ivua kompanyi mikuabu ivua payi ipana mazuwa a pa mâyi ne basumbi bumvuangana ne banene ba mbulamatadi bua kuibila. Ne lubombo luonso bavua mua kuamba bualu kayi buonso anu bua kulama mudimu.

Tshidi tshitonda ntshia ne: ki nganu bantu badibu batele aba bavua ne lubombo to. Lelu eu lubombo ndutangalake bikole mu malu adi bantu benza bu mudi mu tshididi, mu bitendelelu ne mu bungenda. Muaku wa mu Anglais udibu bakudimune ne: “muena lubombo” mmufumine ku muaku wa tshiena Greke udi uleja muakudi anyi munayi wa manaya udi ne tshibidilu tshia kuvuala buadi anyi tshifuebe. Mu bungi bua bidimu muaku eu wakalua kumvuija muntu yonso udi musue kushima bantu anyi kukumbaja anu biende bipatshila.

Lubombo ludi mua kujula tshiji tshikole munda mua bantu badibu benzele bibi. Mu tshiji atshi muntu udi mua kuamba ne: “Lubombo! Nelujikaku anyi?” Diakalenga, Dîyi dia Nzambi didi ditupesha bijadiki bia ne: nelujike.

Bilondeshile Bible, lubombo ki ndutuadije ne bantu to, ndutuadije ne tshifukibue kampanda tshia mu nyuma. Ku ntuadijilu wa bantu, Satana Diabolo wakakuata mudimu ne nyoka bu tshifuebe, udivuija bu mubenzedi wa malu mimpe bua kupambuisha Eva mukaji wa kumpala. (Genese 3:1-5) Katshia anu pinapu, bantu ba bungi mbasokoke tshidibu, benza nanku anu bua kushima bakuabu ne kukumbaja abu majinga anu muvua Diabolo muenze.

Pavua tshisamba tshia Isalele wa kale tshikuluke mu buteyi bua ditendelela nzambi ya dishima ne bua  ditendelela Nzambi mu lubombo; uvua mubadimuije misangu ne misangu bua tshivua mua kubafikila. Yehowa Nzambi wakamba ku butuangaji bua muprofete Yeshaya ne: ‘Bantu aba badi basemena pepi nanyi ne badi bantumbisha ne mukana muabu ne mishiku yabu, kadi bakumusha mitshima yabu kundi ne idi kule.’ (Yeshaya 29:13) Pavua tshisamba etshi tshiele Nzambi nyima, wakalekela bisamba bikuabu bibutula Yelushalema ne ntempelo uvuamu, muaba uvuabu batendelela Nzambi; bena Babilona ke bakabibutula bua musangu wa kumpala mu 607 kumpala kua Yezu, bena Lomo kubibutulabu bua musangu wa ndekelu mu 70 kunyima kua Yezu. Bushuwa, Nzambi ki mmusue lubombo nansha kakese!

Ku lukuabu luseke, Nzambi ne Muanende Yezu badi bangata bantu ba bululame ne ba muoyo muimpe ne mushinga wa bungi. Tshilejilu, ku ntuadijilu kua mudimu wa diyisha wa Yezu, muntu mukuabu diende Natanaele wakalua kudiye. Pakamumona Yezu wakamba ne: “Monayi muena Isalele udi kayi ne dishima nansha dikese.” (Yone 1:47) Natanaele uvuabu babikila kabidi ne: Batolomayo wakalua umue wa ku bapostolo 12 ba Yezu.​—Luka 6:13-16.

Yezu uvua upitshisha dîba ne balongi bende, ubalongesha ngelelu wa meji wa Nzambi. Bayidi bende kabavua ne bua kuikala ne lubombo to. Yezu wakela patoke malu a lubombo a bamfumu ba bitendelelu ba tshikondo atshi ne dikima dionso bua kudimuija bayidi bende. Tangila amue malu avuabu benza.

Bavua benza “malu makane” bua bantu babamone. Yezu wakambila bantu bavua bamuteleja ne: “Nudimuke bua kanuikadi nuenza malu makane bua kudileja ku mêsu kua bantu bu mutu bena lubombo benza.” Wakabambila kabidi bua kupeshangana bintu bia luse “mu musokoko.” Bavua kabidi ne bua kusambila kabiyi bua bantu babamone. Nunku, ntendelelu wabu uvua ulua muimpe ne Tatu wende uvua umuanyisha.​—Matayi 6:1-6.

Bavua ba kumpala ku dimona bilema bia bantu bakuabu. Yezu wakamba ne: “Muena lubombo! Anji patula mukamba udi mu dîsu diebe wewe, pashishe neumone bimpe mua kupatula kasosa kadi mu dîsu dia muanenu.” (Matayi 7:5) Padi muntu utuishila mêsu anu pa bilema bia bakuabu pende muikale ne biende bilema binene, udi usokoka tshidiye menemene. Bualu mu bulelela “bantu bonso bakenza bubi ne kabena bafika ku butumbi bua Nzambi to.”​—Lomo 3:23.

Bavua ne meji mabi. Musangu mukuabu bayidi ba Bafalese ne bena dia Helode bakaya kudi Yezu bua kumuela lukonko bua bitadi. Bavua balabidila Yezu bamba ne: “Mulongeshi, tudi bamanye ne: utu wamba anu malu malelela ne ulongesha njila wa Nzambi mu bulelela.” Pashishe kumuelabu lukonko lua buteyi ne: “Mbimpe muntu yonso afute Kaisa tshitadi anyi kafutshi?” Yezu wakabandamuna ne: “Nuenu bena lubombo, nudi nunteta bua tshinyi?” Yezu uvua mubabikile ne: bena lubombo bualu kabavua bakeba kupeta diandamuna dia lukonko to, kadi bavua basua “kumukuata ku mêyi.”​—Matayi 22:15-22.

Pakajadikabu tshisumbu tshia bena Kristo mu Pentekoste wa mu 33, benamu bavua bamba bulelela ne benza malu ne bululame. Bena Kristo balelela aba bavua benza ne muabu muonso bua kulekela bienzedi bia lubombo. Tshilejilu, Petelo umue wa ku bapostolo 12 ba Yezu wakakankamija bena Kristo nende bua ‘kutumikila bulelela ne kunanga bana babu kakuyi lubombo.’ (1 Petelo 1:22) Mupostolo Paulo wakalomba bena Kristo nende bua kuleja ‘dinanga didi difumina mu muoyo mutoke, mu kondo ka muoyo kimpe ne mu ditabuja didi kadiyi ne lubombo.’​—1 Timote 1:5.

Malongesha a Yezu ne a bapostolo adi mu Bible adi ne mushinga lelu anu muvuawu nawu mu bidimu lukama bia kumpala. Bua bualu ebu mupostolo Paulo wakafunda ne: “Dîyi dia Nzambi didi ne muoyo ne bukole, nditue kupita muele wonso wa ntapa kubidi ne didi ditubula difika too ne ku dipandulula dia anyima ne nyuma, ne dia manungu ne buongo bua mu mifuba, ne didi mua kujingulula meji ne malu adi muoyo musue kuenza.” (Ebelu 4:12) Kumanya malongesha a mu Bible ne kudienzeja bua kuatumikila nkuambuluishe bantu ba bungi bua  kulekela lubombo ne kuenza malu ne bululame. Tumonayi malu adi bantu 3 batuvua batele ku ntuadijilu kua tshiena-bualu etshi bambe.

Malu akakudimuka mu nsombelu wa Panayiota pakitabaye dibikila dia kubuela mu bisangilu ku Nzubu wa Bukalenge wa Bantemu ba Yehowa. Kavua mubamone baleja buakane bua lubombo anu bua kukoka ntema ya bantu to. Udi wamba ne: “Ke muaba ungakamona bantu balejangana dinanga dilelela ne batabalelangana bushuwa, ebu mbualu bumvua tshiyi muanji kumona bidimu bionso bimvua mu malu a tshididi ebi.”

Panayiota wakatuadija kulonga Bible, kufikaye too ne ku ditambula. Kukadi kupita bidimu 30. Udi wamba ne: “Ngakapeta nsombelu wa nsongo pangakatuadija kuyisha malu a Bukalenge bua Nzambi budi mua kufikisha bantu mu bulongolodi buakane, kadi ki mpamvua nya kuakula malu a tshisumbu tshia tshididi to.”

Daniel wakalubuluka mu tshisumbu tshia bena Kristo, kumupeshabu imue midimu. Bidimu bikese pashishe wakenza tshilema, kondo kende ka muoyo kutuadijaku kumulubakaja. Wakamba ne: “Pangakavuluka lubombo lumvua mumone mu tshitendelelu bidimu bishale, tshivua ne tshikuabu tshia kuenza to, bivua bikengela ndekele midimu imvua nayi. Tshivua mua kusomba munkatshi mua bena Kristo nanyi mubasokoke tshimvua to.”

Diakalenga, panyima pa matuku pakalongolola Daniel tshilema tshiende, wakumvua ne: uvua mua kuangatulula midimu yende ne kondo ka muoyo kimpe, kuangatululaye kabidi midimu mu tshisumbu ne disanka dionso. Etshi ntshilejilu tshimpe tshia bululame bua bantu badi benzela Nzambi mudimu kabayi ne lubombo. Mbalonge mua ‘kumbusha mukamba’ mu dîsu diabu kumpala kua kujinga bua ‘kupatula kasosa’ kadi mu dîsu dia bena Kristo nabu.

Jeffery uvua muenze mudimu wa bungenda wakamba ne: “Pavua dimanya dianyi dia malu a mu Bible dienda divula, ngakamona ne: tshivua ne bua kutungunuka ne kuikala muena dishima ne mulabakane uvua upanyisha bintu mudilongolole bua kuamba bualu kayi buonso anu bua kulama mudimu to. Mvese ya mu Bible ivua milengeje kondo kanyi ka muoyo; bu mudi Nsumuinu 11:1 udi utuambila ne: ‘Tshiamu tshidibu bidikija natshi bujitu tshia mashimi tshidi tshitondesha Yehowa.’” Bishilangane ne bantu bavua bele Yezu lukonko bua bitadi, Jeffery wakalonga mua kubenga kuenzela bena Kristo nende ne bantu bakuabu malu ne lungenyi lubi lusokome panyima.

Miliyo ya Bantemu ba Yehowa pa buloba bujima badi badienzeja bua kutumikila malu adibu balonge mu Bible. Badi benza ne muabu muonso bua “kuvuala bumuntu bupiabupia buvua bufukibue bilondeshile disua dia Nzambi mu buakane ne lulamatu bia bushuwa.” (Efeso 4:24) Tudi tukulomba bua kukeba bua kumanya tshidi Bantemu ba Yehowa, malu atubu bitabuja ne mudibu mua kukuambuluisha bua kumanya malu a bulongolodi bupiabupia budi Nzambi mulaye. Muomu amu ke “muikala buakane.”​—2 Petelo 3:13.