Mukanda wa Kumpala wa Kulondolola 10:1-14
-
Lufu lua Shaula ne bana bende ba balume (1-14)
10 Mpindieu bena Peleshete bavua baluangana ne Isalele. Bantu ba mu Isalele bakanyema kumpala kua bena Peleshete, ne ba bungi bakakuluka bashipa pa mukuna wa Gileboa.+
2 Bena Peleshete bavua anu benda balondakaja Shaula ne bana bende, kusemenabu pabuipi nabu bikole; bena Peleshete bakashipa Yonatana, Abinadaba, ne Maleki-shua,+ bana ba Shaula.
3 Mvita yakakolela Shaula bikole menemene, ne bedi ba mikete bakamona muaba uvuaye, bobu kumutapa.+
4 Ke Shaula kuambila muntu uvua umuambuila bia mvita ne: “Tula muele webe wa mvita, uwuntue, bua bantu badi kabayi batengula aba kabalu kungenzela malu kakuyi luse.”*+ Kadi muntu uvua umuambuila bia mvita kakitaba to, bualu uvua ne buôwa bua bungi menemene. Nunku Shaula wakangata muele wende wa mvita, yeye kudishindilapu.+
5 Pavua muntu uvua wambuila Shaula bia mvita mumone ne: Shaula uvua mufue, yeye pende wakadishindila pa muele wende wa mvita, kufuaye.
6 Nunku Shaula ne bana bende ba balume basatu bakafua, ne ba mu nzubu muende bonso bakafua pamue.+
7 Pavua bena Isalele bonso bavua mu tshibandabanda* bamone ne: bantu bonso bavua banyeme, ne bamone kabidi ne: Shaula ne bana bende bavua bafue, bakatuadija kunyema bumbuka mu bimenga biabu; nunku bena Peleshete bakalua, kusombabu mu bimenga abi.
8 Dituku diakalonda, pavua bena Peleshete balue bua kuangata bintu bia bantu bavuabu bashipe, bakasangana Shaula ne bana bende ba balume bafuile pa mukuna wa Gileboa.+
9 Nunku bakangata bintu biende, kumukosabu mutu, ne kumukopolabu bia mvita biende, bobu kutuma mukenji mu buloba buonso bua bena Peleshete bua bamuangalaje lumu alu kudi mpingu yabu+ ne kudi bantu.
10 Pashishe bakateka bia mvita biende mu nzubu* wa nzambi wabu, bobu kusuikila mutu wende ku nzubu wa Dagona.+
11 Pavua bantu bonso ba mu Yabesha+ mu Gilada bumvue malu onso avua bena Peleshete benzele Shaula,+
12 bena mvita bonso bakajuka, kuangatabu tshitalu tshia Shaula ne bitalu bia bana bende ba balume. Bakaya nabi ku Yabesha, kujiikabu mifuba yabu muinshi mua mutshi munene wa mu Yabesha+ ne bakajila biakudia matuku muanda mutekete.
13 Nunku Shaula wakafua bua muvuaye mupange lulamatu kudi Yehowa bualu kavua mutumikile dîyi dia Yehowa,+ ne bualu uvua kabidi muye kuebeja malu kudi muena mbuku+
14 pamutu pa kuebeja malu kudi Yehowa. Nunku Yeye wakamushipa ne kupeshaye Davidi muana wa Yishai bukalenge.+
