Mukanda wa Kumpala wa Kulondolola 14:1-17
14 Hilama+ mukalenge wa Tulo wakatuma bantu ne mukenji kudi Davidi, bikale ne mitshi ya sedre, ne bantu bavua bibaka ne mabue,* ne bena mabaya bua kumuibakila nzubu.*+
2 Nunku Davidi wakamanya ne: Yehowa uvua mumujadike bikole bu mukalenge wa Isalele,+ bualu uvua mubandishe bukalenge buende bikole bua bualu bua tshisamba Tshiende tshia Isalele.+
3 Davidi wakasela bakaji bakuabu+ mu Yelushalema, ne Davidi wakalela bana bakuabu ba balume ne ba bakaji.+
4 Aa mmêna a bana bende bavuabu bamulelele mu Yelushalema:+ Shamua, Shobaba, Natana,+ Solomo,+
5 Yibeha, Elishua, Elepeleta,
6 Noga, Nefege, Yafia,
7 Elishama, Bêleyada, ne Elifelete.
8 Pavua bena Peleshete bumvue ne: bavua bele Davidi manyi bua kulua mukalenge wa Isalele mujima,+ bena Peleshete bonso bakabanda bua kukeba Davidi.+ Pavua Davidi mumvue bualu ebu, wakapatuka bua kubaluisha.
9 Pashishe bena Peleshete bakalua, ne bavua baluisha bantu ba mu Tshibandabanda* tshia bena Lefa.+
10 Davidi wakebeja Nzambi wamba ne: “Mbande bua kuluangana ne bena Peleshete anyi? Neubafile mu tshianza tshianyi anyi?” Ke Yehowa kumuambila ne: “Banda, ne bushuwa nembafile mu tshianza tshiebe.”+
11 Nunku Davidi wakabanda ku Bâla-pelasima,+ ne wakabashipa kuntu aku. Ke Davidi kuamba ne: “Nzambi mulelela mmupande njila mu bena lukuna banyi ku tshianza tshianyi anu bu njila mupanda kudi mâyi.” Ke bualu kayi bakinyika muaba au ne: Bâla-pelasima.*
12 Bena Peleshete bakalekela nzambi yabu muaba au, ne pavua Davidi mutume dîyi, bakayosha mu kapia.+
13 Pakapita matuku bena Peleshete bakalua kabidi kuluisha bantu ba mu tshibandabanda.*+
14 Davidi wakebeja kabidi Nzambi, kadi Nzambi mulelela wakamuambila ne: “Kubandi bua kubalonda buludiludi to. Kadi nyunguluka uyile panyima pabu, ne ubapatukile kumpala kua mitshi ya baka.+
15 Paudi umvua mikuma mienze bu ya bantu benda kuulu kua mitshi ya baka, ubaluishe diakamue, bualu Nzambi mulelela neikale mumane kupatuka kumpala kuebe bua kushipa tshiluilu tshia bena Peleshete.”+
16 Nunku Davidi wakenza anu muvua Nzambi mulelela mumutumine dîyi bua kuenza,+ ne bakashipa tshiluilu tshia bena Peleshete kumbukila ku Gibeona too ne ku Gezê.+
17 Nunku lumu lua Davidi luakatangalaka mu maloba onso, ne Yehowa wakenza bua bisamba bionso bikale nende ne buôwa bukole.+
Note
^ Anyi “bibaki ba bimanu.”
^ Anyi “dibalasa.”
^ Anyi “Tshibatabata.”
^ Diumvuija: “Mfumu mu dipanda miaba ku bukole.”
^ Anyi “tshibatabata.”
