Mukanda wa Kumpala wa Kulondolola 18:1-17
18 Pakapita matuku, Davidi wakatshimuna bena Peleshete, wakabakokesha, ne wakanyenga Gata+ ne misoko ya kumpenga kuende* mu bianza bia bena Peleshete.+
2 Pashishe wakatshimuna Moaba,+ ne bena Moaba bakalua bena mudimu ba Davidi, ne bavua balua ne milambu.+
3 Davidi wakatshimuna Hadadezê+ mukalenge wa Soba+ pabuipi ne Hamate+ pavuaye uya bua kujadika bukokeshi buende ku Musulu wa Pelata.+
4 Davidi wakakuata matempu a Hadadezê tshinunu, bendeshi bende ba tubalu 7 000 ne basalayi bende bavua benda ku makasa binunu 20.+ Pashishe Davidi wakakosa mijilu ya ku bikono bia tubalu tuvua tukoka matempu, kadi wakashiya tubalu lukama.+
5 Pavua bena Sulia ba ku Damaseke balue bua kuambuluisha Hadadezê mukalenge wa Soba, Davidi wakashipa bena Sulia binunu 22.+
6 Pashishe Davidi wakateka bisumbu bia basalayi mu Sulia wa Damaseke, ne bena Sulia bakalua bena mudimu ba Davidi, ne bavua balua ne milambu. Yehowa uvua wenza bua Davidi atshimune* miaba yonso ivuaye uya.+
7 Davidi wakangata kabidi ngabu ya or ya bijengu ya bena mudimu ba Hadadezê, kuyaye nayi ku Yelushalema.
8 Davidi wakangata biamu bia mitaku bia bungi mu Tibehata ne mu Kuna, bimenga bia Hadadezê. Solomo wakenza nabi Mbuu wa tshiamu tshia mitaku,+ makunji, ne bintu bia tshiamu tshia mitaku.+
9 Pavua Tou mukalenge wa Hamate mumvue ne: Davidi uvua mutshimune tshiluilu tshijima tshia Hadadezê+ mukalenge wa Soba,+
10 diakamue wakatuma muanende Hadolama kudi mukalenge Davidi bua amuebeje muvuaye ne amuele kalumbandi bua muvuaye muluangane ne Hadadezê ne mumutshimune (bualu Hadadezê uvua muluishe Tou misangu ya bungi), ne uvua mumutuadile bintu bia mishindu yonso bia or, bia arjan, ne bia tshiamu tshia mitaku.
11 Mukalenge Davidi wakajidila Yehowa bintu ebi,+ pamue ne arjan ne or ivuaye muangate mu bisamba bionso: mu Edome ne mu Moaba, kudi bena Amona,+ kudi bena Peleshete,+ ne kudi bena Amaleka.+
12 Abishai+ muana wa Seluya+ wakashipa bena Edome binunu 18 mu Tshibandabanda tshia Mukele.+
13 Wakateka bisumbu bia basalayi mu Edome, ne bena Edome bonso bakalua bena mudimu ba Davidi.+ Yehowa uvua wenza bua Davidi atshimune* miaba yonso ivuaye uya.+
14 Davidi wakatungunuka ne kukokesha Isalele mujima,+ ne uvua ulumbuluisha tshisamba tshiende tshijima ne buakane ne bululame.+
15 Yoaba muana wa Seluya uvua ku mutu kua tshiluilu,+ Yehoshafata+ muana wa Ahiluda uvua mufundi wa malu a bukalenge,
16 Sadoka muana wa Ahituba ne Ahimeleke muana wa Ebeyatâ bavua bakuidi, ne Shawesha uvua mufundi.
17 Benaya muana wa Yehoyada uvua ku mutu kua bena Kelete+ ne bena Pelete.+ Bana ba balume ba Davidi bavua muaba wa kumpala balondela mukalenge.
